Введение во храм Пресвятой Владычицы нашей Богородицы и Приснодевы Марии

Главная страница · Праздники

Малая Вечерня

Стихиры на «Го́споди, воззва́х…» (на 4)

Глас 1.
Подобен: «Небе́сных чино́в…»

От Го́спода прии́мше обеща́ния плод,/ Иоаки́м и А́нна Бо́жию Ма́терь,/ благоприя́тную же́ртву, в храм введо́ша днесь,// и Заха́рия, вели́кий архиере́й, благослови́в, прия́т. [Дважды]

Святы́х свята́я во святы́х обита́ти досто́йно введе́ся,/ я́ко Богоприя́тна же́ртва./ И Сию́ де́вы, доброде́тельми благоукраша́емы,/ впреди́ свещенося́ще, приведо́ша Го́споду,// я́коже сосу́д свяще́ннейший.

Да отве́рзется дверь Богоприя́тнаго хра́ма:/ храм бо всех Царя́ и Престо́л,/ днесь со сла́вою внутрь прие́м,/ Иоаки́м возлага́ет, освяти́в Го́споду// от Него́ избра́нную в Ма́терь Его́.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас 8.

Дави́д провозглаша́ше Тебе́, Пречи́стая,/ прови́дя освяще́ние вхо́да Твоего́, в храм,/ в не́мже концы́, днесь пра́зднующе,/ славосло́вят Тя, Всепе́тая:/ я́же бо пре́жде Рождества́ Де́ва/ и по Рождестве́ пребы́вши нетле́нна, Ма́ти Сло́ва Жи́зни./ Днесь в хра́ме Заха́рия весели́тся, восприе́м Тя, Влады́чице,/ и свята́я святы́х ра́дуются,/ подъе́мши Тя, исто́чника жи́зни на́шея./ Те́мже и мы псало́мски вопие́м Ти:/ о нас моли́ Сы́на Твоего́ и Бо́га на́шего// дарова́ти нам ве́лию ми́лость.

Стихиры на стиховне

Глас 2.
Подобен: «До́ме Евфра́фов…»

Две́ри Небе́сныя, приими́те Де́ву/ во свята́я святы́х,// и нескве́рную же Ски́нию Бо́га Вседержи́теля.

Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.

Де́вственнии ли́цы, Чи́стую прие́млите Де́ву,/ све́тло свещенося́ще во свята́я святы́х,// я́ко Неве́сту Бо́га Всецаря́.

Стих: Приведу́тся в весе́лии и ра́довании,/ введу́тся в храм Царе́в.

Хлеб слове́сный Черто́г Бо́жия Сло́ва/ из руки́ Боже́ственнаго А́нгела// прие́млет, обита́ющи во свята́я святы́х.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас и подобен тойже.

Свет Тя Трисиянный,/ вже́гши, Богоро́дице, в хра́ме сла́вы,// Небе́сную Ти пи́щу посыла́ет, велича́я Тя.

Тропарь

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния// Зижди́телева исполне́ние.

Великая Вечерня

«Блаже́н муж…»
1-й антифон

Стихиры на «Го́споди, воззва́х…» (на 8)

Глас 1.
Подобен: «О, ди́внаго чудесе́!»

Днесь, ве́рнии, ликовству́им,/ во псалме́х и пе́снех Го́сподеви пою́ще/ и чту́ще Того́ свяще́нную Сень,/ одушевле́нный Киво́т, невмести́мое Сло́во вмести́вшую:/ приво́дится бо Го́сподеви,/ па́че естества́ пло́тию младе́нствующи,/ и святи́тель вели́кий Заха́рия/ прие́млет с весе́лием Сию́,// я́ко Бо́жие Жили́ще.

Днесь храм одушевле́нный святы́я сла́вы/ Христа́ Бо́га на́шего,/ еди́на в жена́х Благослове́нна Чи́стая,/ приво́дится в храм зако́нный жи́ти во святы́х;/ и ра́дуются с Не́ю Иоаки́м и А́нна ду́хом,/ и де́вственнии ли́цы Го́сподеви пою́т,// псало́мски воспева́юще и чту́ще Ма́терь Его́.

Ты – проро́ков пропове́дание,/ апо́столов сла́ва, и му́чеников похвала́,/ и всех земноро́дных обновле́ние,/ Де́во Ма́ти Бо́жия:/ Тобо́ю бо Бо́гу примири́хомся./ Те́мже чтим Твое́ в храм Госпо́день вхожде́ние/ и со А́нгелом вси пе́сненно,/ ра́дуйся, Тебе́, Пречи́стая, вопие́м,// Твои́ми моли́твами спаса́емии.

Глас 4.
Подобен: «Я́ко до́бля…»

Во святы́х свята́я, Свята́я и Непоро́чная, Святы́м Ду́хом вво́дится/ и святы́м А́нгелом пита́ется,/ су́щи святе́йший храм Свята́го Бо́га на́шего,/ вся́ческая освяти́вшаго вхо́дом Ея́/ и обожи́вшаго естество́ земны́х попо́лзшееся. [Дважды]

Отрокови́цы, ра́дующеся и свещи́ иму́ще,/ Свещи́ днесь предхо́дят разу́мней/ и вво́дят Сию́ во свята́я святы́х свяще́нно,/ проявля́юще хотя́щую Зарю́ неизрече́нно из Нея́ возсия́ти/ и просвети́ти во тьме седя́щия неве́дения Ду́хом.

Веселя́ся, приими́, Заха́рие,/ возопи́ А́нна всехва́льная,/ Ю́же пропове́даша Бо́жии проро́цы Ду́хом,/ и Сию́ введи́ во святы́й храм свяще́нно воспита́тися,/ я́ко да бу́дет Влады́ки всех Боже́ственный престо́л,/ и пала́та, и одр, и светоза́рное оби́телище.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас 8.

По рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х, я́ко освяще́нна;/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́./ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и Нескве́рная,/ я́же на Небеси́ и на земли́ сла́вима,// Ма́ти Бо́жия, спаси́ род наш.

Паремии

Исхо́да чте́ние.

Глаго́ла Госпо́дь к Моисею, глаго́ля:/ в день еди́н ме́сяца пе́рваго/ поста́виши ски́нию свиде́ния,/ и вложи́ши киво́т, и покры́еши его́ заве́сою./ И внесе́ши трапе́зу и свети́льник ея́,/ и положи́ши кади́льницу злату́ю,/ во е́же кади́ти пред киво́том свиде́ния./ И положи́ши покро́в заве́сы над две́рми ски́нии свиде́ния./ И во́змеши еле́й пома́зания и пома́жеши ски́нию/ и вся, я́же в ней, и освяти́ши ю/ и вся сосу́ды ея́, и бу́дет свята́./ И освяти́ши же́ртвенник, и бу́дет же́ртвенник свята́я святы́х./ И сотвори́ Моисе́й вся,/ ели́ка запове́да ему́ Госпо́дь Бог Святы́й Изра́илев./ И покры́ о́блак ски́нию свиде́ния,/ и сла́вы Госпо́дни испо́лнися ски́ния./ И не можа́ше Моисе́й вни́ти в ски́нию свиде́ния,/ я́ко осеня́ше над не́ю о́блак,/ и сла́вы Госпо́дни испо́лнися ски́ния.

Царств тре́тиих чте́ние.

Бысть, я́ко соверши́ Соломо́н е́же созда́ти дом Госпо́день./ И собра́ вся ста́рцы Изра́илевы в Сио́н/ вознести́ киво́т заве́та Госпо́дня из гра́да Дави́дова,/ сей есть Сио́н./ И взя́ша свяще́нницы киво́т заве́та Госпо́дня,/ и ски́нию свиде́ния, и вся сосу́ды святы́я,/ я́же в ски́нии свиде́ния./ И царь, и весь Изра́иль пред киво́том./ И внесо́ша свяще́нницы киво́т заве́та Госпо́дня на ме́сто его́,/ в дави́р хра́ма, во свята́я святы́х, под кри́ла Херуви́мов./ Я́ко Херуви́ми бя́ху распросте́рты крила́ми над ме́стом киво́та,/ и покрыва́ху Херуви́ми над киво́том/ и над свята́я его свы́шше./ И не бе в киво́те, кроме́ двух скрижа́лей заве́та,/ я́же положи́ та́мо Моисе́й в Хори́ве, я́же завеща́ Госпо́дь./ И бысть, я́ко изыдо́ша свяще́нницы от свята́го,/ и о́блак испо́лни дом./ И не возмого́ша свяще́нницы ста́ти служи́ти от лица́ о́блака,/ я́ко испо́лнися сла́вы дом Го́спода Бо́га Вседержи́теля.

Проро́чества Иезеки́илева чте́ние.

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо до́му,/ и ви́дех,/ и се́ испо́лнь сла́вы дом Госпо́день.

Стихиры на литии

Глас 1.

Да ра́дуется днесь Не́бо свы́ше,/ и о́блацы весе́лие да кропя́т/ о зело́ пресла́вных вели́чиих Бо́га на́шего:/ се бо Дверь, на восто́ки зря́щая,/ ро́ждшися от непло́дове безпло́дныя по обетова́нию/ и Бо́гу освяще́на бы́вши в жили́ще,/ днесь в храм я́ко непоро́чное приноше́ние приво́дится,/ да ра́дуется Дави́д, бряца́я в гу́сли:/ приведу́тся, рече́, Царю́ де́вы в след Ея́,/ бли́жния Ея́ приведу́тся внутрь ски́нии Бо́жия,/ внутрь очисти́лища Его́,/ воспита́тися в жили́ще/ пре́жде век от Отца́ нетле́нно Ро́ждшагося// во спасе́ние душ на́ших.

Глас 4.

Днесь Боговмести́мый храм, Богоро́дица,/ в храм Госпо́день приво́дится,/ и Заха́рия Сию́ прие́млет:/ днесь свята́я святы́х ра́дуются,/ и лик А́нгельский та́инственно торжеству́ет./ С ни́миже и мы, пра́зднующе днесь, с Гаврии́лом возопии́м:/ ра́дуйся, Благода́тная, Госпо́дь с Тобо́ю,// име́яй ве́лию ми́лость.

Прииди́те, вси ве́рнии,/ еди́ну Непоро́чную восхва́лим,/ от проро́ков пропове́данную и в храм приведе́нную,/ пре́жде век пронарече́нную Ма́терь/ и в после́дняя ле́та я́вльшуюся Богоро́дицу./ Го́споди, моли́твами Ея́// мир Твой пода́ждь нам и ве́лию ми́лость.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Глас 5.

Возсия́ день ра́достен/ и пра́здник всече́стен:/ днесь бо я́же пре́жде Рождества́ и по Рождестве́ Де́ва пребы́вши,/ в храм Госпо́день приво́дится,/ и ра́дуется Заха́рия ста́рец, роди́тель Предте́чев,/ и вопие́т ве́село:/ прибли́жися, Предста́тельница скорбя́щих,/ в храм святы́й, я́ко Свята́,/ освяти́тися во оби́телище Всецаря́./ Да весели́тся Иоаки́м пра́отец, и А́нна да ра́дуется,/ я́ко принесо́ша Бо́гу я́ко триле́тствующую Ю́ницу/ непоро́чную Влады́чицу./ Ма́тери, сра́дуйтеся, де́вы, взыгра́йте,/ и непло́ды, сликовству́йте,/ я́ко отве́рзе нам Небе́сное Ца́рство пронарече́нная Всецари́ца,// ра́дуйтеся, лю́дие, и весели́теся.

Стихиры на стиховне

Глас 5.
Подобен: «Ра́дуйся…»

Ра́дуйся, Не́бо и земля́,/ Не́бо У́мное гряду́щее зря́ще,/ в Боже́ственный дом воспита́тися че́стно,/ Де́ву еди́ну и непоро́чную,/ к Не́йже, дивя́ся, Заха́рия вопия́ше:/ Две́ре Госпо́дня, хра́ма отверза́ю Тебе́ две́ри,/ ра́дующися, в нем ликовству́й,/ позна́х бо и ве́ровах,/ я́ко уже́ избавле́ние прии́дет проявле́нно Изра́илево/ и роди́тся из Тебе́ Бог Сло́во,// да́руяй ми́рови ве́лию ми́лость.

Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.

А́нна Боже́ственная благода́ть я́ве,/ от благода́ти да́нную, чи́стую Присноде́ву/ приво́дит с весе́лием в храм Бо́жий,/ призва́вши ити́ пред Не́ю отрокови́цам,/ свещи́ нося́щим, и глаго́лющи:/ пойди́, Ча́до,/ Да́вшему Тя бу́ди возложе́ние и благово́нный фимиа́м./ Вни́ди в незаходи́мая, и уве́ждь та́йны,/ и угото́вися бы́ти Иису́сово вмести́лище, весе́лое и кра́сное,// подаю́щаго ми́ру ве́лию ми́лость.

Стих: Приведу́тся в весе́лии и ра́довании,/ введу́тся в храм Царе́в.

Внутрь в храм Бо́жий/ Боговмести́мый храм возлага́ется, Де́ва Всесвята́я,/ и отрокови́цы Ей ны́не, свещи́ нося́ще, предхо́дят./ Игра́ет роди́телей сопряже́ние изря́дное,/ Иоаки́м же и А́нна, ликовству́юще,/ я́ко роди́ша Творца́ ро́ждшую,/ Я́же ликовству́ющи в Боже́ственных ски́ниих/ и пита́ема руко́ю А́нгеловою, Всенепоро́чная,/ Христа́ яви́ся Ма́ти,// Подаю́щаго ми́ру ве́лию ми́лость.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас 6.

Днесь собо́ри ве́рных, соше́дшеся,/ духо́вне да торжеству́им/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъизбра́нну от всех родо́в,/ во оби́телище всех Царя́ Христа́ и Бо́га:/ де́вы, свещи́ нося́ще, предъиди́те,/ Присноде́вы чту́ще честно́е происхожде́ние,/ ма́тери, печа́ль всю отложи́вше,/ ра́достно спосле́дствуйте Ма́тери Бо́га быва́ющей/ и ра́дости ми́ра Хода́таице./ Вси у́бо ра́достно,/ е́же ра́дуйся, со А́нгелом возопии́м Обра́дованней,// при́сно моля́щейся о душа́х на́ших.

Тропарь

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния// Зижди́телева исполне́ние. [Три́жды]

Утреня.

Малое славословие

Сла́ва в вы́шних Бо́гу, и на земли́ мир, в челове́цех благоволе́ние. [Трижды]

Го́споди, устне́ мои́ отве́рзеши, и уста́ моя́ возвестя́т хвалу́ Твою́. [Дважды]

Шестопсалмие

Великая ектения

Тропари на «Бог Господь…»

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния// Зижди́телева исполне́ние. [Дважды]

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас то́йже.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния// Зижди́телева исполне́ние.

Седален по 1-му стихословию

Глас 1.
Подобен: «Лик А́нгельский…».

Пра́ведных плод, Иоаки́ма и А́нны, прино́сится Бо́гу во святи́лище свято́е,/ пло́тию младе́нствующи, Пита́тельница Жи́зни на́шея,/ Ю́же благослови́ свяще́нный Заха́рия:// Сию́ вси я́ко Ма́терь Бо́жию ве́рно да ублажи́м.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Пра́ведных плод, Иоаки́ма и А́нны, прино́сится Бо́гу во святи́лище свято́е,/ пло́тию младе́нствующи, Пита́тельница Жи́зни на́шея,/ Ю́же благослови́ свяще́нный Заха́рия:// Сию́ вси я́ко Ма́терь Бо́жию ве́рно да ублажи́м.

Седален по 2-му стихословию

Глас 4.
Подобен: «Удиви́ся Ио́сиф…».

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние:/ в Боже́ственнем же хра́ме, я́ко су́що Боже́ственный храм,/ от младе́нства чи́сте, со свеща́ми све́тлыми отдана́ бы́вши,/ яви́лася еси́ Прия́телище Непристу́пнаго и Боже́ственнаго Све́та./ Вели́ко вои́стинну предше́ствие Твое́,// еди́на Богоневе́сто и Присноде́во.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние:/ в Боже́ственнем же хра́ме, я́ко су́що Боже́ственный храм,/ от младе́нства чи́сте, со свеща́ми све́тлыми отдана́ бы́вши,/ яви́лася еси́ Прия́телище Непристу́пнаго и Боже́ственнаго Све́та./ Вели́ко вои́стинну предше́ствие Твое́,// еди́на Богоневе́сто и Присноде́во.

Величание и избранный псалом

Велича́ем Тя,/ Пресвята́я Де́во,/ Богоизбра́нная Отрокови́це,/ и чти́м е́же в храм Госпо́день// вхожде́ние Твое́.

Псалом избранный.

1. Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́.
2. Благокоре́нным ра́дованием всея́ земли́./ Пресла́вная глаго́лашася о тебе́, гра́де Бо́жий.
3. Град Царя́ вели́каго.
4. Я́коже слы́шахом, та́ко и ви́дехом.
5. Во гра́де Го́спода сил, во гра́де Бо́га на́шего.
6. Бог основа́ и в век.
7. Освяти́л есть селе́ние Свое́ Вы́шний.
8. Святы́ня и великоле́пие во святи́ле Его́.
9. Свят храм Твой, ди́вен в пра́вде.
10. Сия́ врата́ Госпо́дня, пра́веднии вни́дут в ня.
11. Предста́ Цари́ца одесну́ю Тебе́.
12. В ри́зах позлаще́нных оде́яна, преиспещре́на.
13. Лицу́ Твоему́ помо́лятся бога́тии лю́дстии.
14. Дще́ри царе́й в че́сти Твое́й.
15. Вся сла́ва Дще́ре Царе́вы внутрь.
16. Ря́сны златы́ми оде́яна и преиспещре́на.
17. Приведу́тся Царю́ де́вы в след Ея́.
18. Бли́жняя Ея́ приведу́тся Тебе́.
19. Приведу́тся в весе́лии и ра́довании, введу́тся в храм Царе́в.
20. Слы́ши Дщи и виждь, и приклони́ у́хо Твое́.
21. И забу́ди лю́ди Твоя́, и дом отца́ Твоего́.
22. И возжела́ет Царь добро́ты Твоея́.
23. Помяну́ и́мя Твое́ во вся́ком ро́де и ро́де.
24. Восприя́хом, Бо́же, ми́лость Твою́, посреде́ люде́й Твои́х.
25. Сего́ ра́ди лю́дие испове́дятся Тебе́ в век, и в век ве́ка.

Седален по полиелеи

Глас 8.
Подобен: «Повеле́нное та́йно…»

Да ра́дуется Дави́д песнопи́сец,/ и да ликовству́ет Иоаки́м со А́нною,/ я́ко плод святы́й из них произы́де,/ Мари́я светоно́сная, Боже́ственная свеща́,/ и ра́дуется, входя́щи в храм,/ Ю́же и, зря, благослови́ Варахи́ин сын/ и, ра́дуяся, взыва́ше:// ра́дуйся, Чу́до всеми́рное.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Да ра́дуется Дави́д песнопи́сец,/ и да ликовству́ет Иоаки́м со А́нною,/ я́ко плод святы́й из них произы́де,/ Мари́я светоно́сная, Боже́ственная свеща́,/ и ра́дуется, входя́щи в храм,/ Ю́же и, зря, благослови́ Варахи́ин сын/ и, ра́дуяся, взыва́ше:// ра́дуйся, Чу́до всеми́рное.

Степенна
1-й антифон 4-го гласа

От ю́ности моея́ / мно́зи бо́рют мя́ стра́сти, / но Сам мя́ заступи́, / и спаси́, Спа́се мой. [Дважды]

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше. [Дважды]

Сла́ва Отцу́, и Сы́ну, и Свято́му Ду́ху.

Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

И ны́не и при́сно, и во ве́ки веко́в. Ами́нь.

Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен

Прокимен, глас 4: Слы́ши, Дщи, и виждь, и приклони́ у́хо Твое́.

Стих: Отры́гну се́рдце мое сло́во бла́го, глаго́лю аз дела́ моя Царе́ви.

Евангелие
от Луки, зачало 4

От Луки свята́го Ева́нгелиа чте́ние.

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, яко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с нею я́ко три ме́сяцы, и возврати́ся в дом Свой.^{Лк.1:39-49,56.}

Стихира по 50-м псалме

Глас 2.

Слáва Отцу́ и Сы́ну и Святóму Ду́ху.

Днесь храм одушевле́нный и Вели́каго Царя́/ в храм вхо́дит/ Тому́ угото́ватися в Боже́ственное жили́ще.// Лю́дие, весели́теся.

И ны́не и при́сно и во вéки векóв. Ами́нь.

Днесь храм одушевле́нный и Вели́каго Царя́/ в храм вхо́дит/ Тому́ угото́ватися в Боже́ственное жили́ще.// Лю́дие, весели́теся.

Поми́луй мя, Бо́же,/ по вели́цей ми́лости Твое́й/ и по мно́жеству щедро́т Твои́х// очи́сти беззако́ние мое́.

Глас 4.

Днесь Боговмести́мый храм, Богоро́дица,/ в храм Госпо́день приво́дится,/ и Заха́рия Сию́ прие́млет;/ днесь свята́я святы́х ра́дуются,/ и лик А́нгельский та́инственно торжеству́ет./ С ни́миже и мы, пра́зднующе днесь,/ с Гаврии́лом возопии́м:/ ра́дуйся, Благода́тная, Госпо́дь с Тобо́ю,// име́яй ве́лию ми́лость.

Канон
Праздника — 2: ирмосы — дважды, тропари — на 12.

Песнь 1.

Первый канон.
Краегранесие: «Ты благода́ть, Влады́чице, сло́ву даждь».

Глас 4.

Ирмос: Отве́рзу уста́ моя,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ вхожде́ние.

Припев: Пресвята́я Богоро́дице, спаси́ нас.

Прему́дрости, Пречи́стая, Тя сокро́вище ве́мы и благода́ти,/ точа́щую исто́чник приснотеку́щий ра́зума,/ про́сим: Твоя́ ка́пли одожди́, Влады́чице, е́же воспева́ти Тя при́сно.

Превы́шши, Пречи́стая, Небе́с бы́вши, храм и пала́та,/ в храм Бо́жий возложи́лася еси́/ Тому́ угото́ватися в Боже́ственное жили́ще прише́ствия Его́.

Свет возсия́вши Богоро́дица благода́ти,/ вся просвети́ и совокупи́ пресве́тлое Ея́ украси́ти торжество́ пе́сньми:/ прииди́те, к Ней стеце́мся.

Дверь сла́вная, по́мыслы непроходи́мая,/ две́ри отве́рзши хра́ма Бо́жия,/ ны́не повелева́ет нам, совше́дшим,/ Боже́ственных Ея́ чуде́с наслади́тися.

Второй канон.

Глас 1.

Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою// и спа́сшему Изра́иля, я́ко просла́вися.

Припев: Пресвята́я Богоро́дице, спаси́ нас.

Стеце́мся днесь, Богоро́дицу почита́юще пе́сньми,/ и торжеству́им духо́вный пра́здник:/ в храм бо Бо́гу дар прино́сится.

Пе́сньми да воспои́м Богоро́дицы сла́вное предше́ствие:/ к хра́му бо днесь, я́ко храм Бо́жий,/ прино́сится проро́чески дар многоце́нный.

А́нна непоро́чная ра́довашеся,/ я́ко дар многоце́нен Бо́гу принося́щи в храм ма́терски,/ Иоаки́м же с не́ю торжеству́ет све́тло.

Дави́д, пра́отец Твой, воспе́ Тя дре́вле, Де́во Богоневе́сто,/ Дщерь глаго́ля Тя Царя́ Христа́,/ Его́же и, роди́вши, ма́терски Младе́нца дои́ла еси́.

Пло́тию триле́тствующи, Богоро́дица Го́споду прино́сится;/ Заха́рия же Сию́, свяще́нник Бо́жий, прие́м,/ ра́дуяся, в храм возложи́.

Де́вы, ликовству́йте,/ свещено́сицы, начни́те днесь,/ и ма́тери, воспо́йте Цари́це Ма́тери,/ приходя́щей в храм Царя́ Христа́.

Троичен: Тро́ице Единосу́щная,/ О́тче, и Сло́ве, и Ду́ше Святы́й,/ Тя ве́рно сла́вим, я́ко Творца́ всех,/ и Тебе́ вопие́м благоче́стно:/ спаси́ ны, Бо́же.

Богородичен: От ба́гра крове́й Твои́х, червлени́цею, Пречи́стая, оде́явся,/ проше́д, обнови́ Царь и Бог род весь челове́ческий благоутро́бием Свои́м.

Катавасия: Христо́с ражда́ется – сла́вите,/ Христо́с с Небе́с – сря́щите./ Христо́с на земли́ – возноси́теся./ По́йте Го́сподеви, вся земля́,/ и весе́лием воспо́йте, лю́дие,// я́ко просла́вися.

Песнь 3.

Первый канон.

Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м// венце́в сла́вы сподо́би.

Невестокраси́тель днесь яви́ся кра́сный Де́вы храм и черто́г,/ прие́м одушевле́нный черто́г Бо́жий,/ Чи́стую, и Непоро́чную, и Светле́йшую всея́ тва́ри.

Дави́д, предначина́я ликова́ние, игра́ет, и ликовству́ет с на́ми,/ и Цари́цу зове́т Тя укра́шену, Пречи́стая,/ предстоя́щу, Всечи́стая, в хра́ме Царю́ и Бо́гу.

Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́:/ Богоро́дица днесь приводи́ма в дом Бо́жий.

Игра́ют А́нгельская во́инства и всех челове́к мно́жество,/ и пред лице́м, Пречи́стая, предтеку́т Твои́м днесь свещено́сицы,/ зову́ще вели́чествия Твоя́ в дому́ Бо́жии.

Второй канон.

Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Торжеству́им, празднолю́бцы, и сра́дуемся ду́хом/ во святе́м пра́зднице, учрежда́ющеся днесь, Дще́ре Царе́вы/ и Ма́тере Бо́га на́шего.

Иоаки́ме, ра́дуйся днесь,/ и весели́ся, А́нно, ду́хом,/ рожде́нную из вас Го́споду приводя́ще триле́тствующу,/ я́ко Ю́ницу Чи́сту Всенепоро́чную.

Бо́жие селе́ние во храм святы́й приво́дится, Богоро́дица Мариа́м,/ пло́тию триле́тствующая,/ и Той свещесве́тят де́вы, предтеку́ще.

Бо́жия А́гница небла́зненная и голуби́ца нескве́рная,/ Боговмести́мая ски́ния, сла́вы освяще́ние,/ в ски́нии святе́й обита́ти избра́.

Триле́тствующая те́лом и многоле́тствующая ду́хом,/ ши́ршая Небе́с и Го́рних сил превы́шшая,/ да восхва́лится пе́сньми Богоневе́стная.

Богоро́дицы пра́зднующе в невходи́мых предше́ствие,/ свещеиму́ще у́мно с весе́лием,/ днесь и мы с де́вами к хра́му прибли́жимся.

Свяще́нницы Бо́жии,/ облецы́теся в пра́вду благода́тию и сря́щите све́тло,/ вхо́ды подаю́ще Дще́ри Царя́ и Бо́га во свята́я.

Троичен: Свет Оте́ц, Свет Сын Его́, Свет Дух Уте́шительный:/ я́ко от Со́лнца бо Еди́наго Тро́ицы, сия́юще,/ Боже́ственно озаря́ет и соблюда́ет ду́ши на́ша.

Богородичен: Тя проро́цы пропове́даша киво́т, Чи́стая, святы́ни,/ кади́льницу злату́ю, и све́щник, и трапе́зу,/ и мы, я́ко Боговмести́мую ски́нию, воспева́ем Тя.

Катавасия: Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ свят еси́, Го́споди.

Седален

Глас 4.
Подобен: «Удиви́ся Ио́сиф…»

Возопи́й, Дави́де,/ что сей настоя́щий пра́здник,/ Ю́же воспе́л еси́ иногда́ в кни́зе псало́мстей,/ я́ко Дщерь Богоотрокови́цу и Де́ву./ Приведу́тся, рече́, Царю та́инственно де́вы во след Ея́ и бли́жния Ея́./ И ди́вен соде́лай и всеми́рен пра́здник зову́щим:/ Богоро́дица нам предста́, спасе́ния Хода́таица.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас и подобен тойже.

Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.

Песнь 4.

Первый канон.

Ирмос: Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.

Дверь непрохо́дную Бо́жий дом прие́мля днесь,/ преста́ти сотвори́ вся́кой слу́жбе зако́нной,/ я́ко и́стинно яви́ся, зовы́й,/ су́щим на земли́ И́стина.

Гора́ присе́нная, ю́же прови́де дре́вле Авваку́м,/ предпропове́да внутрь вмести́вшуюся в нехо́дных хра́ма,/ доброде́тели процве́тши, и покрыва́ет концы́.

Ви́девши пресла́вная вся земли́ стра́нныя же и ди́вныя ве́щи,/ ка́ко Де́ва, от А́нгела пи́щу прие́млющи,/ о́бразы строе́ния но́сит.

Храм, и пала́та, и Не́бо одушевле́нное я́вльшися, Богоневе́сто Царе́ва,/ во храм зако́нный приводи́ма днесь,/ Тому́ соблюда́ема, Пречи́стая.

Второй канон.

Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Проро́че Иса́ие, прорцы́ нам,/ Де́ва кто есть, иму́щая во чре́ве?/ Я́же из Иу́дина ко́рене прозя́бши/ и ро́ждшися из Дави́да царя́,/ се́мене свята́го плод благосла́вный.

Начина́йте, де́вы, и воспо́йте пе́сни,/ рука́ми держа́ще свещи́, Чи́стыя Богоро́дицы предше́ствие хва́ляще,/ ны́не гряду́щия во храм Бо́жий, ку́пно с на́ми пра́зднующе.

Иоаки́ме и А́нно, весели́теся ны́не,/ во храм приводя́ще Госпо́день Чи́стую Бо́га Ма́терь Христа́ Всецаря́ бу́дущую,/ от вас же ро́ждшуюся, я́ко триле́тствующую Ю́ницу.

Свята́я святы́х су́щи, Чи́стая,/ во храм святы́й возлюби́ла еси́ всели́тися/ и, со А́нгелы, Де́во, бесе́дующи, пребыва́еши,/ пресла́вне с Небе́с хлеб прие́млющи, Пита́тельнице Жи́зни.

Ро́ждше па́че наде́жди Пречи́стую Де́ву,/ благочести́во обеща́хуся Бо́гу принести́/ и исполня́ют, даю́ще я́ко же́ртву, рожде́нную от них,/ Иоа́ким днесь и А́нна, в дом Бо́жий.

Прозябе́ жезл иногда́ Ааро́нов,/ прообразу́ющий, Чи́стая, Боже́ственное Рождество́,/ я́ко безсе́менно зачне́ши, и нетле́нна пребу́деши,/ и по рождестве́ де́вствующи яви́шися,/ Младе́нца пита́ющи – всех Бо́га.

Де́вы – Де́ву, и ма́тери – Ма́терь/ благоче́стно стецы́теся почти́ти с на́ми ро́ждшуюся/ я́ко непоро́чную же́ртву и рожде́нную Бо́гу плодоноси́мую,/ вси у́бо све́тло пра́зднуем.

Троичен: Тро́ицу Ли́цы, Еди́ницу о́бразом,/ благоче́стно сла́вим Бо́га И́стинна,/ Его́же пою́т А́нгельская и Арха́нгельская чинонача́лия я́ко тва́ри Влады́ку,/ и челове́цы ве́рно, покланя́ющеся при́сно.

Богородичен: Моли́ непреста́нно, Пресвята́я Чи́стая,/ Его́же пло́тию родила́ еси́, Сы́на Твоего́ и Бо́га,/ от многообра́зных се́тей диа́волих и от вся́ких искуше́ний находя́щих вся изба́вити рабы́ Твоя.

Катавасия: Жезл из ко́рене Иессе́ева/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи,/ прише́л еси́, вопло́щся от Неискусому́жныя,/ Невеще́ственный и Бо́же:/ сла́ва си́ле Твое́й, Го́споди.

Песнь 5.

Первый канон.

Ирмос: Ужасо́шася вся́ческая/ в честне́м вхожде́нии Твое́м:/ Ты бо, Неискусобра́чная Де́во,/ внутрь вошла́ еси́ в храм Бо́жий,/ я́коже чисте́йший храм,/ всем воспева́ющим Тя/ мир подава́ющая.

Свяще́ние сла́вное и свяще́нное возложе́ние,/ днесь Пречи́стая Де́ва, возложи́вшися в храм Бо́жий,/ Всецарю́ на́шему Бо́гу Еди́ному в жили́ще соблюда́ется,/ я́ко весть Сам.

Добро́ту, Пречи́стая, души́ Твоея́ зря не́когда,/ ве́рою Заха́рия возопи́:/ Ты еси́ избавле́ние, Ты еси́ всех ра́дость,/ Ты еси́ воззва́ние на́ше,/ Е́юже Невме́стный вмеще́н мне яви́тся.

О, па́че ума́ чуде́с Твои́х, Всечи́стая!/ Стра́нное Твое́ рождество́ есть,/ стра́нен о́браз возраще́ния Твоего́,/ стра́нна и пресла́вна Твоя́, Богоневе́сто, вся/ и челове́ки несказа́нна.

Све́щник многосве́тлый су́щи, Богоневе́сто,/ днесь возсия́ла еси́ в дому́ Госпо́дни/ и озаря́еши ны честны́ми дарова́нии, Чи́стая,/ чуде́с Твои́х, Богоро́дице всепе́тая.

Второй канон.

Ирмос: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.

Да светлоно́сим, правосла́внии вси, стека́ющеся и сла́вяще Богома́терь,/ я́ко Го́споду днесь приво́дится/ я́ко же́ртва благоприя́тна.

Да веселя́тся пра́отцы днесь, Влады́чице,/ и да ра́дуется ро́ждшая Тя со отце́м Твои́м,/ я́ко плод их Го́споду прино́сится.

Многоимени́тую и сла́внейшую Непоро́чную Ю́ницу,/ я́ко пло́тию ро́ждшую Боже́ственнаго Тельца́,/ вси воспои́м, ве́рно пра́зднующе.

Уневе́щения напису́ются Боже́ственная зна́мения/ па́че ума́ рождества́ Твоего́, Чи́стая Де́во,/ днесь Ду́хом Святы́м в дому́ Бо́жии.

Да отве́рзутся преддве́рия сла́вы Бо́га на́шего/ и да прие́млют Неискусобра́чную Бо́жию Ма́терь,/ я́коже триле́тствующую Нескве́рную Ю́ницу.

Многочестну́ю и присе́нную го́ру воспои́м –/ Присноде́ву, Бо́жию Ма́терь бы́вшу:/ Та бо облиста́ свет в конце́х.

Троичен: Пренача́льное и Присносу́щное Еди́но Божество́ славосло́вяще, поклони́мся,/ Тре́ми Ли́цы естество́м неразде́льное/ и сла́вою равноче́стное.

Богородичен: Приста́нище благоути́шное и необори́мую сте́ну стяжа́хом,/ моли́тву Твою́ во обстоя́ниих, Богороди́тельнице,/ всегда́ избавля́еми бед и скорбе́й.

Катавасия: Бог сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам:/ тем, Богоразу́мия к све́ту наста́вльшеся,/ от но́щи у́тренююще,// славосло́вим Тя, Человеколю́бче.

Песнь 6.

Первый канон.

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,// о́т Нея ро́ждшагося Бо́га сла́вим.

Вся́ческая Нося́й глаго́лом,/ моли́тву пра́ведных услы́ша./ Те́мже непло́дныя разреши́л еси́ неду́г, я́ко Благоутро́бен,/ ра́дости Вино́вную сим дарова́.

Сказа́ти хотя́ Господь язы́ком Свое́ спасе́ние,/ Неискусобра́чную ны́не от челове́к прия́т,/ примире́ния зна́мение и обновле́ния.

Я́ко дом су́щи благода́ти,/ в не́мже сокро́вища лежа́т неизрече́ннаго Бо́жия строе́ния, Всечи́стая,/ в хра́ме причасти́лася еси́ нетле́нныя сла́дости.

Диади́му Тя ца́рскую прие́м,/ храм, Богоневе́сто, просвеща́шеся/ и подступа́ше лу́чшим,/ предрече́нных зря на Тебе́ сбытие́.

Второй канон.

Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли// и спаси́ мя, Спа́се ми́ра, зову́ща: сла́ва Тебе́.

Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:/ есть бо святе́йша Небе́сных умо́в.

Пе́сньми духо́вными восхва́лим, ве́рнии, Ма́терь Све́та,/ я́ко днесь нам яви́ся,/ предходя́щи в храм Бо́жий.

Нескве́рная А́гница и Чи́стая Голуби́ца/ приведе́ся обита́ти в дом Бо́жий,/ я́ко Непоро́чная, пронарече́нная бы́ти Ма́ти Бо́жия.

В храм зако́нный вхо́ды соверша́ет храм Бо́жий, Небе́сная ски́ния,/ из Не́йже нам, су́щим во тьме, Свет возсия́.

Младе́нствующи пло́тию и соверше́на душе́ю,/ Святы́й Киво́т в дом Бо́жий вхо́дит/ воспита́тися Боже́ственною благода́тию.

От вся́ких искуше́ний и бед душе́вных свободи́ ны,/ притека́ющия к Тебе́, Всепе́тая,/ Твои́ми мольба́ми, Ма́ти Христа́ Бо́га.

Троичен: Оте́ц, и Сын, и Дух пра́вый,/ Триипоста́сная Еди́нице и Нераздели́мая Тро́ице,/ поми́луй покланя́ющияся Боже́ственней Держа́ве Твое́й.

Богородичен: Во чре́ве Твое́м вмеще́н Невмести́мый все́ми, Богома́ти, быв,/ из Тебе́ произы́де, Пречи́стая,/ сугу́б естество́м Бог и Челове́к.

Катавасия: Из утро́бы Ио́ну младе́нца изблева́ морски́й зверь,/ якова́ прия́т,/ в Де́ву же все́льшееся Сло́во/ и плоть прие́мшее про́йде сохра́ншее нетле́нну./ Его́же бо не пострада́ истле́ния,/ Ро́ждшую сохрани́ неврежде́нну.

Кондак

Глас 4.
Подобен: «Вознесы́йся…»

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ Я́же в Ду́се Боже́ственном,/ Ю́же воспева́ют А́нгели Бо́жии:// Сия́ есть селе́ние Небе́сное.

Икос.

Неизрече́нных Бо́жиих и Боже́ственных та́ин/ зря в Де́ве благода́ть явля́емую и исполня́емую я́вственно,/ ра́дуюся и о́браз разуме́ти недоуме́юся, стра́нный и неизрече́нный:/ ка́ко избра́нная, Чи́стая, Еди́на яви́ся па́че всея́ тва́ри ви́димыя и разумева́емыя?/ Те́мже восхвали́ти хотя́ Сию́, ужаса́юся зело́ умо́м же и сло́вом,/ оба́че дерза́я, пропове́даю и велича́ю:// Сия́ есть селе́ние Небе́сное.

Песнь 7.

Первый канон.

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог благослове́н еси́.

Се днесь возсия́ конце́м весна́ ра́достная,/ просвеща́ющи на́шу ду́шу, и помышле́ние, и ум благода́тию,/ торжество́м Богоро́дицы днесь та́инственно да учреди́мся.

Да дароно́сят днесь вся́ческая Цари́це, Ма́тери Бо́жии/ Не́бо и земля́, и А́нгелов чи́ни, и челове́ков мно́жество/ и да вопию́т:/ во храм вво́дится Ра́дость и Избавле́ние.

Писа́ние мимотече́ и оскуде́ зако́н, я́коже сень,/ и благода́ти лучи́ возсия́ша в храм Бо́жий вше́дшей Тебе́, Де́во Ма́ти Чи́стая,/ в нем благослове́нная.

Повину́ся Рождеству́ Твоему́, Всечи́стая,/ я́ко Творцу́ и Бо́гу Не́бо, и земля́, и преиспо́дняя,/ и всяк язы́к земны́х испове́дает,/ я́ко Госпо́дь яви́ся, Спас душ на́ших.

Второй канон.

Ирмос: Пещь, Спа́се, ороша́шеся,/ о́троцы же, лику́юще, поя́ху:// отце́в Бо́же, благослове́н еси́.

Ликовству́им, празднолю́бцы, днесь,/ воспои́м Чи́стую Влады́чицу,/ Иоаки́ма и А́нну досто́йно чту́ще.

Проро́чествуй, Дави́де, глаго́ля Ду́хом:/ приведу́тся де́вы вслед Тебе́,/ приведу́тся Тебе́ во храм Цари́це Ма́тери.

Ра́довахуся А́нгелов чи́ни,/ веселя́хуся пра́ведных ду́си,/ я́ко Бо́жия Ма́терь во свята́я приво́дится.

Прие́млющи пи́щу Небе́сную,/ преспева́ше му́дростию и благода́тию,/ бы́вши Ма́ти по пло́ти Христа́ Бо́га.

И те́лом и ду́хом ра́довашеся,/ пребыва́ющи Мари́я Непоро́чная во хра́ме Бо́жии,/ я́коже сосу́д свяще́ннейший.

Введо́ша Тя во вну́треннейшее хра́ма целому́дреннии роди́телие Твои́, Пречи́стая,/ воспита́тися стра́нно в жили́ще Христа́ Бо́га.

Троичен: Просла́вим Тро́ицу Неразде́льную,/ воспои́м Еди́но Божество́/ со Отце́м Сло́во и Ду́ха Всесвята́го.

Богородичен: Моли́, Его́же родила́ еси́, Го́спода,/ я́ко благоутро́бна естество́м су́ща, Богороди́тельнице,/ спаси́ ду́ши воспева́ющих Тя.

Катавасия: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреде́ пла́мени стоя́ще, поя́ху:/ отце́в Бо́же, благослове́н еси́.

Песнь 8.

Первый канон.

Ирмос: Слы́ши, Отрокови́це, Де́во Чи́стая,/ да рече́т у́бо Гаврии́л/ Сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:// благослови́те, вся дела́ Госпо́дня, Го́спода.

Пречи́стый храм в дом Бо́жий приводя́щи А́нна иногда́,/ вопию́щи, с ве́рою рече́ свяще́ннику:/ ча́до, от Бо́га да́нное мне, прии́м ны́не,/ введи́ во храм Зижди́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.

Рече́, ви́дев, А́нне иногда́ Ду́хом Заха́рия:/ Жи́зни Ма́терь вво́диши и́стинную,/ Ю́же све́тло проро́цы Бо́жии Богоро́дицу пропове́даша,/ и ка́ко храм вмести́т Ю?/ Тем чудя́ся, вопию́:/ благослови́те, вся дела́ Госпо́дня, Го́спода.

Раба́ Бо́жия бых аз,– отвеща́ А́нна ему́,–/ призыва́ющи Сего́ ве́рою и моли́твою, прия́ти моея́ боле́зни плод,/ по прия́тии же рожде́нную привести́ Да́вшему Ю./ Тем, зовя́, вопию́:/ благослови́те, вся дела́ Госпо́дня, Го́спода.

Зако́нное вои́стинну де́ло есть,– свяще́нник рече́ ей,–/ стра́нну же весьма́ вещь поразумева́ю,/ зря Приводи́мую в дом Бо́жий,/ пресла́вно превосходя́щую свята́я благода́тию./ Тем и ра́дуяся, вопию́:/ благослови́те, вся дела́ Госпо́дня, Го́спода.

Возмога́ю,– рече́ А́нна ему́,– зна́ющи, я́же глаго́леши,/ разуме́еши бо сия́ Ду́хом Бо́жиим,/ я́сно я́же Де́вы пропове́дал еси́;/ приими́ у́бо Пречи́стую в храм Созда́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.

Светоно́сна нам возжже́ся свеща́,– возопи́ свяще́нник,–/ ра́дость велича́йшую светя́щи в хра́ме;/ ду́ши проро́ческия да сра́дуются мне,/ я́ко пресла́вная зря́ще, соверша́емая в дому́ Бо́жии,/ и да вопию́т при́сно:/ благослови́те, вся дела́ Госпо́дня, Го́спода.

Второй канон.

Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,// и превозноси́те во вся ве́ки.

Весели́тся днесь све́тло Иоаки́м,/ и А́нна непоро́чная Го́споду Бо́гу прино́сит же́ртву,/ да́нную ей от обеща́ния Святу́ю Дщерь.

Хва́лятся святи́и Дави́д и Иессе́й,/ и Иу́да чти́тся,/ из ко́рене бо их израсте́ плод – Де́ва Чи́стая,/ из Нея́же роди́ся Бог Преве́чный.

Мари́я Пречи́стая и одушевле́нная ски́ния/ приво́дится днесь в дом Бо́жий,/ и прие́млет Сию́ Заха́рия рука́ми,/ я́ко освяще́нное сокро́вище Госпо́дне.

Я́ко дверь спаси́тельную и го́ру мы́сленную,/ я́ко ле́ствицу одушевле́нную, почти́м, ве́рнии, вои́стинну Де́ву и Ма́терь Бо́жию,/ благослове́нную рука́ми иере́ев.

Проро́цы, апо́столи и му́ченицы Христо́вы,/ А́нгелов чи́ни и вси земноро́днии, почти́м пе́сньми Де́ву Чи́стую,/ я́ко благослове́нную Ма́терь Высоча́йшаго.

В храм Тя принесо́ша, Всенепоро́чная Чи́стая,/ Боже́ственне ро́ждшии Тя, я́ко же́ртву чи́сту,/ и стра́нно водворя́ешися в неходи́мых Бо́гу/ предугото́ватися в жили́ще Сло́ву.

Благослови́м Отца́, и Сы́на, и Свята́го Ду́ха – Го́спода.

Троичен: Да пое́тся Трисвяты́й Оте́ц, и Сын, и Дух Святы́й,/ Неразде́льная Еди́ница, Еди́но Божество́,/ держа́щее дла́нию всю тварь во вся ве́ки.

И ны́не, и при́сно, и во вéки векóв. Ами́нь.

Богородичен: Безнача́льное начина́ется Сло́во пло́тию,/ роди́вся, я́ко благоволи́,/ Бог же и Челове́к из Отрокови́цы Де́вы,/ возсозида́я ны, пре́жде па́дшия,/ ра́ди кра́йняго благоутро́бия.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.

Песнь 9.

Первый канон.

Припев: А́нгели, вхожде́ние Пречи́стыя зря́ще, удиви́шася:/ ка́ко Де́ва вни́де во свята́я святы́х?

Ирмос: Я́ко одушевле́нному Бо́жию киво́ту/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ и́стинно вы́шши всех еси́, Де́во Чи́стая. [Два́жды]

Припев: А́нгели, вхожде́ние Всечи́стыя зря́ще, удиви́шася,/ ка́ко со сла́вою вни́де во свята́я святы́х?

Я́ко пресве́тлую, Богоро́дице Чи́стая, душе́вныя чистоты́ иму́щи добро́ту,/ благода́тию же Бо́жиею исполня́ема с Небесе́,/ Све́том Присносу́щным просвеща́еши всегда́ с весе́лием вопию́щия:/ и́стинно вы́шши всех еси́, Де́во Чи́стая.

Припев: А́нгели, вхожде́ние Де́вы зря́ще, удиви́шася,/ ка́ко пресла́вно вни́де во свята́я святы́х?

Прелета́ет, Богоро́дице, Чи́стая, чу́до Твое́ си́лу слове́с:/ те́ло бо в Тебе́ поразумева́ю па́че сло́ва,/ тече́ния грехо́внаго неприя́тно./ Те́мже благода́рственно вопию́ Ти:/ и́стинно вы́шши всех еси́, Де́во Чи́стая.

Припев: А́нгели и челове́цы, Де́вы вхожде́ние почти́м,/ я́ко со сла́вою вни́де во свята́я святы́х.

Пресла́вно прообразова́ше, Чи́стая, зако́н Тя ски́нию и Боже́ственную ста́мну,/ стра́нен киво́т, и катапета́сму, и жезл,/ храм неразруши́мый и дверь Бо́жию./ Те́мже науча́ют Тебе́ зва́ти:/ и́стинно вы́шши всех еси́, Де́во Чи́стая.

Припев: А́нгели, вхожде́ние Де́вы зря́ще, удиви́шася,/ ка́ко Богоуго́дне вни́де во свята́я святы́х?

Песнопоя́ Тебе́,/ провозглаша́ше Дави́д, глаго́ля Тя Дщерь Царе́ву,/ красото́ю доброде́телей, одесну́ю предстоя́щую Бо́га, ви́дев Тя упещре́ну./ Те́мже, проро́чествуя, вопия́ше:/ и́стинно вы́шши всех еси́, Де́во Чи́стая.

Припев: А́нгели, взыгра́йте со святы́ми, де́вы, сликовству́йте:/ Богоотрокови́ца бо вни́де во свята́я святы́х.

Богоприя́тну предзря́, Соломо́н пропове́да Тя одр Царе́в,/ живы́й исто́чник запеча́тствован,/ из него́же нему́тная нам произы́де вода́, ве́рою вопию́щим:/ и́стинно вы́шши всех еси́, Де́во Чи́стая.

Припев: А́нгели и челове́цы, Де́ву пе́сньми да возвели́чим:/ Боголе́пно бо вни́де во свята́я святы́х.

Подае́ши дарова́ний Твою́ тишину́, Богоро́дице, души́ мое́й,/ точа́щи жизнь Тебе́ чту́щим по до́лгу,/ Сама́ защища́ющи, и покрыва́ющи, и соблюда́ющи вопи́ти Тебе́:/ и́стинно вы́шши всех еси́, Де́во Чи́стая.

Второй канон.

Припев: Велича́й, душе́ моя,/ приведе́нную во храм Госпо́день и благослове́нную рука́ми иере́евыми.

Ирмос: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный./ Велича́ем вси я́ко Ма́терь Бо́га на́шего Чи́стую. [Два́жды]

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Из пра́ведных произы́де Иоаки́ма и А́нны/ обеща́ния плод – Богоотрокови́ца Мари́я/ и, я́ко кади́ло прия́тно, пло́тию младе́нствующи,/ приво́дится во святи́лище свято́е/ я́ко Свята́я во святы́х обита́ти.

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Младе́нствующую естество́м и па́че естества́ я́вльшуюся Ма́терь Бо́жию восхва́лим пе́сньми:/ в храм бо зако́нный Го́споду днесь приво́дится в воню́ благово́ния,/ пра́ведных я́ко плод духо́вный.

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Со А́нгелом, е́же ра́дуйся, Богоро́дице прили́чне возопии́м, ве́рнии:/ ра́дуйся, вседо́брая Неве́сто;/ ра́дуйся, о́блаче светлый, из него́же нам возсия́ Госпо́дь, во тьме неве́дения седя́щим;/ ра́дуйся, всех Наде́ждо.

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Святы́х свята́я и Богома́ти Мари́е,/ моли́твами Твои́ми, Чи́стая, свободи́ ны от се́тей вра́жиих/ и вся́кия е́реси и ско́рби,/ ве́рно покланя́ющияся о́бразу свята́го Твоего́ зра́ка.

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Песнь досто́йную Богоро́дице вся тварь со А́нгелом Гаврии́лом взыва́ет, вопию́ще:/ ра́дуйся, Ма́ти Бо́жия Всенепоро́чная,/ Е́юже изба́вихомся пе́рвыя кля́твы,/ бы́вше нетле́ния о́бщницы.

Припев: Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.

Херуви́м пребо́льши, и Серафи́м вы́шши,/ и ши́рши Небе́с яви́лася еси́, Де́во,/ я́ко Невме́стнаго все́ми во утро́бе вмести́вши, Бо́га на́шего,/ и ро́ждши несказа́нно:/ Его́же моли́ приле́жно о нас.

Припев: Велича́й, душе́ моя́,/ Триипоста́снаго и Неразде́льнаго Божества́ Держа́ву.

Троичен: Триипоста́сное естество́, и Неразде́льную сла́ву,/ и в Божестве́ Еди́ном пое́мую непреста́нно на Небеси́ и на земли́/ Тро́ицу Неразлу́чную просла́вим,/ с Сы́ном Отцу́ и Ду́ху покланя́ющеся благоче́стно.

Припев: Велича́й, душе́ моя́,/ Честне́йшую и Сла́внейшую Го́рних во́инств, Де́ву Пречи́стую, Богоро́дицу.

Богородичен: Под Твое́ благоутро́бие прибега́ющия ве́рно/ и покланя́ющияся благоче́стно Сы́ну Твоему́, Де́во Богороди́тельнице,/ я́ко Бо́гу и Го́споду ми́ра,/ моли́ся от тли и бед изба́вити и вся́ческих искуше́ний.

Припев: А́нгели, вхожде́ние Пречи́стыя зря́ще, удиви́шася:/ ка́ко Де́ва вни́де во свята́я святы́х?

Катавасия: Та́инство стра́нное ви́жу и пресла́вное:/ Не́бо – верте́п, Престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,// Его́же, воспева́юще, велича́ем.

Светилен

Подобен: «Жены́, услы́шите…»

Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.

Слáва Отцу́ и Сы́ну и Святóму Ду́ху.

Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.

И ны́не, и при́сно, и во вéки векóв. Ами́нь.

Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.

Стихиры на хвалитех (на 4)

Глас 1.
Подобен: «Небе́сных чино́в…»

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Стих: Хвали́те Его́ на си́лах Его́,// хвали́те Его́ по мно́жеству вели́чествия Его́.

Свещено́сицы де́вы,/ Присноде́ву све́тло провожда́юще,/ проро́чествуют и́стинно Ду́хом бу́дущее:/ храм бо Бо́жий Богоро́дица су́щи,/ в храм со сла́вою де́вственною,// младе́нствующи, вво́дится.

Стих: Хвали́те Его́ во гла́се тру́бнем,// хвали́те Его́ во псалти́ри и гу́слех.

Обеща́ния свята́го и плод благосла́вный/ Богоро́дица вои́стинну яви́ся ми́ру,/ я́ко всех превы́шшая:/ Я́же благоче́стно приводи́ма в храм Бо́жий,/ моли́тву ро́ждших исполня́ет,/ соблюда́ема Боже́ственным Ду́хом.

Стих: Хвали́те Его́ в тимпа́не и ли́це,// хвали́те Его́ во стру́нах и орга́не.

Небе́сным воспита́на, Де́во, хле́бом/ ве́рно в хра́ме Госпо́дни,/ родила́ еси́ ми́ру Жи́зни Хлеб, Сло́во,/ Ему́же, я́ко храм избра́нный и всенепоро́чный,/ предобручи́лася еси́ Ду́хом та́инственно,// обручена́ Бо́гу и Отцу́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Да отве́рзется дверь Богоприя́тнаго хра́ма:/ храм бо всех Царя́ и Престо́л,/ днесь со сла́вою внутрь прие́м,/ Иоаки́м возлага́ет, освяти́в Го́споду// от Него́ избра́нную в Ма́терь Себе́.

Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.

Глас 2.

Днесь в храм приво́дится Всенепоро́чная Де́ва,/ во оби́телище Всецаря́ Бо́га/ и всея́ жи́зни на́шея Пита́теля;/ днесь Честне́йшая Святы́ня,/ я́ко триле́тствующая Ю́ница,/ во свята́я святы́х вво́дится;/ Той возопии́м, я́ко А́нгел:/ ра́дуйся, Еди́на в жена́х Благослове́нная.

Тропарь по Великом славословии

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния// Зижди́телева исполне́ние.

Кондак на Первом часе

Глас 4.
Подобен: «Вознесы́йся…»

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ Я́же в Ду́се Боже́ственном,/ Ю́же воспева́ют А́нгели Бо́жии:// Сия́ есть селе́ние Небе́сное.

Божественная Литургия

Блаженны (на 8)
1-го канона песнь 3-я на 4, 2-го канона песнь 6-я, на 4)

Во Ца́рствии Твое́м помяни́ нас, Го́споди, / егда́ прии́деши во Ца́рствии Твое́м.

Блаже́ни ни́щии ду́хом, / я́ко тех есть Ца́рство Небе́сное.

Блаже́ни пла́чущии, / я́ко ти́и уте́шатся.

Блаже́ни кро́тции, / я́ко ти́и насле́дят зе́млю.

Блаже́ни а́лчущии и жа́ждущии пра́вды, / я́ко ти́и насы́тятся.

Блаже́ни ми́лостивии, / я́ко ти́и поми́ловани бу́дут.

Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м// венце́в сла́вы сподо́би.

Блаже́ни чи́стии се́рдцем, я́ко ти́и Бо́га у́зрят.

Невестокраси́тель днесь яви́ся кра́сный Де́вы храм и черто́г,/ прие́м одушевле́нный черто́г Бо́жий,// Чи́стую, и Непоро́чную, и Светле́йшую всея́ тва́ри.

Блаже́ни миротво́рцы, я́ко ти́и сы́нове Бо́жии нареку́тся.

Дави́д, предначина́я ликова́ние, игра́ет, и ликовству́ет с на́ми,/ и Цари́цу зове́т Тя укра́шену, Пречи́стая,// предстоя́щу, Всечи́стая, в хра́ме Царю́ и Бо́гу.

Блаже́ни изгна́ни пра́вды ра́ди, я́ко тех есть Ца́рство Небе́сное.

Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́:// Богоро́дица днесь приводи́ма в дом Бо́жий.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.

Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:// есть бо святе́йша Небе́сных умо́в.

Ра́дуйтеся и весели́теся, я́ко мзда ва́ша мно́га на Небесе́х.

Пе́сньми духо́вными восхва́лим, ве́рнии, Ма́терь Све́та,/ я́ко днесь нам яви́ся,// предходя́щи в храм Бо́жий.

Сла́ва Отцу́ и Сы́ну и Свято́му Ду́ху.

Оте́ц, и Сын, и Дух пра́вый,/ Триипоста́сная Еди́нице и Нераздели́мая Тро́ице,// поми́луй покланя́ющияся Боже́ственней Держа́ве Твое́й.

И ны́не, и при́сно, и во ве́ки веко́в. Ами́нь.

Во чре́ве Твое́м вмеще́н Невмести́мый все́ми, Богома́ти, быв,/ из Тебе́ произы́де, Пречи́стая,// сугу́б естество́м Бог и Челове́к.

Малый вход

Прииди́те, поклони́мся и припаде́м ко Христу́./ Спаси́ ны, Сы́не Бо́жий, во святы́х ди́вен Сый, пою́щия Ти:// Аллилу́ия.

Примечание: В церковно-богослужебной практике (ср.: Розанов Н., прот. Руководство для лиц, отправляющих церковные богослужения… в Московском Кафедральном Христа Спасителя соборе и Московском Большом Успенском соборе в течение всего года… М., 1901. С. 25) в подобных случаях, а также на двунадесятые Богородичные праздники, их предпразднство, попразднство и отдание обычно поется «молитвами Богородицы…», хотя Типикон не дает такого указания. «Припев: „Спаси ны, Сыне Божий, молитвами Богородицы, поющия Ти…” – продукт литургической самодеятельности. Его не знает ни Устав, ни Литургика. Он и стилистически шероховат (слова „молитвами Богородицы” в подобных припевах стоят в начале, а после „Сыне Божий” требуется определение с артиклем ὁ). По Уставу и на праздники Богородичные положен припев „Спаси ны, Сыне Божий, во святых Дивен сый…”. По-видимому, отцы – составители Устава видели в Богородице Возглавительницу всего лика святых» (из письма проф. Д.П.Огицкого свт. Афанасию (Сахарову) от 19-22 апреля 1961 года; см.: Переписка Д.П.Огицкого с епископом Афанасием (Сахаровым) // Журнал Московской Патриархии. М., 1997. № 7. С. 71).

Тропари по входе

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:// ра́дуйся, смотре́ния Зижди́телева исполне́ние.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас тойже
Подобен: «Вознесы́йся…»

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ Я́же в Ду́се Боже́ственном,/ Ю́же воспева́ют А́нгели Бо́жии:// Сия́ есть селе́ние Небе́сное.

Прокимен

Глас 3, песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м.

Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди.

Чтение Апостола

Ко Филипписи́ем посла́ния свясвята́го апо́стола Па́вла чте́ние.

Бра́тие, сие́ да му́дрствуется в вас, е́же и во Христе́ Иису́се. И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́, и дарова́ Ему́ и́мя, е́же па́че вся́каго и́мене. Да о и́мени Иису́сове вся́ко коле́но поклони́тся Небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с, в сла́ву Бо́га Отца́.^{Флп.2:5-11}

Аллилуарий

Глас 8: Слы́ши, Дщи, и виждь, и приклони́ у́хо Твое́.

Стих: Лицу́ Твоему́ помо́лятся бога́тии лю́дстии.

Чтение Евангелия
от Луки, зачало 54

От Луки свята́го Ева́нгелиа чте́ние.

Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя́, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е.^{Лк.10:38-42;11:27-28}

Перевод: Пришёл Иисус в одно селение; здесь женщина, именем Марфа, приняла Его в дом свой; у неё была сестра, именем Мария, которая села у ног Иисуса и слушала слово Его. Марфа же заботилась о большом угощении и, подойдя, сказала: Господи! или Тебе нужды нет, что сестра моя одну меня оставила служить? скажи ей, чтобы помогла мне. Иисус же сказал ей в ответ: Марфа! Марфа! ты заботишься и суетишься о многом, а одно только нужно; Мария же избрала благую часть, которая не отнимется у неё. Когда же Он говорил это, одна женщина, возвысив голос из народа, сказала Ему: блаженно чрево, носившее Тебя, и сосцы, Тебя питавшие! А Он сказал: блаженны слышащие слово Божие и соблюдающие его.^{Лк.10:38-42;11:27-28}

Задостойник

Припев: А́нгели, вхожде́ние Пречи́стыя зря́ще, удиви́шася:/ ка́ко Де́ва вни́де во свята́я святы́х?

Ирмос, глас 4: Я́ко одушевле́нному Бо́жию киво́ту/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:// и́стинно вы́шши всех еси́, Де́во Чи́стая.

Причастен

Ча́шу спасе́ния прииму́, и и́мя Госпо́дне призову́.

Концерты

Славление

Тропарь и кондак

Глас 4.

Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:// ра́дуйся, смотре́ния Зижди́телева исполне́ние.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас тойже
Подобен: «Вознесы́йся…»

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ Я́же в Ду́се Боже́ственном,/ Ю́же воспева́ют А́нгели Бо́жии:// Сия́ есть селе́ние Небе́сное.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чти́м е́же в храм Госпо́день// вхожде́ние Твое́.

Молитвы

Молитва первая.

О, Пре­свя­та́я Де́­во, Цари́ца Не­бе­си́ и зем­ли́, пре́ж­де век избра́нная Не­ве́с­то Бо́­жия, в после́дняя же вре­ме­на́ прише́дшая в храм зако́нный на обруче́ние Жениху́ Небе́сному! Ты ос­та́­ви­ла еси́ лю́­ди Твоя́ и дом от­ца́ Тво­его́, во е́же при­нес­ти́ Се­бе́ в же́ртву чи́стую и непоро́чную Бо́­го­ви, и пер­вая дала́ еси́ обе́т всегда́шняго де́вст­ва. Да́­руй же и нам соблюда́ти се­бе́ в целому́дрии и чис­то­те́ и в стра́хе Бо́жием во вся дни жи­во­та́ на́­ше­го, да бу́дем хра́мы Ду́­ха Свя­та́­го, наипа́че помози́ всем в подража́ние Твое́ во оби́­те­лех живу́щим и обручи́вшим се­бе́ на служе́ние Бо́­го­ви в чис­то­те́ де́вст­ва провожда́ти жи­тие́ свое́ и от ю́нос­ти нести́ и́го Хрис­то́­во благо́е и ле́гкое, свя́то храня́ще обе́­ты своя́. Ты провела́ еси́, Всечи́стая, вся дни ю́нос­ти Твоея́ во хра́­ме Госпо́днем вдали́ от собла́знов ми́­ра се­го́, в при́сном бо́дрствовании моли́твенном и во вся́ком воздержа́нии душе́вном же и теле́снем, помози́ и нам отража́ти вся искуше́ния вра́жеския от пло́­ти, ми́­ра и диа́вола на­ходя́­щих на ны от ю́нос­ти на́шея, и побежда́ти о́ныя мо­ли́т­вою и пос­то́м. Ты во хра́­ме Госпо́днем со А́н­ге­лы пребыва́ющи, укра́силася еси́ все́­ми доброде́тельми, наипа́че же смире́нием, чис­то­то́ю и лю­бо́­вию и досто́йно воспита́лася еси́, да гото́ва бу́деши вмести́ти пло́­тию Невмести́мое Сло́­во Бо́­жие. Спо­до́­би же и нам, одержи́мым го́рдостию, невоздержа́нием и ле́ностию, об­ле­щи­ся во вся́­кое соверше́нство духо́вное, да угото́вает ки́йждо от нас с по́­мо­щию Твое́ю оде­я́ние бра́чное ду­ши́ своея́ и еле́й доброде́лания, да не на́зи и негото́ви яви́мся во сре́тение Безсме́ртному Жениху́ на́­ше­му и Сы́­ну Тво­ему́, Хри­сту́ Спа­си́­те­лю и Бо́­гу на́­ше­му, но да прии́мет ны с му́дрыми де́вами во оби́­те­ли ра́йс­кия, иде́­же со все́­ми свя­ты́­ми спо­до́­би нас вы́­ну сла́­ви­ти и прославля́ти всесвято́е и́мя От­ца́ и Сы́­на и Свя­та́­го Ду́­ха и Твое́ ми́лостивое за­ступ­ле́­ние всег­да́, ны́­не и при́с­но, и во ве́­ки ве­ко́в. Ами́нь.

Молитва вторая.

К кому́ возопию́, Вла­ды́­чи­це, к кому́ прибе́гну в го́рести мое́й, а́ще не к Те­бе́, Ца­ри́­це Не­бе́с­ная? Кто плач мой услы́­шит и воздыха́ние прии́мет, а́ще не Ты, Пренепоро́чная, Наде́жда хри­сти­а́н и При­бе́­жи­ще нам, гре́ш­ным? Кто па́­че Те­бе́ в несча́стиях защити́т? Услы́­ши стена́ние мое́ и приклони́ у́хо Твое́ ко мне, Вла­ды́­чи­це и Ма́­ти Бо́­га мо­его́! Не пре́­зри и́щущаго Твоея́ по́­мо­щи и не от­ри́­ни ме­не́ гре́ш­на­го, Ца­ри́­це Не­бе́с­ная! Нау­чи́ ме­не́ исполня́ти во́лю Сы́­на Тво­его́ и да́­руй же­ла́­ние всег­да́ сле́довати Его́ свя­ты́м за́поведям. За мой ро́пот в бо­ле́з­нех, труда́х и несча́стиях не от­сту­пи́ от ме­не́, но пребу́ди Ма́терию и Покрови́тельницею ме­не́ малоду́шнаго. Ца­ри́­це моя́ Преблага́я, За­сту́п­ни­це Усе́рд­ная! Тво­и́м хо­да́­тай­ством прегреше́ния моя́ по­кры́й, от ви́­ди­мых и не­ви́­ди­мых вра­го́в защити́, серд­ца́ вражду́ющих про́тив ме­не́ смягчи́ и Хри­сто́­вою лю­бо́­вию со­гре́й их. Мне же немощно́му да́­руй Твою́ всеси́льную по́­мощь победи́ти моя́ гре­хо́в­ныя привы́чки, дабы́, очище́нный покая́нием и после́дующею доброде́тельною жи́знию, в обще́нии со Свя­тою Це́рковию прове́л остальны́я дни зем­на́­го стра́нствия. Предста́ни мне, На­де́ж­до всех хри­сти­а́н, в час кон­чи́­ны моея́ и подкрепи́ мою́ ве́­ру в сме́ртный тя́жкий час. Вознеси́ за ме­не́, многопрегреша́ющаго в жи́з­ни сей, Твоя́ всеси́льныя мо­ли́т­вы по от­ше́ст­вии мое́м, да оправда́ет ме­не́ Гос­по́дь и соде́лает прича́стником Его́ безконе́чных ра́достей. Ами́нь.

Источники

• Минея. 21-е ноября. Введе́ние (Вход) во храм Пресвяты́я Влады́чицы на́шея Богоро́дицы и Присноде́вы Мари́и [электронный ресурс]. Азбука веры.
• Введе́ние (Вход) во храм Пресвято́й Влады́чицы на́шей Богоро́дицы и Присноде́вы Мари́и [электронный ресурс]. Последование богослужений наряду.
• Ноты [электронный ресурс] / Страница Владимира Ковальджи.
• Величания Киевского распева [нотный сборник]. Санкт-Петербургская Духовная Академия, Факультет церковных искусств, Редактор-составитель: М.И.Ващенко, 2017, стр. 10-11
• Певческая хрестоматия на материале православных церковных песнопения XIX и XX веков [нотный сборник]. Красноярская государственная академия музыки и театра, Кафедра теории музыки и композиции, Красноярский Православный фонд, Редактор-составитель: В.В.Пономарёв, 2005, стр. 80.
• Песнопения двунадесятых праздников. Введение во храм Пресвятой Богородицы [нотный сборник]. Москва, Фонд «Живоносный источник».
• Песнопения двунадесятых праздников. Сретение Господне [нотный сборник]. Москва, Фонд «Живоносный источник», стр.: 148-149.
• Задостойники в 4-х частях. Часть 2 [нотный сборник]. Москва, Издательский совет Русской Православной Церкви, 2008, стр. 21-22.

Главная страница · Праздники · Наверх