Акафист святителю Николаю Сербскому (Велимировичу), епископу О́хридскому и Жи́чскому

Вернуться назад · Кондаки 1 · 2 · 3 · 4 · 5 · 6 · 7 · 8 · 9 · 10 · 11 · 12 · 13 · Молитва

Не утверждён для общецерковного использования.

Кондак 1

Избра́нный пропове́дниче и преизря́дный уго́дниче Христо́в,/ всему́ ми́ру многоце́нное ми́ро про́поведи излия́й, святы́й влады́ко Нико́лае!/ Воспева́ем ти́ похва́льная, велича́юще просла́вльшаго тя́ Го́спода./ Ты́ же име́яй заступле́ние за на́с пред Ни́м усе́рдное,/ свободи́ ны вся́кия рабо́ты вра́жия, уми́льно пою́щих ти́:// «Ра́дуйся, святы́й влады́ко Нико́лае, вели́кий Се́рбский просвети́телю».

Икос 1

А́нгела моли́твы и пропове́дника покая́ния, святы́й Нико́лае, показа́ тя Творе́ц всея́ тва́ри, да просла́виши всечу́дное и́мя Пресвяты́я Тро́ицы. Яви́л бо ся еси́ вои́стинну а́нгел на земли́ и херуви́м во пло́ти, житие́ твое́ возоблиста́ я́ко луча́ пресве́тлая со́лнца пра́вды. Мы́ же чту́ще пресла́вная дея́ния твоя́, благода́рне восклица́ем си́це:

Ра́дуйся, пра́вило ве́ры и о́бразе благоче́стия:
Ра́дуйся, покая́ния учи́телю и гряду́щих провозве́стниче.
Ра́дуйся, благочести́ваго ко́рене изя́щное прозябе́ние:
Ра́дуйся, оте́чества твоего́ изря́дное удобре́ние.
Ра́дуйся, си́ло кре́пкая и утвержде́ние страны́ Се́рбския:
Ра́дуйся, похвало́ и ве́нче земли́ Ва́левския.
Ра́дуйся, свяще́нное украше́ние Ле́лическия оби́тели:
Ра́дуйся, писа́ния бо твоя́ богодухнове́нная тебе́ свиде́тели.
Ра́дуйся, очеса́ на́ша к небеси́ возведы́й:
Ра́дуйся, изде́тска в монастыре́ моли́тву обреты́й.
Ра́дуйся, прему́дростию Бо́жиею и любо́вию преизоби́льный:
Ра́дуйся, блиста́ющий свети́льниче все́ми люби́мый.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 2

Прови́дя беды́ и собла́зны мно́гия, на ро́д се́рбский гряду́щыя, и ча́д Бо́жиих смяте́ние, па́стырю до́брый, свя́тче Бо́жий Нико́лае, пропове́довал еси́ усе́рдно, написа́вый кни́ги богодухнове́нныя во мно́жестве: да, гла́ду же и засу́се безбо́жия прише́дшым, бы́ли бы́ша пи́ща и питие́ ча́дом твои́м. Они́ же ви́девше сия́ воо́чию, благоче́стно и единому́дренно вопия́ху Бо́гу: Аллилу́иа.

Икос 2

Ра́зум вы́шний дарова́ся ти́, святы́й Нико́лае, непщева́ти го́рняя от ю́ности твоея́: я́ко даде́ся ти́ му́дрость богосло́вия и ду́х моли́твенный. Ты́ же посто́м, бде́нием и слеза́ми, мно́гия и бога́тныя доброде́тели стяже́нныя, по все́й вселе́нней ми́лостивно се́ял еси́. Того́ ра́ди сла́вяще тя́, за Христа́ заточе́ние, бие́ния и сле́зы претерпе́вшаго, воспева́ем сицева́я:

Ра́дуйся, и́стины Правосла́вия необори́мая стено́:
Ра́дуйся, о́тче, отце́в сла́во и красото́.
Ра́дуйся, даро́в Ду́ха Бо́жия сосу́де златы́й:
Ра́дуйся, уче́ний безбо́жных и ло́жных обличи́телю святы́й.
Ра́дуйся, слове́с живота́ ве́чнаго благове́стниче неумолка́емый:
Ра́дуйся, па́стырю до́брый и стра́же ове́ц твои́х неусыпа́емый.
Ра́дуйся, ло́жь обличи́вый и свято́е Правосла́вие утверди́вый:
Ра́дуйся, вели́кий ви́тязю, злосла́вие лати́нское обори́вый.
Ра́дуйся, в беде́ и ско́рби лю́дем ско́рый услы́шителю:
Ра́дуйся, не́мощей на́ших милосе́рдый цели́телю.
Ра́дуйся, благода́тию Ду́ха Свята́го бога́тно озаре́нный:
Ра́дуйся, равноапо́стольный па́стырю и учи́телю вселе́нней.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 3

Си́ла Вы́шняго, святы́й Нико́лае, от ю́ности вои́стинну храня́ше тя́: углеба́ющу ти́ в реце́ Гра́дце, Госпо́дь спасе́ тя руко́ю о́трока Сре́тена. Оте́ц же твой искупи́ тя от разбо́йника на трех сот дука́т. Превозмо́гл еси́ балка́нскую голго́фу ра́тную, и покуше́ний на живо́т твой мно́жество, жи́ву ти изше́дшу из узи́лища Даха́у а́дова. Мы́ же но́ва тя апо́стола, проро́ка и святи́теля иму́ще, храни́вшему тя Го́споду благода́рную возно́сим пе́снь: Аллилу́иа!

Икос 3

Име́я тща́ние о по́двизе и́ноческаго равноа́нгельнаго жития́, пусты́нниче о́хридский Нико́лае, от ле́та до ле́та проходи́л еси́ стремни́ны Святого́рския, взыска́яй пусты́нники да наслади́шися бесе́д святы́х. Та́ко восходи́л еси́ от си́лы в си́лу, от дея́ния к боговиде́нию, приража́яся во́зрасту Христо́ву. Мы́ же дивя́щеся ре́вности, подвиго́м и любви́ твое́й, пое́м ти:

Ра́дуйся, душе́ю все́ю, се́рдцем и умо́м Христа́ возлю́бль:
Ра́дуйся, Его́ благо́е и́го на себе́ прие́м.
Ра́дуйся, тщеты́ и бла́га сего́ ми́ра отреки́йся:
Ра́дуйся, Небе́снаго Оте́чества пла́менне влеки́йся.
Ра́дуйся, святы́х Госпо́дних за́поведей блюсти́телю:
Ра́дуйся, измла́да благогове́йный моли́твы чти́телю.
Ра́дуйся, наро́ду се́рбскому Христо́в путь показа́вый:
Ра́дуйся, ча́да твоя́ моле́ньми те́плыми осеня́вый.
Ра́дуйся, моли́твою свое́ю от скорбе́й нас избавля́еши:
Ра́дуйся, от злых клеве́т лю́ди кре́пко защища́еши.
Ра́дуйся, но́вый златоу́стый пропове́дниче чуде́сный:
Ра́дуйся, земны́й а́нгеле и челове́че небе́сный.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 4

Бу́рю искуше́ний проти́ву на́шея святы́я Це́ркве воздвиза́емую, предузре́л еси́, святи́телю Нико́лае, я́ко па́стырь до́брый учай о́вцы Христо́вы стра́ху Бо́жию. Проходя́ концы́ вселе́нныя, пропове́довал еси́ Ева́нглие во тьме неве́дения седя́щым, да в моли́тве бдя́ще, и́стинную ве́ру и за́поведи Госпо́дни храня́ще, пред ним чи́стым се́рдцем ходя́ще, ра́достно Ему́ воскли́кнут: Аллилу́иа.

Икос 4

Слы́шаще тя, златоу́стый Христо́в Нико́лае, сосу́д избра́н, преиспо́лнь даро́в Ду́ха и по́двиг милосе́рдия, убо́гих ревни́теля, вдови́ц и си́рых пита́теля, стра́ждущих защи́тителя и уте́шителя, за гре́шных сле́знаго моли́твенника, лю́дие со всех стран притека́ют ти. С ни́ми же ку́пно и мы о гресе́х свои́х ка́ющеся, и предста́тельства твоего́ пред Го́сподем проси́тельне моля́ще, велегла́сно вопие́м:

Ра́дуйся, всего́ себе́ в же́ртву Го́сподеви принесы́й:
Ра́дуйся, на высоту́ безстра́стия смире́нно возше́дый.
Ра́дуйся, Христо́в вои́телю за и́стину добропобе́дный:
Ра́дуйся, Небе́снаго Домострои́теля ра́бе благи́й и ве́рный.
Ра́дуйся, пред Го́сподем нас непосты́дно заступа́яй:
Ра́дуйся, неве́рием объя́тыя просвеща́яй.
Ра́дуйся, любо́вию свое́ю заблу́ждшия вразумля́яй:
Ра́дуйся, во гресе́х ка́ющияся ско́ро утеша́яй.
Ра́дуйся, уче́нии твои́ми пита́вый ны и гре́вый:
Ра́дуйся, мно́гая ча́да Святы́м Ду́хом породи́вый.
Ра́дуйся, наста́вниче взыску́ющих и́стины:
Ра́дуйся, преизоби́льное одожде́ние Небе́снаго богомы́слия.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 5

Боже́ственный свет осия́ темни́цу твою́, му́чениче Нико́лае, тоя́ сте́ны бы́ша пла́мень о́гненный, егда́ в герма́нстем узи́лищи Даха́у яви́ся ти Христо́с ободря́й тя: ки́йждо бо спасе́ния ищя́й да во́зьмет крест свой и гряде́т по нем, вся́кое страда́ние у́бо привре́менно, Ца́рствие же Бо́жие есть ве́чно. Та́кожде и ты́ Го́спода взыску́ющым показа́л еси́, науча́я во смире́нии непреста́нно воспева́ти: Аллилу́иа.

Икос 5

Ви́дяй чи́стое и свято́е житие́ твое́, испове́дниче Нико́лае, враг ро́да челове́ча вожделе́ тя погуби́ти: наведе́ бо на тя искуше́ний мно́жество, и на живо́т твой покуше́ния да́же до насме́ртническа заточе́ния, иде́же са́м яви́ся ти я́ко пова́плен господи́н и филосо́ф, его́же ты, преиспо́лнь Ду́ха Свята́го, побежда́ше глаго́лом уст твои́х. Сей бо гне́вен на тя я́ко смра́дный дым исчезе́. Мы же дивя́щеся ти, за Христа́ мно́гия му́ки претерпе́вшу, с очесы́ сле́зными восклица́ем ти сицева́я:

Ра́дуйся, незло́бием свои́м ду́ха зло́бы побежде́й:
Ра́дуйся, си́лою Бо́жия благода́ти враги́ ви́димыя и неви́димыя потребле́й.
Ра́дуйся, моли́твою свое́ю а́нгелы мра́ка изгоня́яй:
Ра́дуйся, в смире́нии и кро́тости подо́бие Христу́ явля́яй.
Ра́дуйся, благове́стием твои́м супоста́ты посрамля́яй:
Ра́дуйся, словесы́ твои́ми си́лы а́да сотряса́яй.
Ра́дуйся, жестоковы́йных и злы́х душ благо́е умягче́ние:
Ра́дуйся, руку́ твое́ю воздея́нии небесе́м отверзе́ние.
Ра́дуйся, моли́твами твои́ми ка́ющыяся грехо́в свобожда́яй:
Ра́дуйся, труды́ твои́ми пра́вды а́лчущыя пита́яй.
Ра́дуйся, серде́ц окамене́нных ско́рый пробуди́телю:
Ра́дуйся, наги́х покрови́телю и пле́нных свободи́телю.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 6

Пропове́дницы тобо́ю, вели́кий равноапо́столе Нико́лае, по́сланнии, яви́шася ма́лии апо́столи, во вре́тищи бо зе́мли Се́рбския проходя́ще, на ра́мени во влага́лищи Ева́нгелие нося́ще, и́мже лю́дем Христа́ благовеству́юще: веща́ние свое́ пре́жде де́лом показу́юще, вся безме́здно и благогове́йно творя́ху, и с наро́дом вопия́ху: Аллилу́иа.

Икос 6

Возсия́л еси́, святи́телю Нико́лае, в житии́ свое́м па́че сия́ния се́вернаго, све́том Христо́вым все́х просвеща́я, ученики́ свои́ми ку́пно со ча́ды и́х оби́тели се́рбския исполня́я. Те́мже труды́ твоя́ благода́рно почита́юще, тя́ ублажа́ем си́це восхваля́юще:

Ра́дуйся, Святы́я Тро́ицы ве́рный служи́телю:
Ра́дуйся, Христа́ теле́сныма очи́ма зри́телю.
Ра́дуйся, хле́бом жи́зни ве́чныя до́бре насыще́нный:
Ра́дуйся, питие́м безсме́ртия для ве́чности напое́нный.
Ра́дуйся, в пе́рстнем телеси́ сла́дость Небе́сную предвкуси́вый:
Ра́дуйся, насе́льники но́выми монастыри́ испо́лнивый.
Ра́дуйся, церкве́й и оби́телей мно́зех сла́вный строи́телю:
Ра́дуйся, наста́вниче мона́хов и миря́н учи́телю.
Ра́дуйся, приста́нище ти́хое обурева́емых до́льним ми́ром:
Ра́дуйся, нас облеки́й в благу́ю покая́ния порфи́ру.
Ра́дуйся, ми́ра и пра́вды Бо́жия усе́рдный ревни́телю:
Ра́дуйся, богомо́льнаго во́инства Христо́ва сла́вный предводи́телю.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 7

Хотя́ человеколю́бец Госпо́дь яви́ти в тебе́, всеблаже́нне Нико́лае, свое́ неизрече́нное к лю́дем милосе́рдие, показа́ тя но́ва испове́дника на защи́те ро́да Се́рбскаго и Це́ркве: напа́дшим бо еретико́м лати́нским на оте́чество твое́, воздвиза́сте зна́мение побе́ды со дру́ги твои́ми, не щадя́ще живота́ за Кре́ст честны́й и свобо́ду злату́ю, и ра́достно поя́сте Бо́гу: Аллилу́иа.

Икос 7

Но́ваго тя ви́дя Бо́жия избра́нника, Христоно́сный Нико́лае, со слеза́ми моля́щася Бо́гу да сохрани́т лю́ди Своя́ в ве́ре пра́дедней, наро́д ве́рный гряде́ по тебе́, до́ндеже очи́стил еси́ зе́млю от еретико́в, и упра́вил еси́ ладию́ церко́вную святооте́ческими вода́ми на восто́к. Сего́ ра́ди лю́дие тя хва́лят си́це:

Ра́дуйся, пото́па е́реси лати́нския нас избавле́й:
Ра́дуйся, амали́ка мы́сленнаго побежде́й.
Ра́дуйся, своему́ ро́ду о́бразе и сла́вный предводи́телю:
Ра́дуйся, душ на́ших от тщеты́ за́падныя му́дрый спаси́телю.
Ра́дуйся, сле́зно ка́ющихся те́плый засту́пниче:
Ра́дуйся, пред Престо́лом Бо́жиим наш непреста́нный моли́твенниче.
Ра́дуйся, на Боже́ственней стра́жи ве́ры апо́стольския утверди́телю:
Ра́дуйся, суеве́рия и злове́рия прогони́телю.
Ра́дуйся, обремене́нных грехи́ мно́гими непосты́дное увере́ние:
Ра́дуйся, скорбя́щих сла́вное благода́тию увенча́ние.
Ра́дуйся, пресве́тлый сто́лпе, по пусты́ни мра́чней нам води́телю:
Ра́дуйся, грех сокрове́нных прозорли́вый обличи́телю.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 8

Стра́нно чу́до показа́ся дерзнове́ние твое́, духоно́сный Нико́лае, заклина́ющу т супоста́ты земли́ се́рбския, или́ да причте́н бу́деши стреля́емым гра́жданом кра́лева гра́да, или́ да преста́нут стреля́ние па́ствы твоея́. Они́ же язы́чницы герма́нстии плени́ша тя, оба́че стреля́ние наро́дное преста́. Мы же немогу́ще изрещи́ страда́ния твоя́ и моли́твенныя сле́зы, о лю́дех тобо́ю источе́нныя, те́пле тя благодари́м, и Христа́ Победи́теля сме́рти сла́вим: Аллилу́иа.

Икос 8

Весь вои́стинну де́латель виногра́да Христо́ва еси́, прему́дрый Нико́лае, ме́ряй вся писа́нием свяще́нным: ко́е бо прича́стие пра́вде к беззако́нию? Или́ ко́е обще́ние све́ту ко тьме́? Или́ ка́я часть ве́рну с неве́рным? Те́мже у́бо неве́рныя непщева́л еси́ я́ко всех го́ршая и скве́рншая Бо́гу, по глаго́лу бо проро́чу: «Рече́ безу́мен в се́рдцы свое́м: не́сть Бо́г». Сего́ ра́ди безу́мливии поверга́ют на тя дре́вие и ка́мение, до́ндеже мы́ ве́рнии воспева́ем ти сицева́я:

Ра́дуйся, ве́ру непра́ведно гони́мую хра́бро охраня́яй:
Ра́дуйся, живо́т свой за ста́до твое́ полага́яй.
Ра́дуйся, вели́ким по́стническим по́двигом и соверше́нным нестяжа́нием укра́шенный:
Ра́дуйся, во пла́чи о гресе́х свои́х и всего́ ми́ра Ду́хом И́стины уте́шенный.
Ра́дуйся, всем ве́рою ти притека́ющым хода́таю спасе́ния:
Ра́дуйся, подви́жниче неусыпа́емый не ве́дущий отдохнове́ния.
Ра́дуйся, любо́вь пламене́ющую ко Го́споду яви́вый:
Ра́дуйся, огне́м моли́твы стре́лы вра́жия попали́вый.
Ра́дуйся, вели́кое и сла́вное бога́тство ве́рных:
Ра́дуйся, сбы́тий гряду́щих проро́че достове́рный.
Ра́дуйся, даро́в духо́вных све́щниче неугаси́мый:
Ра́дуйся, оби́тели ра́йския со святы́ми насле́дивый.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 9

Всем на ра́дость во искуше́ниих и ско́рбех су́щым показа́ Госпо́дь тя па́стыря вели́каго, богоно́се о́тче наш Нико́лае, боле́зни исцеля́ющаго, злы́я ду́хи из люде́й изгоня́ющаго, от непра́ведныя сме́рти спаса́ющаго, к покая́нию призыва́ющаго. Ца́рствие Небе́сное в сердца́х людски́х бо насажда́еши, Бо́га о спасе́нии на́шем умоля́я. Мы же твоея́ по́мощи взыску́юще, с ве́рою и наде́ждою восклица́ем: Аллилу́иа.

Икос 9

Вети́и многовеща́ннии не возмо́гут изрещи́ си́лу про́поведи и моли́твы твоея́, треблаже́нне Нико́лае, пре́дал бо еси́ себе́ на служе́ние бли́жним, всем бысть вся: сове́тник благи́й недоумева́ющым, уте́шитель уныва́ющым, заблу́ждших кро́ткое вразумле́ние, боля́щих ско́рое исцеле́ние, си́рых и немощны́х пита́тель и защи́титель, душ на́ших всемо́щный воскреси́тель. Сего́ ра́ди вопие́м ти:

Ра́дуйся, ни́щих и убо́гих ми́лостивый покрови́телю:
Ра́дуйся, правосла́внаго просвеще́ния вели́кий учи́телю.
Ра́дуйся, к тебе́ притека́ющым оте́ц чадолюби́вый:
Ра́дуйся, во словесе́х любве́ ободре́ние и утеше́ние им яви́вый.
Ра́дуйся, ле́ствице вели́кая, на не́бо возводя́щая:
Ра́дуйся, свята́я ба́не, со́весть омыва́ющая.
Ра́дуйся, врачу́ прему́дрый, всех неду́г духо́вных исцели́телю:
Ра́дуйся, наде́жный живота́ в ми́ре сем путеводи́телю.
Ра́дуйся, сердца́ на́ша напая́ющий росоно́сный о́блаче:
Ра́дуйся, Ца́рствия Небе́снаго земны́й насле́дниче.
Ра́дуйся, а́лчущым и гла́дным ухле́бия пода́телю:
Ра́дуйся, лжи истреби́телю и и́стины рачи́телю.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 10

Спаси́тельнаго твоего́ по́двига, святи́телю Нико́лае, дости́г сконча́ния, на моли́тве коленопреклоне́нно святу́ю ду́шу твою́ в ру́це Бо́жии пре́дал еси́, ю́же А́нгели святи́и вознесо́ша горе́ ко Престо́лу Вседержи́теля, да предстои́ши в сла́ве невече́рней, со все́ми святы́ми моля́ Еди́наго Человеколю́бца дарова́ти покая́ние неради́вому о ве́ре ро́ду на́шему. Мы́ же ку́пно с умиле́нием Ему́ взыва́ем: Аллилу́иа.

Икос 10

Сте́ны зда́ннаго тобо́ю хра́ма упоко́иша в коне́ц твоя́ честны́я мо́щи, свя́тче Нико́лае, в ле́личи ве́си рожде́ния твоего́, в ню́же запове́да пренести́ тя, егда́ и́мать вре́мя испо́лнитися. Предуве́дев бо свы́ше ско́рую кончи́ну свою́, поиска́ из кра́лева кове́р се́рбский ти в пелены́ ме́сто и горсть се́рбския земли́: крест же гро́бищный созда́ свои́ма рука́ма, повеле́в в про́сте ра́це дре́вяне тя погребсти́. Мы же, таково́му твоему́ смире́нию дивя́щеся, пое́м ти:

Ра́дуйся, кончи́ною твое́ю свя́тость жития́ нам показа́вый:
Ра́дуйся, в моли́тве умиле́нный дух твой Го́сподеви преда́вый.
Ра́дуйся, венце́м безсме́ртия от руки́ Царя́ Ца́рствующих главо́ венча́нная:
Ра́дуйся, моли́твенных и по́стнических подвиго́в сокро́вищнице та́йная и сла́вная.
Ра́дуйся, ум тво́й и се́рдце моли́твенно в Бо́зе утверди́вый:
Ра́дуйся, тве́рдый сто́лпе благоче́стия неколеби́мый.
Ра́дуйся, свети́льниче неугаси́мый, Бо́жиим пла́менем возжже́нный:
Ра́дуйся, Спаси́теля и пра́вды Его́ ра́ди изгна́нниче и сонасле́дниче Ца́рствия блаже́нный.
Ра́дуйся, моли́твенниче о спасе́нии душ на́ших сле́зный и усе́рдный:
Ра́дуйся, моще́й принесе́нием уте́шивый нас милосе́рдно.
Ра́дуйся, на же́ртвеннице Бо́жием Се́рбская же́ртво но́вая:
Ра́дуйся, оте́честву твоему́ земно́му сла́во мно́гая.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 11

Пе́ние непреста́нное Пресвяте́й Тро́ице вознося́, богоно́сный Нико́лае, всеце́лым житие́м твои́м вели́кий испове́дник и́стины яви́лся еси́, си́есть правосла́вия утвержде́ние: ве́ры, наде́жды и любве́ наставле́ние: Це́ркви, Оте́честву и вся́цей души́ заступле́ние. Сего́ ра́ди благода́рни су́ще Го́сподеви, такову́ю ми́лость Его́ к нам восхваля́ем: Аллилу́иа.

Икос 11

Светоза́рную лучу́ во мра́це неве́дения су́щым па́че по успе́нии твое́м возсия́вшую, ви́дим тя, святи́телю Христо́в Нико́лае. мно́зии бо, уму́ помрачи́вшуся, нача́ша па́ки пропове́дати у́бо суеве́рия и е́реси отве́ргнутыя дре́вле, но́вою же го́ршею всее́ресию от всех злове́рий сочине́нною ста́до твое́ губя́ще. Мы же мрак сей и пове́трия ядови́тая отгна́ти моля́ще, с упова́нием ти вопие́м:

Ра́дуйся, блиста́ющая мо́лние, е́реси пожига́ющая:
Ра́дуйся, гро́ме све́тлый, устраша́ющий соблазня́ющыя.
Ра́дуйся, от враг ви́димых и неви́димых ско́рый изба́вителю:
Ра́дуйся, боля́щих и неду́жных милосе́рдый исцели́телю.
Ра́дуйся, со́ле земли́, от поги́бели нас спаса́ющая:
Ра́дуйся, све́те ми́ра, челове́ки просвеща́ющий.
Ра́дуйся, любо́вию свое́ю вся концы́ оте́чества твоего́ объя́вый:
Ра́дуйся, я́ко и всему́ ми́ру му́дростию и любо́вию возсия́вый.
Ра́дуйся, забве́нным все́ми, си́рым и убо́гим заступле́ние:
Ра́дуйся, Победи́теля сме́рти и Пречи́стыя Его́ Ма́тере при́сное благодаре́ние.
Ра́дуйся, благ земны́х и небе́сных незави́стный пода́телю:
Ра́дуйся, лука́вых дел льстеца́ кре́пкий победи́телю.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 12

Благода́тных даро́в Ду́ха Свята́го исто́чника тя ве́дуще, влады́ко Нико́лае, сия́ благода́рно прие́млем и благогове́йно тя мо́лим: умоли́ щедрода́теля Христа́, да храни́т Це́рковь Свою́ Святу́ю неврежде́нну от неве́рия, раско́ла, ересе́й, па́че же от нове́йшия всее́реси, да твои́м заступле́нием бед и напа́стей избавля́еми, взыва́ем Бо́гу: Аллилу́иа.

Икос 12

Пою́ще по́двиги, боле́зни и труды́ равноапо́стольнаго жития́ твоего́, и пресла́вных же твои́х дея́ний мно́жество, ублажа́ем тя, всехва́льне Нико́лае, я́ко ми́лостивна моли́твенника пред Го́сподем о спасе́нии душ на́ших, и с любо́вию зове́м ти си́це:

Ра́дуйся, чистоту́ души́ и те́ла непоро́чне сохрани́вый:
Ра́дуйся, красоты́ ми́ра сего́ во уме́ты вмени́вый.
Ра́дуйся, всем се́рбским богомо́льцем оте́ц чадолюби́вый:
Ра́дуйся, я́коже и сро́дником твои́м во и́ночестве процвести́ пособи́вый.
Ра́дуйся, богоизбра́нный па́стырю твоего́ ро́да Се́рбскаго:
Ра́дуйся, единоду́шный дру́же единокро́внаго наро́да Ру́сскаго.
Ра́дуйся, царя́ великому́ченика почита́телю, ему́ тезоиме́нный:
Ра́дуйся, в че́сть му́чеников ца́рственных воздви́гнувый на О́хриде хра́м в ми́ре пе́рвый.
Ра́дуйся, царя́ же о́браз в се́рбских хра́мех написа́ти повеле́вый:
Ра́дуйся, же́ртву его́ за лю́ди с му́ченичеством царя́ Ла́заря на Ко́сове по́ли ра́вно почита́вый.
Ра́дуйся, правосла́вныя и́стины вели́кий испове́дниче:
Ра́дуйся, святооте́ческих преда́ний сла́вный пропове́дниче.
Ра́дуйся, святы́й влады́ко Нико́лае, вели́кий Се́рбский просвети́телю.

Кондак 13

О, пресве́тлый и пречу́дный уго́дниче Христо́в, святи́телю о́тче на́ш Нико́лае,/ всехва́льный и всечестны́й архиере́ю Бо́жий!/ За преди́вное твое́ служе́ние спасе́нию ро́да Правосла́внаго/ приими́ во благодаре́ние от нас сие́ ма́лое моле́ние тебе́ возноси́мое,/ я́коже Госпо́дь прия́т ле́пте две от вдови́цы убо́гия,/ и умоли́ Го́спода на́шего Иису́са Христа́/ изба́вити нас всех бед вре́менных и ве́чных,/ да с тобо́ю вку́пе в Ца́рствии Его́ велегла́сно воспои́м Ему́:// Аллилу́иа, аллилу́иа, аллилу́иа.

Этот кондак читается или поётся трижды, затем Икос 1 и Кондак 1.

Икос 1

Кондак 1

Молитва

О, златоу́стый святи́телю Христо́в Нико́лае, се́рбския страны́ покрови́телю, и всех правосла́вных Христиа́н просвети́телю, за нас же, гре́шных, благонаде́жный пред Го́сподем предста́телю! К тебе́ прибега́ем с ве́рою и мо́лимся с любо́вию: при́зри на не́мощи на́ша и услы́ши проше́ния на́ша, со благогове́нием тебе́ приноси́мая, и умилосе́рдися о нас, обремене́нных и разсла́бленных грехи́ ве́лиими, и умоли́ Христа́ Бо́га о всех скорбя́щих и озло́бленных, по́мощи Его́ тре́бующих. Не оста́ви та́кожде, о архиере́ю Госпо́день, всемо́щным твои́м заступле́нием всех от правосла́вныя ве́ры отступи́вших, в неве́рии, злове́рии и суеве́рии пребыва́ющих, да некреще́ннии крестя́тся, невенча́ннии венча́ются и да храня́т плод утро́бы своея́.

Ей, свя́тче вели́кий и но́вый уго́дниче Бо́жий, вторы́й Нико́лае ми́лостивый! Яви́ предста́тельство твое́ о нас гре́шных к вы́шнему и хода́тайствуй пред ним твои́ми богоприя́тными моли́твами, да пока́емся во гресе́х на́ших и сотвори́м плоды́ досто́йны покая́ния: смире́ние и воздержа́ние, целому́дрие и нищелю́бие, трезве́ние и простоту́, да отри́нем и́го страсте́й всегуби́тельных и свободи́мся рабо́ты вра́жия.

О, святы́й влады́ко Нико́лае, Це́ркве Се́рбския и Вселе́нския велеле́пое украше́ние, оте́ческаго правосла́вия кре́пкое утвержде́ние! Моли́ Еди́наго Человеколю́бца, да вси мы́, лю́дие слове́нстии, сою́зом бра́тския любве́ связу́еми, поживе́м во вся́цем благоче́стии и ми́ре, па́че же моли́твами твои́ми и тве́рдым твои́м покро́вом сподо́бимся Небе́сное Ца́рствие улучи́ти, иде́же ты ны́не в незаходи́мем сия́еши све́те, ку́пно с со́нмом новому́чеников и испове́дников се́рбских и ру́сских, и всех святы́х от ве́ка угоди́вших Бо́гу, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Вернуться назад · Наверх