3 октября 2026
Главная страница · Вернуться в Нотный тропарион · 4 октября 2026
- Воздвижение честного и животворящего Креста Господня
- Великомученик Евстафий Плакида, жена его Феопистия и чада их: Агапий и Феопист
- Мученики Михаил Черниговский и боярин его Феодор
- Благоверный князь Олег Брянский
- Собор Брянских святых
Воздвижение честного и животворящего Креста Господня
Текст гражданским шрифтом
Тропарь, глас 1.
Спаси́, Го́споди, лю́ди Твоя́/ и благослови́ достоя́ние Твое́,/ побе́ды [правосла́вным христиа́ном] на сопроти́вныя да́руя// и Твое́ сохраня́я Кресто́м Твои́м жи́тельство.
Кондак, глас 4.
Самоподобен.
Вознесы́йся на Кре́ст во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ на́с си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.
Великомученик Евстафий Плакида, жена его Феопистия и чада их: Агапий и Феопист
Текст гражданским шрифтом
Тропарь, глас 4.
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего: / иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости,/ тех моли́твами// спаси́ ду́ши на́ша.
Кондак, глас 2.
Подобен: «Вы́шних ища́…»
Стра́сти Христо́вы я́ве подража́в/ и Сего́ испи́в усе́рдно ча́шу,/ о́бщник, Евста́фие, и сла́вы снасле́дник был еси́,/ от Сама́го все́х Бо́га// прие́мля с высоты́ Боже́ственное оставле́ние.
Мученики Михаил Черниговский и боярин его Феодор
Текст гражданским шрифтом
Тропарь, глас 4.
Жи́знь ва́шу му́ченически соверши́вше,/ испове́дания венцы́ украси́вшеся, к Небе́сным востеко́сте,/ Михаи́ле прему́дре с до́блим Фео́дором,/ моли́те Христа́ Бо́га/ сохрани́ти Оте́чество ва́ше,/ гра́д же и лю́ди,// по вели́цей Его́ ми́лости.
Иной тропарь, глас 3.
Блаже́ннии апо́столом равноче́стнии,/ прия́ли есте́ вене́ц от Христа́,/ зане́же того́ досто́йни,/ Михаи́ле богому́дре и Фео́доре ди́вне,/ мир ми́рови испроси́те// и душа́м на́шим ве́лию ми́лость.
Кондак, глас 8.
Подобен: «Взбра́нной Воево́де…»
Ца́рство земно́е в ничто́же вмени́в,/ сла́ву, я́ко преходя́щую, оста́вил еси́,/ самозва́н прише́д к подвиго́м,/ Тро́ицу пропове́дал еси́ пред нечести́вым мучи́телем,/ страстоте́рпче Михаи́ле с до́блим Фео́дором,/ Царю́ Си́л предстоя́ще,/ моли́те без вре́да сохрани́ти Оте́чество ва́ше, гра́д же и лю́ди,// да ва́с непреста́нно почита́ем.
Иной кондак, глас 2.
Ве́рою укре́пльшеся, святи́и, муче́ния претерпе́сте/ и кровьми́ свои́ми погаси́сте пла́мень сопроти́вных безбо́жия,/ Христа́ же испове́дасте, с Отце́м и Ду́хом,// Михаи́ле и Фео́доре, Его́ моли́те за всех нас.
Иной кондак, глас 2.
Вы́шних и́щуще, ни́жняя оста́вили есте́,/ колесни́цу на Небеса́ кро́вь свою́ сотвори́ли есте́,/ тем собесе́дницы первому́чеником бы́сте,/ Михаи́ле и Фео́доре,// с ни́миже Христа́ Бо́га моля́ще непреста́нно за вся ны.
Иной кондак, глас 3.
Я́ко свети́ла, в Руси́ возсия́вше,/ муче́ния луча́ми сла́вными отрази́сте,/ страстоте́рпцы сла́внии, Михаи́ле и Фео́доре,/ те́м вопия́сте:// ничто́же нас отлучи́т от любве́ Христо́вы.
Благоверный князь Олег Брянский
Текст гражданским шрифтом
Тропарь, глас 8.
От ю́ности возлюби́в Христа́ все́м се́рдцем, преподо́бне,/ сла́ву земну́ю, я́ко преходя́щу, оста́вил еси́,/ и ца́рство земно́е в ничто́же вмени́в,/ ли́ку и́нок ра́достно приче́лся еси́,/ и труды́ мно́гими гра́д Брянск, а́ки со́лнце, пресве́тло озари́л еси́:/ те́м, бы́в Тро́ицы украше́ние,/ моли́, кня́же Оле́же, Христа́ Бо́га,// спасти́ся душа́м на́шым.
Иной тропарь, глас 8.
От ю́ности Христа́ возлюби́в все́м се́рдцем, преподо́бне,/ сла́ву земну́ю, я́ко преходя́щу, оста́вил еси́/ и, ца́рство земно́е ни во что́же вмени́в,/ ли́ку и́ноческому ра́достно приобщи́лся еси́/ и, мно́гими по́двиги благода́ть Свята́го Ду́ха стяжа́в,/ гра́д Брянск, а́ки со́лнце, пресве́тло озари́л еси́./ Те́мже моли́, кня́же Оле́же, Христа́ Бо́га,// спасти́ся душа́м на́шим.
Кондак, глас 2.
Засту́пниче те́плый Бря́нския земли́,/ преподо́бне кня́же Оле́же,/ ку́пно со святы́ми сро́дники твои́ми/ Престо́лу Бо́жию ны́не предстоя́,/ моли́твами твои́ми Правосла́вие утверди́,/ е́реси и раско́лы разори́,/ Оте́честву на́шему мир// и душа́м на́шим поле́зная испроси́.
Собор Брянских святых
Текст гражданским шрифтом
Тропарь, глас 4.
Дне́сь ра́достно лику́ет земля́ Бря́нская,/ прославля́ющи ча́да своя́, Бо́гу угоди́вшия,/ святи́тели и иере́и,/ преподо́бныя отцы́ и ма́тери,/ благове́рныя кня́зи и княги́ни,/ му́ченики и испове́дники,/ к ни́мже с любо́вию возопии́м:/ о собо́ре святы́й и по́лче боже́ственный,// земли́ на́шея утвержде́ние вы́ есте́ вои́стину.
Кондак, глас 2.
Засту́пницы те́плии Бря́нския земли́,/ святи́и сро́дницы на́ши,/ ку́пно с Пресвято́ю Богоро́дицею и все́ми святы́ми/ Престо́лу Бо́жию ны́не предстоя́ще,/ моли́твами ва́шими Правосла́вие утверди́те,/ е́реси и раско́лы разори́те,/ Оте́честву на́шему мир// и душа́м на́шим поле́зная испроси́те.
Главная страница · Вернуться в Нотный тропарион · 4 октября 2026 · Наверх