Рождество Пресвятой Богородицы
Главная страница · Службы с нотами
Малая Вечерня
Стихиры на «Го́споди, воззва́х…»
Глас 1.
Подобен: «Небе́сных чино́в…»
Иоаки́м и А́нна торжеству́ют,/ Нача́ток ро́ждше на́шего спасе́ния,/ еди́ну Богоро́дицу,/ с ни́миже и мы пра́зднуем днесь,/ от ко́рене о́наго Иессе́ева// блажа́ще Де́ву Чи́стую.
От А́нны днесь цвет,/ сад Богода́нный,/ Богоро́дица прозябе́, спасе́ние челове́ков,/ из Нея́же всех Зижди́тель ро́ждься па́че ума́,/ Ада́мову очища́ет, я́ко Благ,// всю скве́рну бла́гостию.
Кто дово́льно по досто́инству пе́ти возмо́жет/ от Анны неизрече́нно младе́нствующую Де́ву?/ Го́ры у́бо и хо́лми, сла́дость иска́пайте днесь:/ всех бо жизнь и очище́ние/ млеко́м пита́ется,// Богоро́дица Чи́стая.
Я́же пре́жде непло́дная страна́/ зе́млю плодоно́сну ражда́ет/ и, от непло́дныя утро́бы плод свят да́вши, млеко́м пита́ет./ Чу́до стра́шно! Пита́тельница Жи́зни на́шея,/ я́же Небе́сный Хлеб во чре́ве прие́мши,// млеко́м от сосцу́ пита́ется.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас 4.
Всечестно́е Твое́ рождество́,/ Пресвята́я Де́во Чи́стая,/ А́нгелов мно́жество на Небеси́/ и челове́ческий род на земли́, ублажа́ем,/ я́ко Ма́ти была́ еси́ Творца́ всех, Христа́ Бо́га./ Того́ моля́щи о нас не преста́й, мо́лимся,/ и́же на Тя по Бо́зе упова́ние поло́жших,// Богоро́дице Всепе́тая и Неискусобра́чная.
Стихиры на стиховне
Глас 2.
Подобен: «До́ме Евфра́фов…»
Ра́дуйся, Иоаки́ме, и А́нно:/ ра́дуйтеся, я́ко ра́дости/ и спасе́ния Хода́таица,/ от непло́дове Де́ва,// нам ражда́ется.
Стих: Слы́ши, Дщи, и виждь,/ и приклони́ у́хо Твое́.
Ты еди́на земны́х/ показа́лася еси́ спасе́ние,/ я́ко ро́ждши Сло́во,/ па́че сло́ва и естества́:// тем Тя ублажа́ем.
Стих: Лицу́ Твоему́ помо́лятся/ бога́тии лю́дстии.
Отложи́, Ада́ме и Е́во,/ вся́ку печа́ль:/ Ма́ти бо Ра́дости/ от непло́дове// пресла́вно прозяба́ет днесь.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас и подобен тойже.
Храм Бо́жий,/ еди́на Богоро́дица,/ от непло́дове/ и неражда́ющия происхо́дит,// и ра́дуется Ада́м, взыва́я.
Тропарь
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.
Великая Вечерня
«Блажен муж…»
1-й антифон
Стихиры на «Го́споди, воззва́х…» (на 8)
Глас 6.
Самогласны
Днесь и́же на разу́мных Престо́лех почива́яй Бог/ Престо́л свят на земли́ Себе́ предугото́ва:/ утверди́вый му́дростию Небеса́/ Не́бо одушевле́нное человеколю́бием соде́ла,/ от неплоднаго бо ко́рене/ сад живоно́сен израсти́ нам, Ма́терь Свою́/ И́же чуде́с Бог/ и ненаде́ющихся наде́жда,// Го́споди, сла́ва Тебе́.
Сей день Госпо́день,/ ра́дуйтеся, лю́дие:/ се бо Све́та черто́г/ и кни́га Сло́ва Живо́тнаго/ из утро́бы произы́де,/ и я́же к восто́ком дверь, ро́ждшися,/ ожида́ет вхо́да Святи́теля вели́каго,/ еди́на и Еди́наго вводя́щи Христа́ во вселе́нную,// во спасе́ние душ на́ших.
А́ще и Боже́ственным хоте́нием/ све́тлыя непло́дны жены́ прозябо́ша,/ но всех Мари́я рожде́нных боголе́пно превозсия́:/ я́ко, от непло́дныя пресла́вно ро́ждшися ма́тере,/ породи́ пло́тию всех Бо́га,/ па́че естества́ от безсе́менныя утро́бы;/ еди́на дверь Единоро́днаго Сы́на Бо́жия,/ ю́же проше́д, заключе́нну сохрани́/ и, вся му́дре устро́ив, я́ко весть Сам,// всем челове́ком спасе́ние соде́ла. [Дважды]
Днесь непло́дная врата́ отверза́ются/ и дверь деви́ческая Боже́ственная предгряде́т,/ днесь плод ражда́ти благода́ть начина́ет,/ явля́ющи ми́ру Бо́жию Ма́терь,/ Еюже земна́я с Небе́сными совокупля́ются,// во спасе́ние душ на́ших. [Дважды]
Примечание: Благода́ть – церковнославянский перевод древнееврейского имени Анна.
Днесь всеми́рныя ра́дости провозвеще́ние,/ днесь возве́яша ве́три,/ спасе́ния провозве́стницы,/ естества́ на́шего разреша́ется непло́дство:/ непло́ды бо ма́ти показу́ется/ де́вствующия и по рождестве́ Зижди́телеве,/ из Нея́же чу́ждее присвоя́ет И́же естество́м Бог/ и заблу́ждшим Пло́тию спасе́ние содева́ет,/ Христо́с Человеколю́бец/ и Изба́витель душ на́ших.
Днесь непло́дная Анна ражда́ет Богоотрокови́цу,/ от всех родо́в произбра́нную/ в жили́ще всех Царя́ и Зижди́теля, Христа́ Бо́га,/ во исполне́ние Боже́ственнаго смотре́ния,/ и́мже назда́хомся, земноро́днии,/ и обнови́хомся от тли к жи́зни неконе́чней.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас тойже.
Днесь и́же на разу́мных Престо́лех почива́яй Бог/ Престо́л свят на земли́ Себе́ предугото́ва:/ утверди́вый му́дростию Небеса́/ Не́бо одушевле́нное человеколю́бием соде́ла,/ от неплоднаго бо ко́рене/ сад живоно́сен израсти́ нам, Ма́терь Свою́/ И́же чуде́с Бог/ и ненаде́ющихся наде́жда,// Го́споди, сла́ва Тебе́.
Паремии
Бытия́ чте́ние.
Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо: за́йде бо со́лнце,/ и взят от ка́мения ме́ста того́, и положи́ возгла́вие себе́, и спа на ме́сте о́ном./ И сон ви́де./ И се ле́стница, утвержде́на на земли́, ея́же глава́ досяза́ше до небе́с,/ и Ангели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней, тебе́ дам ю и се́мени твоему́./ И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки;/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́: я́ко стра́шно ме́сто сие́;/ несть сие́, но дом Бо́жий, и сия́ врата́ Небе́сная.
Проро́чества Иезеки́илева чте́ние.
Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их;/ я́ко Госпо́дь Бог Изра́илев про́йдет и́ми, и бу́дут затворе́на./ Яко Игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние.
Прему́дрость созда́ Себе́ дом и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ И́же есть безу́мен, да уклоня́тся ко Мне./ И тре́бующим ума́ рече́:/ Прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я прии́мет себе́ безче́стие,/ облича́яй же нечести́ваго опоро́чит себе́:/ обличе́ния бо нечести́вому ра́ны ему́./ Не облича́й злых, да не возненави́дят тебе́./ Облича́й прему́дра, и возлю́бит тя./ Даждь прему́дрому вину́, и прему́дрший бу́дет./ Сказу́й пра́ведному, и приложа́т приима́ти./ Нача́ло прему́дрости страх Госпо́день и сове́т святы́х ра́зум:/ разуме́ти бо зако́н по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
Стихиры на литии
Глас 1.
Самогласны
Нача́ло на́шего спасе́ния, лю́дие, днесь бысть: / се бо пронарече́нная от родо́в дре́вних/ Ма́ти и Де́ва и прия́телище Бо́жие/ от непло́дове роди́тися происхо́дит,/ цвет от Иессе́я и от ко́рене его́ жезл прозябе́./ Да ра́дуется Ада́м пра́отец,/ и Е́ва да веселя́тся ра́достию,/ се бо созда́нная от ребра́ Ада́мова дщерь и Вну́ку блажи́т я́вственне:/ роди́ся бо мне, рече́, избавле́ние,/ его́же ра́ди от уз а́довых свобожду́ся./ Да ра́дуется Дави́д, бия́ в гу́сли,/ и да благослови́т Бо́га,/ се бо Де́ва происхо́дит от утро́бы непло́дныя,/ ко спасе́нию душ на́ших.
Глас 2.
Прииди́те, любоде́вственнии вси/ и чистоты́ рачи́телие,/ прииди́те, подыми́те любо́вию де́вства похвалу́,/ от ка́мене тве́рдаго теку́щий исто́чник жи́зни/ и от безча́дствующия купину́ невеще́ственнаго Огня́,/ очища́ющаго и просвеща́ющаго ду́ши на́ша.
Что шум пра́зднующих быва́ет?/ Иоаки́м и А́нна торжеству́ют та́йно:/ ра́дуйтеся с на́ми, глаго́люще, Ада́ме и Ево, днесь,/ я́ко и́мже дре́вле преступле́нием затвори́ша рай,/ плод благосла́вен нам даде́ся,/ Богоотрокови́ца Мари́я,/ отверза́ющи его́ всем вход.
Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде А́нны сла́вныя,/ Присносу́щнаго Существа́ Боже́ственное пребыва́лище,/ Е́юже безсту́дный ад попра́ся/ и всеро́дная Е́ва в тве́рдую жизнь вво́дится./ Той досто́йно возопии́м:/ блаже́нна Ты в жена́х, и Плод чре́ва Твоего́ благослове́н.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас 8.
В благознамени́тый день пра́здника на́шего/ востру́бим духо́вною цевни́цею:/ я́же бо от Се́мене Дави́дова, днесь ражда́ется Ма́ти Живота́,/ тьму разреша́ющий Ада́мово обновле́ние, и Е́вино воззва́ние,/ и нетле́ния исто́чник, тли премене́ние,/ Ея́же ра́ди мы обожи́хомся/ и от сме́рти изба́влени бы́хом,/ и возопии́м Той с Гаврии́лом, ве́рнии:/ ра́дуйся, Благода́тная, Госпо́дь с Тобо́ю,/ Тебе́ ра́ди да́руя нам ве́лию ми́лость.
Стихиры на стиховне
Глас 4.
Самогласны
Всеми́рная ра́дость от пра́ведных возсия́ нам,/ от Иоаки́ма и А́нны, Всепе́тая Де́ва,/ я́же премно́гия ра́ди чистоты́/ храм Бо́жий одушевле́нный быва́ет/ и еди́на вои́стину Богоро́дица познава́ется./ Тоя́ моли́твами, Христе́ Бо́же,/ мир ми́ру низпосли́/ и душа́м на́шим ве́лию ми́лость.
Стих: Слы́ши, Дщи, и виждь,/ и приклони́ у́хо Твое́.
А́нгеловым прорече́нием/ плод пречи́ст от Иоаки́ма и А́нны, пра́ведников,/ днесь произы́де Де́ва,/ не́бо и престо́л Бо́жий,/ и прия́телище Чистоты́,/ ра́дость провозвеща́ющи всему́ ми́ру,/ живота́ на́шего Хода́таица,/ кля́твы отъя́тие, благослове́ния пода́ние./ Тем в рождестве́ Твое́м, Де́во Богозва́нная,/ ми́ру мир испроси́// и душа́м на́шим ве́лию ми́лость.
Стих: Лицу́ Твоему́ помо́лятся/ бога́тии лю́дстии.
Непло́ды безча́дная А́нна/ днесь рука́ми да воспле́щет све́тло,/ да свет доно́сят земна́я, ца́рие да игра́ют,/ святи́телие во благослове́ниих да́ веселя́тся,/ да пра́зднует весь мир:/ се бо Цари́ца и непоро́чная Неве́ста О́тча/ от ко́рене Иессе́ева прозябе́./ Ктому́ жены́ в печа́лех не родя́т чад:/ Ра́дость бо процвете́, и Живо́т всем челове́ком в ми́ре жи́тельствует./ И ктому́ да́ры Иоаки́мовы не возвраща́ются,/ рыда́ние бо А́нны в ра́дость преложи́ся:/ сра́дуйтеся мне, глаго́лющи, весь избра́нный Изра́иль,/ се бо даде́ ми Госпо́дь одушевле́нную пала́ту/ Боже́ственныя сла́вы Его́,/ во о́бщее весе́лие и ра́дость// и спасе́ние душ на́ших.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас 8.
Прииди́те, вси ве́рнии, к Де́ве теце́м:/ се бо ражда́ется я́же пре́жде чре́ва предви́денная Бо́га на́шего Ма́ти,/ де́вства сосу́д, Ааро́нов прозя́бший жезл от ко́рене Иессе́ева,/ проро́ческое пропове́дание/ и пра́ведных Иоаки́ма и А́нны прозябе́ние./ Ражда́ется у́бо, и мир с Не́ю обновля́ется./ Ражда́ется, и Це́рковь во свое́ благоле́пие украша́ется./ Храм святы́й, Божества́ прия́телище,/ де́вственный сосу́д, ца́рский черто́г,/ в не́мже пресла́вное неизрече́ннаго соедине́ния соше́дшихся во Христе́ есте́ств/ соверше́нное соде́яся та́инство./ Ему́же покланя́ющеся,// воспева́ем Де́вы Всенепоро́чныя рождество́.
Тропарь
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный. [Три́жды]
Утреня.
Малое славословие
Сла́ва в вы́шних Бо́гу, и на земли́ мир, в челове́цех благоволе́ние. [Трижды]
Го́споди, устне́ мои́ отве́рзеши, и уста́ моя́ возвестя́т хвалу́ Твою́. [Дважды]
Шестопсалмие
Великая ектения
Тропари на «Бог Господь…»
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный. [Дважды]
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас то́йже.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.
Седален по 1-му стихословию
Глас 4.
Подобен: «Удиви́ся Ио́сиф…»
Возопи́й, Дави́де, что кля́тся тебе́ Бог?/ Я́же мне кля́тся, рече́, и испо́лни уже́:/ от плода́ чре́ва моего́ да́вый Деви́цу,/ из Нея́же Соде́тель Христо́с, Но́вый Ада́м роди́ся, Царь на престо́ле мое́м;/ и ца́рствует днесь, име́яй Ца́рство недви́жимо./ Непло́ды ражда́ет Богоро́дицу и Пита́тельницу Жи́зни на́шея.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Возопи́й, Дави́де, что кля́тся тебе́ Бог?/ Я́же мне кля́тся, рече́, и испо́лни уже́:/ от плода́ чре́ва моего́ да́вый Деви́цу,/ из Нея́же Соде́тель Христо́с, Но́вый Ада́м роди́ся, Царь на престо́ле мое́м;/ и ца́рствует днесь, име́яй Ца́рство недви́жимо./ Непло́ды ражда́ет Богоро́дицу и Пита́тельницу Жи́зни на́шея.
Седален по 2-му стихословию
Глас 4.
Подобен: «Удиви́ся Ио́сиф…».
От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам;/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́,/ восхвали́те Ю, оте́чествия язы́к!/ Иоаки́м весели́тся, и А́нна торжеству́ет, зову́щи:/ непло́ды ражда́ет Богоро́дицу и Пита́тельницу Жи́зни на́шея.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам;/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́,/ восхвали́те Ю, оте́чествия язы́к!/ Иоаки́м весели́тся, и А́нна торжеству́ет, зову́щи:/ непло́ды ражда́ет Богоро́дицу и Пита́тельницу Жи́зни на́шея.
Величание и избранный псалом
Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим// рождество́ Твое́.
Избранный псалом.
- Помяни́, Го́споди, Дави́да и всю кро́тость его́.
- Я́ко кля́тся Го́сподеви, обеща́ся Бо́гу Иа́ковлю.
- Се, слы́шахом я во Евфра́фе, обрето́хом я в поля́х дубра́вы.
- Пресла́вная глаго́лашася о тебе́, гра́де Бо́жий.
- Бог посреде́ его́, и не подви́жится
- Кля́тся Госпо́дь Дави́ду и́стиною, и не отве́ржется ея́.
- От плода́ чре́ва Твоего́ посажду́ на престо́ле Твое́м.
- Я́ко избра́ Госпо́дь Сио́на, изво́ли его́ в жили́ще Себе́.
- Освяти́л есть селе́ние Свое́ Вы́шний.
- Святы́ня и велеле́пота во святи́ле Его́.
- Свят храм Твой, ди́вен в пра́вде.
- До́му Твоему́ подоба́ет святы́ня, Го́споди, в долготу́ дний.
- Помяну́ и́мя Твое́ во вся́ком ро́де и ро́де.
- Благослове́н Госпо́дь во век, и в век ве́ка.
Седален по полиелею
Глас 8.
Подобен: «Повеле́нное та́йно…»
Да ра́дуется Не́бо, и земля́ да весели́тся:/ Бо́жие бо не́бо на земли́ роди́ся, Богоневе́стная Сия́, от обетова́ния./ Непло́ды Младе́нца дои́т Мари́ю, и ра́дуется о рождестве́ Иоаки́м:/ жезл, глаго́ля, роди́ся мне,/ из него́же Цвет Христо́с прозябе́,/ из ко́рене Дави́дова./ Вои́стину чу́до пресла́вно!
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас тойже.
Обнови́ся, Ада́ме, ра́дуйся, Е́во, весели́ся, Дави́де, благоду́шствуй, А́нно,/ и́бо Ма́ти Зижди́теля твоего́ ражда́ется пресла́вно;/ лику́ет, обно́вльшися, вся земля́/ и ра́дуется, оде́яна во оде́жду;/ всяк язы́к, лику́я, да вопие́т Мари́и:/ блаже́н дом Дави́дов, я́ко пита́ет Пита́тельницу Жи́зни на́шея.
Степенна
1-й антифон 4-го гласа
От ю́ности моея́ / мно́зи бо́рют мя́ стра́сти, / но Сам мя́ заступи́, / и спаси́, Спа́се мой. [Дважды]
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше. [Дважды]
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Прокимен
Прокимен, глас 4: Помяну́ и́мя Твое́/ во вся́ком ро́де и ро́де.
Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви.
Евангелие
от Луки, зачало 4
От Луки свята́го Ева́нгелиа чте́ние.
Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, яко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с нею я́ко три ме́сяцы, и возврати́ся в дом Свой.Лк.1:39-49,56.
Стихира по 50-м псалме
Глас 6.
Слáва Отцу́, и Сы́ну, и Святóму Ду́ху.
Моли́твами Богоро́дицы,/ Ми́лостиве, очи́сти// мно́жество согреше́ний на́ших.
И ны́не, и при́сно, и во вéки векóв. Ами́нь.
Моли́твами Богоро́дицы,/ Ми́лостиве, очи́сти// мно́жество согреше́ний на́ших.
Поми́луй мя, Бо́же,/ по вели́цей ми́лости Твое́й/ и по мно́жеству щедро́т Твои́х// очи́сти беззако́ние мое́.
Глас тойже.
Сей день Госпо́день,/ ра́дуйтеся, лю́дие:/ се бо Све́та черто́г/ и кни́га Сло́ва Живо́тнаго/ из утро́бы произы́де,/ и я́же к восто́ком дверь, ро́ждшися,/ ожида́ет вхо́да Святи́теля вели́каго,/ еди́на и Еди́наго вводя́щи Христа́ во вселе́нную,/ во спасе́ние душ на́ших.
Каноны
Праздника — 2: ирмосы — дважды, тропари — на 12.
Песнь 1
Первый канон.
Глас 2.
Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.
Припев: Пресвята́я Богоро́дице, спаси́ нас.
Гряди́те, ве́рнии, Ду́хом Боже́ственным ра́дующеся,/ Ю́же от непло́дове днесь прише́дшую челове́ков на спасе́ние/ Присноде́ву Отрокови́цу пе́сньми почти́м.
Ра́дуйся, Чи́стая, Ма́ти и Рабо́ Христа́ Бо́га,/ я́же пе́рвому Хода́таица блаже́нству,/ челове́ческий род, Тя вси досто́йно пе́сньми сла́вим.
Жи́зни ражда́ется днесь мост,/ и́мже челове́цы, воззва́ние паде́ния, я́же от а́да, обре́тшии,/ Христа́ Жизнода́вца пе́сньми прославля́ют.
Второй канон.
Глас 8.
Ирмос: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре/ пои́м Ему́, я́ко Изба́вителю на́шему Бо́гу,// я́ко просла́вися.
Припев: Пресвята́я Богоро́дице, спаси́ нас.
Да ликовству́ет вся тварь, да весели́тся же и Дави́д,/ я́ко от коле́на и от се́мене его́ произы́де жезл,/ Цвет нося́щи, Го́спода, Творца́ вся́ческих.
Свята́я Святы́х, во святе́м святи́лищи Младе́нец возлага́ется/ воспита́тися от руки́ А́нгеловы./ Вси у́бо ве́рно спра́зднуим в рождестве́ Ея́.
Непло́ды неражда́ющая А́нна, но не безча́дна Бо́гу:/ се бо пронарече́ся от родо́в Чи́стая Де́ва Ма́ти./ Те́мже естества́ израсти́ Зижди́теля в ра́бии о́бразе.
Тя, незло́бивую А́гницу,/ А́гнца Христа́ Младе́нца от чре́ва Твоего́ приве́дшую в на́ше существо́,/ вси от А́нны рожде́нную Тя пе́сньми почита́ем.
Троичен: Три Безнача́льна сла́влю,/ Три Свя́та пою́,/ Три Соприсносу́щна в Существе́ Еди́ном пропове́дую:/ Еди́н бо во Отце́, и Сы́не, и Ду́се славосло́вится Бог.
Богородичен: Кто ви́де Отроча́, Его́же не все́я Оте́ц, млеко́м пита́емое?/ Или́ где ви́дена бысть Де́ва Ма́ти?/ Истинно па́че ума́ обоя́, Богороди́тельнице Чи́стая.
Катавасия: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу;/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие.// Тем Христу́ пои́м, Бо́гу на́шему, я́ко просла́вися.
Песнь 3
Первый канон.
Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.
Непоро́чно Бо́гу пожи́вшии,/ всех роди́сте Спасе́ние,/ богому́дрии роди́теле/ Зижди́теля Ро́ждшия и Бо́га на́шего.
Всем жизнь источа́яй Госпо́дь/ от непло́дове произведе́ Де́ву,/ в Ню́же всели́тися изво́ли,/ и по Рождестве́ сохрани́в нетле́нну.
А́ннин плод, Мари́ю, днесь,/ Грозд ро́ждшую живоно́сный,/ я́ко Богоро́дицу воспои́м,/ Предста́тельницу же всех и Помо́щницу.
Второй канон.
Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.
Воспита́вшися во Свята́я Святы́х,/ Де́во Пречи́стая Богоро́дице,/ вы́шши яви́лася еси́ тва́ри,/ Зижди́теля пло́тию поро́ждши.
Благослове́нно чре́во твое́, целому́дренная А́нно,/ плод бо израсти́ла еси́ де́вства,/ Ю́же безсе́менно Пита́теля тва́ри рождшую/ и Изба́вителя Иису́са.
Тя блажи́т, Присноде́во, вся тварь,/ от А́нны днесь ро́ждшуюся,/ от ко́рене Иессе́ева жезл,/ пречи́ст цвет, Христа́, израсти́вшую.
Тя вы́шшую всея́ тва́ри, Богоро́дице,/ показу́я, Чи́стая, Сын Твой,/ е́же от А́нны вели́чит Твое́ рождество́/ и всех весели́т днесь.
Троичен: Тебе́ покланя́емся, о́тче, Безнача́льне Существо́м,/ пое́м Безле́тнаго Сы́на Твоего́/ и чтем Соприсносу́щнаго Ду́ха Твоего́,/ я́ко Еди́наго Тро́е естество́м Бо́га.
Богородичен: Светода́вца и Нача́льника жи́зни челове́ческия ро́ждшая, Чи́стая Богоро́дице,/ яви́лася еси́ сокро́вище жи́зни на́шея/ и дверь непристу́пнаго Све́та.
Катавасия: Жезл во о́браз та́йны прие́млется,/ прозябе́нием бо предразсужда́ет свяще́нника;/ неплодя́щей же пре́жде Це́ркви,/ ны́не процвете́ Дре́во Креста́,// в держа́ву и утвержде́ние.
Седален
Глас 4.
Подобен: «Удиви́ся Ио́сиф…»
Де́ва Мари́я и Богоро́дица и́стинно,/ я́ко о́блак све́та, днесь возсия́ нам/ и от пра́ведных предгряде́т в сла́ву на́шу./ Не ктому́ Ада́м осужда́ется,/ и Ева от уз свободи́ся,/ и сего́ ра́ди зове́м, вопию́ще со дерзнове́нием еди́ней Чи́стей:/ ра́дость возвеща́ет рождество́ Твое́ всей вселе́нней.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас и подобен тойже.
Де́ва Мари́я и Богоро́дица и́стинно,/ я́ко о́блак све́та, днесь возсия́ нам/ и от пра́ведных предгряде́т в сла́ву на́шу./ Не ктому́ Ада́м осужда́ется,/ и Ева от уз свободи́ся,/ и сего́ ра́ди зове́м, вопию́ще со дерзнове́нием еди́ней Чи́стей:/ ра́дость возвеща́ет рождество́ Твое́ всей вселе́нней.
Песнь 4
Первый канон.
Ирмос: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче.
Воспева́ем Тя, Го́споди,/ ве́рным спаси́тельное приста́нище пода́вшаго всем,/ Тебе́ Ро́ждшую.
Тя, Богоневе́сто,/ похвалу́ всем Христо́с яви́ и держа́ву/ пою́щим ве́рно Твое́ та́инство.
Неискусобра́чная Влады́чице,/ Твои́ми моли́твами избавля́еми прегреше́ний,/ благоразу́мно вси Тя ублажа́ем.
Второй канон.
Ирмос: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше: от ю́га прии́дет Бог./ Сла́ва си́ле Твое́й, // сла́ва снизхожде́нию Твоему́.
Патриа́рх Иа́ков, прови́дев, Спа́се, вели́чия я́сно строе́ния Твоего́,/ вопия́ше Ду́хом, ко Иу́де глаго́ля та́йно:/ от ле́торасли возше́л еси́, Сы́не мой,/ возвеща́я Тя от Де́вы Бо́га.
Примечание: от ле́торасли – от молодой ветви.
Ны́не жезл Ааро́нов, от ко́рене Дави́дова прозя́бший,/ ны́не Де́ва Чи́стая происхо́дит,/ и сликовству́ет Не́бо и земля́, и вся оте́чествия язы́ков,/ и А́нна и Иоаки́м та́инственно.
Ны́не да веселя́тся Не́бо, да ра́дуется же земля́, и да лику́ет Иоаки́м и Дави́д:/ ов у́бо я́ко роди́тель Твой, и́стинно ро́ждшия Бо́га,/ ов же я́ко пра́отец Твой,/ пропове́дал Твоя́ вели́чествия, Чи́стая.
Сра́дуется Тебе́ днесь, богому́дренная А́нно, вселе́нная:/ Изба́вителя бо тоя́ Ма́терь процвела́ еси́,/ ю́же от ко́рене прозя́бшую Дави́дова,/ жезл си́лы, нам нося́щую Цвет, Христа́.
Троичен: Сла́влю Безнача́льна Бо́га, Отца́ и Сы́на и Свята́го Ду́ха,/ Единосу́щную Тро́ицу Несозда́нную,/ Е́йже предстоя́т Серафи́ми благогове́йно, зову́ще:/ Свят, Свят, Свят еси́, Бо́же.
Богородичен: Пребезнача́льное Нача́ло нача́ло прие́млет из Тебе́, Богороди́тельнице, плотски́м вре́менем/ и пребыва́ет собезнача́льно и вопло́щься Сло́во о́тчее и Ду́ху соприсносу́щное,/ сохраня́я Боже́ственное досто́инство.
Катавасия: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Песнь 5
Первый канон.
Ирмос: Сеннопи́санный мрак гада́ний разори́в/ и ве́рных прибы́тием и́стины,/ Богоотрокови́цею, озари́в сердца́,// и нас све́том Твои́м, Христе́, наста́ви.
Воспои́м, лю́дие, всех вину́/ су́щаго по нам бы́ти Вино́внаго:/ Ея́же о́бразу ра́довахуся сподобля́еми проро́цы,/ явле́нное спасе́ние от Тоя́ плодя́ще.
От су́ха прозябе́ние жезла́ иере́ева/ Изра́илю показа́ проразсужде́ние,/ и ны́не све́тлость прозя́бших пресла́вно све́тит,/ от непло́дове всесла́вное рожде́ние.
Второй канон.
Ирмос: Го́споди Бо́же наш/ мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// Имя Твое́ имену́ем.
Пречи́стое Твое́ рождество́, Де́ва Непоро́чная, несказа́нное,/ и зача́тие неизглаго́ланно, и рожде́ние Твое́,/ Неве́сто неневе́стная,/ Бог бо бе, весь в мя облеки́йся.
Днесь да веселя́тся а́нгельстии чи́ни,/ пе́сньми да лику́ют су́щии из Ада́ма:/ роди́ся бо жезл, Цвет возрасти́вший, Христа́,/ Еди́наго Изба́вителя на́шего.
Днесь Ева разреша́ется осужде́ния,/ разреша́ется же и непло́дство,/ и Ада́м дре́вния кля́твы о рождестве́ Твое́м,/ Тобо́ю бо от тли изба́вихомся.
Сла́ва Тебе́, Просла́вльшему непло́дную днесь:/ роди́ бо жезл присноцвету́щий от обеща́ния,/ от него́же прозябе́ Христо́с,/ Цвет жизни на́шея.
Троичен: Сла́ва Тебе́, о́тче Святы́й, Бо́же Нерожде́нне;/ сла́ва Тебе́, Сы́не Безле́тне, Единоро́дне;/ сла́ва Тебе́, Ду́ше Боже́ственный и Сопресто́льный,/ от Отца́ происходя́й и в Сы́не пребыва́яй.
Богородичен: Бысть чре́во Твое́ Со́лнца носи́ло,/ пребы́сть чистота́ Твоя́, я́коже пре́жде, невреди́ма, Де́во,/ Христо́с бо Со́лнце,/ я́ко от черто́га жени́х, яви́ся из Тебе́.
Катавасия: О треблаже́нное Дре́во,/ на не́мже распя́ся Христо́с, Царь и Госпо́дь,/ Имже паде́ дре́вом прельсти́вый,/ тобо́ю прельсти́вся,/ Бо́гу пригвозди́вшуся Пло́тию,// подаю́щему мир душа́м на́шим.
Песнь 6
Первый канон.
Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю, во гла́се хвале́ния, // и́стины же ду́хом пожру́ Тебе́.
Ко Го́споду в ско́рби непло́дства возопи́ша/ Богома́тере богому́дрии роди́тели/ и Сию́ в ро́ды родо́в роди́ша,/ на о́бщее спасе́ние и похвалу́.
Прия́ша Небе́сный дар от Бо́га досто́ин/ Богома́тере богому́дрии роди́тели,/ саме́х Херуви́мов превы́шшее носи́ло,/ Сло́ва и Зижди́теля Роди́тельницу.
Второй канон.
Ирмос: Я́ко во́ды морски́я, Человеколю́бче,/ волна́ми жите́йскими обурева́юся,/ те́мже, я́ко Ио́на, та́ко вопию́ Ти:/ возведи́ от тли живо́т мой,// Благоутро́бне Го́споди.
Святу́ю Святы́х су́щу,/ целому́дреннии роди́тели Твои́, Чи́стая,/ возложи́ша Тя в хра́ме Госпо́дни воспита́тися че́стно/ и угото́ватися в Ма́терь Ему́.
Непло́ды и ма́тери, лику́йте,/ дерза́йте и игра́йте, безча́дныя:/ безча́дна бо непло́ды Богоро́дицу прозяба́ет,/ я́же изба́вит от боле́зней Е́ву и кля́твы Ада́ма.
Слы́шу Дави́да, пою́ща Тебе́:/ приведу́тся де́вы во след Тебе́,/ приведу́тся в храм Царе́в./ И с ним Тя и аз, Дщерь Царе́ву, воспева́ю.
Пое́м свято́е Твое́ рождество́,/ чтим и непоро́чное зача́тие Твое́,/ Неве́сто Богозва́нная и Де́во;/ сла́вят же с на́ми Ангелов чи́ни и святы́х ду́ши.
Троичен: В Тебе́ Тро́ическое та́инство пое́тся и сла́вится, Чи́стая:/ Оте́ц бо благоволи́,/ и Сло́во всели́ся в Тя,/ и Боже́ственный Дух Тебе́ осени́.
Богородичен: Злата́я кади́льница была́ еси́,/ Огнь бо во утро́бе Твое́й всели́ся, Сло́во от Ду́ха Свя́та,/ и челове́ческим зра́ком в Тебе́ ви́деся,/ Богороди́тельнице Чи́стая.
Катавасия: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га// и тридне́вным Воскресе́нием мир просве́щшаго.
Кондак
Глас 4.
Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.
Икос.
Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное/ и во у́ши Госпо́дни вни́де, и прозябе́ плод живоно́сен ми́ру./ Ов бо моли́тву на горе́ творя́ше, о́ва же в саде́ поноше́ние ноша́ше,/ но с ра́достию непло́ды ражда́ет Богоро́дицу и Пита́тельницу Жи́зни на́шея.
Песнь 7
Первый канон.
Ирмос: Купина́ в горе́ огненеопа́льная и росоно́сная пещь халде́йская/ я́ве предписа́ Тя, Богоневе́сто,/ Боже́ственный бо невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших.
Твое́ в веще́ственных явле́ниих/ законополо́жник возбрани́ся разуме́ти/ и вели́кое, Пречи́стая, та́инство,/ не му́дрствовати земноре́вностная обра́зно наказу́емь иногда́./ Те́мже, уди́влься чудеси́, глаго́лаше:/ благослове́н Бог оте́ц на́ших.
Го́ру и дверь Небе́сную и мы́сленную Тя ле́ствицу/ боголе́пно лик боже́ственный пронарече́,/ от Тебе́ бо Ка́мень отсече́ся не рука́ми му́жескими,/ и дверь, Е́юже про́йде Госпо́дь, И́же чуде́с Бог оте́ц на́ших.
Второй канон.
Ирмос: Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших.
Пра́зднуем, Чи́стая,/ и ве́рно покланя́емся свято́му Твоему́ Рождеству́,/ пою́ще Сы́на Твоего́,/ И́мже изба́вихомся дре́вняго Ада́мова ны́не осужде́ния.
Ны́не А́нна весели́тся и вопие́т, хва́лящися:/ непло́ды су́щи, роди́х Бо́жию Ма́терь,/ Ея́же ра́ди осужде́ние Е́вино разреши́ся/ и я́же в печа́лех боле́знь.
Ада́м свободи́ся, и Е́ва лику́ет,/ и вопию́т ду́хом к Тебе́, Богоро́дице:/ Тобо́ю изба́вихомся перворо́дныя кля́твы,/ я́вльшуся Христу́.
О чре́во, вмести́вшее Бо́жие селе́ние! О утро́бо, носи́вшая Небе́с ши́ршую, престо́л святы́й,/ мы́сленный киво́т свяще́ния!
Троичен: Отца́ просла́вим, Сы́на и Ду́ха/ во Еди́нстве Божества́,/ Тро́ицу Пресвяту́ю, Неразде́льную, Несозда́нную,/ и Соприсносу́щную, и Единосу́щную.
Богородичен: Ты Бо́га еди́на родила́ еси́, Де́во, пресла́вно,/ Ты естество́ обнови́ла еси́ Рождество́м Твои́м, Мари́е,/ Ты Е́ву разреши́ла еси́ перворо́дныя кля́твы,/ Богороди́тельнице Чи́стая.
Катавасия: Безу́мное веле́ние мучи́теля злочести́ваго/ лю́ди поколеба́,/ ды́шущее преще́ние и злохуле́ние богоме́рзкое;/о́ба́че три о́троки не устраши́ я́рость зве́рская,/ ни огнь снеда́яй,/ но противоды́шущу росоно́сному Ду́ху, / со огне́м су́ще, поя́ху:// Препе́тый отце́в и нас Бо́же, благослове́н еси́.
Песнь 8
Первый канон.
Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия,/ Ю́же пое́м, я́вльшуюся Тобо́ю конце́м днесь,// и превозно́сим во вся ве́ки.
Я́же к Бо́гу на́шего примире́ния предопределе́нная ски́ния/ е́же бы́ти ны́не начина́ет,/ иму́щи роди́ти Сло́ва, нам дебельство́м Пло́ти я́вльшася,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.
Непло́дства преложе́ние мирско́е благи́х разреши́ непло́дство/ и я́сно чу́до Христа́ показа́, к земны́м прише́дша,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.
Второй канон.
Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.
Сотвори́вый пресла́вная непло́дней утро́бе,/ отве́рзый А́нны неражда́ющая ложесна́ и плод ей дав,/ Ты, Бо́же Святы́й, Ты, Сы́не Де́вы,/ Ты от Сея́ Плоть прия́л еси́,/ присноцвету́щия Де́вы и Богоро́дицы.
Затворя́яй бе́здну и отверза́яй ю,/ вознося́й во́ду во о́блацех и дая́й дождь,/ Ты, да́вый, Го́споди, от непло́днаго ко́рене/ прозя́бнути А́нны святы́я пречи́ст плод/ и роди́ти Богоро́дицу.
Де́лателю мы́слей на́ших/ и Насади́телю душ на́ших,/ Ты, непло́дную зе́млю благопло́дну показа́вый,/ Ты дре́вле суху́ю родови́ту, благокла́сну, бразду́ плодоно́сну соде́лал еси́ А́нну святу́ю,/ пречи́ст плод израсти́ти, Богоро́дицу.
Прииди́те, вси у́зрим,/ я́ко от черто́га ма́ла, Бо́жий град, ны́не ражда́емый,/ и́же от две́ри утробныя исхо́д иму́щую,/ вход же не ве́дущу обще́ния:/ Еди́н Бог Зижди́тель Се́ю про́йде стезе́ю стра́нною.
Благослови́м Отца́, и Сы́на, и Свята́го Ду́ха – Го́спода.
Троичен: О Тро́ице Пресу́щная, Еди́нице Собезнача́льная!/ Тя пое́т и трепе́щет мно́жество А́нгел,/ Не́бо и земля́ и бе́здны ужаса́ются,/ челове́цы благословя́т, огнь рабо́тает,/ вся послу́шают Тебе́, Тро́ице Свята́я, со стра́хом, я́же в тва́ри.
И ны́не, и при́сно, и во вéки векóв. Ами́нь.
Богородичен: О нове́йшаго слы́шания: Бог Сын Жены́!/ О безсе́меннаго Рождества́! Безму́жная Ма́ти и рожде́нное Бог!/ О ужа́снаго виде́ния! О зача́тия стра́ннаго Де́вы! О несказа́ннаго Рождества́!/ И́стинно па́че ума́ вся и виде́ния.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго// Ду́ха Всесвята́го во ве́ки.
Песнь 9
Первый канон.
Припев: Велича́й, душе́ моя́,/ пресла́вное рождество́ Бо́жия Ма́тере.
Ирмос: Я́же пре́жде Со́лнца Свети́льника Бо́га возсия́вшаго,/ пло́тски к нам прише́дшаго,/ из боку́ Деви́чу неизрече́нно воплоти́вшая,/ Благослове́нная Всечи́стая,// Тя, Богоро́дице, велича́ем.
Припев: Велича́й, душе́ моя́,/ пресла́вное рождество́ Бо́жия Ма́тере.
И́же непокори́вым лю́дем из ка́мене источи́в во́ду,/ благопокори́вым же язы́ком да́рует от чресл непло́дных плод на весе́лие нам,/ Тя, Богома́ти Пречи́стая,/ ю́же досто́йно велича́ем.
Напра́снаго дре́вняго Отъя́тельницу осужде́ния и прама́тере исправле́ние,/ Ю́же ро́да к Бо́гу вину́ присвое́ния, к Зижди́телю мост,/ Тя, Богоро́дице, велича́ем.
Второй канон.
Припев: Велича́й, душе́ моя́,/ от непло́дове ро́ждшуюся Де́ву Мари́ю.
Ирмос: Чу́жде ма́терем де́вство,/ и стра́нно де́вам деторожде́ние;/ на Тебе́, Богоро́дице,/ обоя́ устро́ишася./ Тем Тя, вся племена́ земна́я,// непреста́нно велича́ем.
Досто́йное, Богома́ти,/ Твоей чистоты́ рождество́ насле́довала еси́ чрез обеща́ние:/ иногда́ бо непло́дней богопрозябе́н плод вдала́ся еси́./ Тем Тя, вся племена́ земна́я, непреста́нно велича́ем.
Испо́лнися вопию́щаго проро́чество,/ глаго́лет бо: возста́влю ски́нию па́дшую свяще́ннаго Дави́да,/ в Тебе́, Чи́стая, прообрази́вшуюся,/ Ейже ра́ди всех челове́ков персть в Те́ло созда́ся Бо́жие.
Пелена́м покланя́емся Твои́м, Богоро́дице,/ сла́вим Да́вшаго плод пре́жде непло́дней/ и Отве́рзшаго ложесна́ неражда́ющей пресла́вно./ Твори́т бо вся, ели́ка хо́щет, Бог сый самовла́стен.
Я́ко дар Тебе́, Богоро́дице, песнопе́ние, от А́нны ро́ждшейся, ве́рно дароно́сим:/ ма́тери Ма́терь, де́вы же Де́ву еди́ну,/ славосло́вяще, покланя́емся Тебе́, пое́м и сла́вим.
Троичен: Чу́жде есть беззако́нным сла́вити Безнача́льную Тро́ицу,/ Отца́, и Сы́на же, и Свята́го Ду́ха,/ несозда́нное Вседержа́вство,/ Е́юже мир весь содержи́тся ма́нием держа́вы Ея́.
Богородичен: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́,/ Его́же пое́т вся тварь и трепе́щут вы́шнии чи́ни:/ Того́ моли́, Всечи́стая, спасти́ся душа́м на́шим.
Припев: Велича́й, душе́ моя́,/ пресла́вное рождество́ Бо́жия Ма́тере.
Припев: Велича́й, душе́ моя́,/ от непло́дове ро́ждшуюся Де́ву Мари́ю.
Катавасия: Та́ин еси́, Богоро́дице, рай,/ невозде́ланно возрасти́вший Христа́,/ и́мже кре́стное живоно́сное на земли́ насади́ся Дре́во./ Тем, ны́не возноси́му,// покланя́ющеся ему́, Тя велича́ем.
Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ прозябе́нием Чи́стыя Богома́тере,// Ю́же вся Си́лы Небе́сныя велича́ют.
Светилен
От непло́дныя днесь А́нны цвет произы́де, Богоро́дица,/ вся благово́ния Боже́ственнаго исполня́ющи концы́ ми́ра/ и ра́дости всю наполня́ющи тварь,/ ю́же пою́ще, досто́йно восхваля́ем,/ я́ко су́щу земноро́дных превы́шшую.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Ада́ме, обнови́ся, и Е́ва, возвели́чися,/ проро́цы, со апо́столы лику́йте и пра́ведными,/ о́бщая бо ра́дость возсия́ А́нгелов же и челове́ков/ от пра́ведных днесь Иоаки́ма и А́нны, Богоро́дица Мари́я.
Стихиры на хвалитех (на 4)
Глас 1.
Подобен: «О, ди́внаго чудесе́…»
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
Стих: Хвали́те Его́ на си́лах Его́,// хвали́те Его́ по мно́жеству вели́чествия Его́.
Стих: Хвали́те Его́ во гла́се тру́бнем,// хвали́те Его́ во псалти́ри и гу́слех.
О, ди́внаго чудесе́!/ Исто́чник Жи́зни/ от непло́дныя ражда́ется,/ и благода́ть плодороди́ти све́тло начина́ется,/ весели́ся, Иоаки́ме,/ Богоро́дицы быв роди́тель:/ несть ин, я́коже ты,/ земноро́дных роди́телей, богоприя́тне:/ боговмести́мая бо Отрокови́ца,/ Бо́жие селе́ние, пресвята́я гора́/ тобо́ю нам дарова́ся. [Дважды]
Стих: Хвали́те Его́ в тимпа́не и ли́це,// хвали́те Его́ во стру́нах и орга́не.
О, ди́внаго чудесе́!/ От непло́дове плод возсия́/ манове́нием всех Соде́теля и Вседержи́теля,/ до́блественно мирско́е благи́х разреши́ непло́дство./ Ма́тери с ма́терию Богоро́дичною лику́йте, зову́ще:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.
Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.
Столп целому́дрия одушевле́н/ и све́тлое прия́телище, блиста́ющееся благода́тию,/ А́нна благосла́вная я́вльшися,/ породи́ забра́ло вои́стину де́вства,/ Боже́ственное процвета́ние:/ Я́же всем де́вственным/ и де́вства жела́ющим дарова́ние,/ де́вства добро́ту я́ве подаю́щую,/ и да́рующую всем ве́рным ве́лию ми́лость.
Слáва Отцу́, и Сы́ну, и Святóму Ду́ху, и ны́не, и при́сно, и во вéки векóв. Ами́нь.
Глас 6.
Самогласен
Сей день Госпо́день,/ ра́дуйтеся, лю́дие:/ се бо Све́та черто́г/ и кни́га Сло́ва Живо́тнаго/ из утро́бы произы́де,/ и Я́же к восто́ком дверь, ро́ждшися,/ ожида́ет вхо́да Святи́теля вели́каго,/ еди́на и Еди́наго вводя́щи Христа́ во вселе́нную,/ во спасе́ние душ на́ших.
Тропарь по Великом славословии
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.
Кондак на Первом часе
Глас 4.
Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.
Божественная Литургия
Блаженны (на 8)
1-го канона песнь 3-я на 4, 2-го канона песнь 6-я, на 4)
Во Ца́рствии Твое́м помяни́ нас, Го́споди, / егда́ прии́деши во Ца́рствии Твое́м.
Блаже́ни ни́щии ду́хом, / я́ко тех есть Ца́рство Небе́сное.
Блаже́ни пла́чущии, / я́ко ти́и уте́шатся.
Блаже́ни кро́тции, / я́ко ти́и насле́дят зе́млю.
Блаже́ни а́лчущии и жа́ждущии пра́вды, / я́ко ти́и насы́тятся.
Блаже́ни ми́лостивии, / я́ко ти́и поми́ловани бу́дут.
Блаже́ни чи́стии се́рдцем, я́ко ти́и Бо́га у́зрят.
Блаже́ни миротво́рцы, я́ко ти́и сы́нове Бо́жии нареку́тся.
Блаже́ни изгна́ни пра́вды ра́ди, я́ко тех есть Ца́рство Небе́сное.
Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.
Ра́дуйтеся и весели́теся, я́ко мзда ва́ша мно́га на Небесе́х.
Сла́ва Отцу́, и Сы́ну, и Свято́му Ду́ху.
И ны́не, и при́сно, и во ве́ки веко́в. Ами́нь.
Малый вход
Прииди́те, поклони́мся и припаде́м ко Христу́./ Спаси́ ны, Сы́не Бо́жий, во святы́х ди́вен Сый, пою́щия Ти:// Аллилу́ия.
По благословению о.Настоятеля допустимо петь так:
Прииди́те, поклони́мся и припаде́м ко Христу́./ Спаси́ ны, Сы́не Бо́жий, моли́твами Богоро́дицы, пою́щия Ти:// Аллилу́ия.
Тропари по входе
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас тойже
Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.
Прокимен
Глас 3, песнь Богородицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м.
Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди.
Чтение Апостола
Ко Филипписи́ем посла́ния свясвята́го апо́стола Па́вла чте́ние.
Бра́тие, сие́ да му́дрствуется в вас, е́же и во Христе́ Иису́се. И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́, и дарова́ Ему́ и́мя, е́же па́че вся́каго и́мене. Да о и́мени Иису́сове вся́ко коле́но поклони́тся Небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с, в сла́ву Бо́га Отца́.Флп.2:5-11
Аллилуарий
Глас 8: Слы́ши, Дщи, и виждь, и приклони́ у́хо Твое́.
Стих: Лицу́ Твоему́ помо́лятся бога́тии лю́дстии.
Чтение Евангелия
от Луки, зачало 54
От Луки свята́го Ева́нгелиа чте́ние.
Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя́, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е.Лк.10:38-42;11:27-28
Перевод: В то время пришёл Иисус в одно селение; здесь женщина, именем Марфа, приняла Его в дом свой; у неё была сестра, именем Мария, которая села у ног Иисуса и слушала слово Его. Марфа же заботилась о большом угощении и, подойдя, сказала: Господи! или Тебе нужды нет, что сестра моя одну меня оставила служить? скажи ей, чтобы помогла мне. Иисус же сказал ей в ответ: Марфа! Марфа! ты заботишься и суетишься о многом, а одно только нужно; Мария же избрала благую часть, которая не отнимется у неё. Когда же Он говорил это, одна женщина, возвысив голос из народа, сказала Ему: блаженно чрево, носившее Тебя, и сосцы, Тебя питавшие! А Он сказал: блаженны слышащие слово Божие и соблюдающие его.Лк.10:38-42;11:27-28
Задостойник
Припев: Велича́й, душе́ моя́,/ пресла́вное рождество́ Бо́жия Ма́тере.
Ирмос, глас 8: Чу́жде ма́терем де́вство,/ и стра́нно де́вам деторожде́ние;/ на Тебе́, Богоро́дице,/ обоя́ устро́ишася./ Тем Тя, вся племена́ земна́я,// непреста́нно велича́ем.
Причастен
Ча́шу спасе́ния прииму́, и и́мя Госпо́дне призову́.
Концерты
Славление
Тропарь и кондак
Глас 4.
Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас тойже
Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.
Величание
Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим// рождество́ Твое́.
- Минея. 8-е сентября. Рождество Пресвятыя Владычицы нашея Богородицы и Приснодевы Марии [электронный ресурс] / Азбука веры.
- Певческая хрестоматия на материале православных церковных песнопения XIX и XX веков [нотный сборник] / Редактор-составитель: В.В.Пономарёв, Красноярская государственная академия музыки и театра, Кафедра теории музыки и композиции, Красноярский Православный фонд, 2005, стр. 80.
- Песнопения двунадесятых праздников. Сретение Господне [нотный сборник] / Москва, Фонд «Живоносный источник», стр.: 148-149.