Стихиры на «Господи, воззвах…»

• Положи́, Го́споди, хране́ние усто́м мои́м / и дверь огражде́ния о устна́х мои́х.
• Не уклони́ се́рдце мое́ в словеса́ лука́вствия / непщева́ти вины́ о гресе́х
• С челове́ки де́лающими беззако́ние, / и не сочту́ся со избра́нными их.
• Нака́жет мя́ пра́ведник ми́лостию и обличи́т мя́, / еле́й же гре́шнаго да не нама́стит главы́ моея́,
• Я́ко еще́ и моли́тва моя́ во благоволе́ниих их. / Поже́рты бы́ша при ка́мени судии́ их:
• Услы́шатся глаго́ли мои́, я́ко возмого́ша. / Я́ко то́лща земли́ просе́деся на земли́, расточи́шася ко́сти их при а́де.
• Я́ко к Тебе́, Го́споди, Го́споди, о́чи мои́: / на Тя́ упова́х, не отыми́ ду́шу мою́.
• Сохрани́ мя́ от се́ти, ю́же соста́виша ми, / и от собла́зн де́лающих беззако́ние.
• Паду́т во мре́жу свою́ гре́шницы: / еди́н есмь а́з, до́ндеже прейду́.
• Гла́сом мои́м ко Го́споду воззва́х, / гла́сом мои́м ко Го́споду помоли́хся.
• Пролию́ пред Ним моле́ние мое́, / печа́ль мою́ пред Ним возвещу́.
• Внегда́ исчеза́ти от мене́ ду́ху моему́: / и Ты позна́л еси́ стези́ моя́:
• На пути́ сем, по нему́же хожда́х, / скры́ша сеть мне.
• Смотря́х одесну́ю и возгля́дах, / и не бе зна́яй мене́:
• Поги́бе бе́гство от мене́, / и несть взыска́яй ду́шу мою́.
• Воззва́х к Тебе́, Го́споди, рех: / Ты́ еси́ упова́ние мое́, часть моя́ еси́ на земли́ живы́х.
• Вонми́ моле́нию моему́, / я́ко смири́хся зело́,
• Изба́ви мя́ от гоня́щих мя́, / я́ко укрепи́шася па́че мене́.

Стихиры Октоиха

Глас 6.

Стих: Изведи́ из темни́цы ду́шу мою́, / испове́датися и́мени Твоему́.

Побе́ду име́я, Христе́, ю́же на а́да, / на Крест возше́л еси́: / да во тьме сме́рти седя́щия воскреси́ши с Собо́ю, / И́же в ме́ртвых Свобо́дь, / Источа́яй живо́т от Своего́ све́та, // Всеси́льне Спа́се, поми́луй нас.

Стих: Мене́ ждут пра́ведницы, / до́ндеже возда́си мне.

Днесь Христо́с сме́рть попра́в, / я́коже рече́, воскре́се, / и ра́дование ми́рови дарова́, / да вси взыва́юще, песнь та́ко рцем: / Исто́чниче жи́зни, непристу́пный Све́те, // Всеси́льне Спа́се, поми́луй нас.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Тебе́, Го́споди, Су́щаго по всей тва́ри, / гре́шнии ка́мо бежи́м; / на Небеси́ Сам живе́ши, / во а́де попра́л еси́ сме́рть. / Во глубины́ морски́я; / та́мо рука́ Твоя́, Влады́ко. / К Тебе́ прибега́ем, / Тебе́ припа́дающе мо́лимся: // Воскресы́й из ме́ртвых, поми́луй нас.

Стих: Да бу́дут у́ши Твои́ / вне́млюще гла́су моле́ния моего́.

Глас тойже.

Кресто́м Твои́м, Христе́, хва́лимся, / и воскресе́ние Твое́ пое́м и сла́вим: / Ты бо еси́ Бог наш, // ра́зве Тебе́ ина́го не ве́мы.

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Вы́ну благословя́ще Го́спода, / пое́м воскресе́ние Его́: / Крест бо Претерпе́в, // сме́ртию сме́рть погуби́.

Стих: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Сла́ва си́ле Твое́й, Го́споди, / я́ко упраздни́л еси́ держа́ву иму́щаго сме́рти: / обнови́л еси́ нас Кресто́м Твои́м, // да́руя нам живо́т и нетле́ние.

Стихиры Триоди

Глас 2.
Подобен: «Ки́ими похва́льными пе́сньми…»

Стих: От стра́жи у́тренния до но́щи, от стра́жи у́тренния / да упова́ет Изра́иль на Го́спода.

Ки́ими благопохвале́ний пе́сньми воспои́м иера́рха, / богосло́вия трубу́, огнедохнове́нная уста́ благода́ти, / честно́е Ду́ха прия́телище, / столпа́ Це́ркве непоколеби́маго, / вели́кое вселе́нныя украше́ние, / реку́ прему́дрости, / све́та свети́льника, // звезду́ я́сную, тва́рь просвеща́ющую?

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

Ки́ими благопохвале́ний пе́сньми воспои́м иера́рха, / богосло́вия трубу́, огнедохнове́нная уста́ благода́ти, / честно́е Ду́ха прия́телище, / столпа́ Це́ркве непоколеби́маго, / вели́кое вселе́нныя украше́ние, / реку́ прему́дрости, / све́та свети́льника, // звезду́ я́сную, тва́рь просвеща́ющую?

Стих: Хвали́те Го́спода вси язы́цы, / похвали́те Его́ вси лю́дие,

Ки́ими песнопе́ний цвета́ми венча́им иера́рха, / благоче́стия побо́рника, / и нече́стия проти́вника, / те́плаго ве́ры предста́теля, / вели́каго наста́вника и учи́теля, / цевни́цу всекра́сную Ду́ха, / златосия́ющий язы́к, / исто́чник кипя́щий то́ки исцеле́ний ве́рным, //вели́каго и досточу́днаго Григо́рия?

Стих: Я́ко утверди́ся ми́лость Его́ на нас, / и и́стина Госпо́дня пребыва́ет во век.

Ки́ими земноро́днии устна́ми восхва́лим иера́рха, / Це́ркве учи́теля, / све́та боже́ственнаго пропове́дника, / небеснотаи́нника Тро́ицы, / ве́лие мона́шествующих украше́ние, / дея́нием и виде́нием просия́вшаго, / Фессалони́тскую похвалу́, сограждани́на иму́щаго, // мирото́чнаго на небесе́х боже́ственнаго и пречу́днаго Дими́трия?

Стихира на «Славу…»

Сла́ва Отцу́, и Сы́ну, и Свято́му Ду́ху.

Глас 6.

Преподо́бне, треблаже́нне,/ святе́йший о́тче,/ па́стырю до́брый, и архипа́стыря Христа́ учениче́,/ положи́вый ду́шу о овца́х:/ са́м и ны́не о́тче наш богоно́се Григо́рие,/ испроси́ моли́твами твои́ми,// дарова́ти нам ве́лию ми́лость.

Стихира на «И ныне…»

И ны́не, и при́сно, и во ве́ки веко́в. Ами́нь.

Глас тойже.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ Возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог сый, / и естество́м быв Челове́к нас ра́ди, / не во двою́ лицу́ Разделя́емый, / но во Двою́ Естеству́ / несли́тно Познава́емый. / Того́ моли́, Чи́стая, Всеблаже́нная, // поми́ловатися душа́м на́шим.

Стихиры Октоиха

Глас 7.

Стих: Изведи́ из темни́цы ду́шу мою́, / испове́датися и́мени Твоему́.

Прииди́те, возра́дуемся Го́сподеви, / сокруши́вшему сме́рти держа́ву, / и просвети́вшему челове́ческий род, / со Безпло́тными зову́ще: // Соде́телю и Спа́се наш, сла́ва Тебе́.

Стих: Мене́ ждут пра́ведницы, / до́ндеже возда́си мне.

Крест претерпе́л еси́ Спа́се, / и погребе́ние нас ра́ди, / сме́ртию же я́ко Бог смерть умертви́л еси́. / Те́мже покланя́емся тридне́вному воскресе́нию Твоему́: // Го́споди, сла́ва Тебе́.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Апо́столи ви́девше воскресе́ние Соде́теля, чудя́хуся, / пою́ще хвалу́ А́нгельскую: / сия́ сла́ва есть церко́вная, / сие́ бога́тство Ца́рствия: // пострада́вый нас ра́ди, Го́споди, сла́ва Тебе́.

Стих: Да бу́дут у́ши Твои́ / вне́млюще гла́су моле́ния моего́.

Глас тойже.

А́ще и ят был еси́ Христе́, от беззако́нных муже́й, / но Ты ми еси́ Бог, и не постыжду́ся; / бие́н был еси́ по плеще́ма, не отмета́юся; / на Кресте́ пригвожде́н был еси́, и не таю́; / воста́нием Твои́м хвалю́ся: / смерть бо Твоя́ живо́т мой, // Всеси́льне и Человеколю́бче Го́споди, сла́ва Тебе́.

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Дави́дское проро́чество исполня́я Христо́с, / вели́чествие в Сио́не Свое́ ученико́м откры́л есть, / хвали́ма показу́я Себе́, / и сла́вима при́сно со Отце́м же и Ду́хом Святы́м: / пе́рвее у́бо безпло́тна, я́ко Сло́ва, / последи́ же нас ра́ди воплоще́на, / и умерщвле́на я́ко челове́ка, и воскре́сша со вла́стию, // я́ко Человеколю́бца.

Стих: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Соше́л еси́ во ад Христе́, я́коже восхоте́л еси́: / испрове́ргл еси́ смерть, я́ко Бог и Влады́ка: / и воскре́сл еси́ тридне́вен, / совоскреси́в Ада́ма от а́довых уз и тле́ния, / зову́ща и глаго́люща: / сла́ва Воскресе́нию Твоему́, // Еди́не Человеколю́бче.

Стихиры Триоди

Глас 5.
Подобен: «Ра́дуйся, по́стников…»

Стих: От стра́жи у́тренния до но́щи, от стра́жи у́тренния / да упова́ет Изра́иль на Го́спода.

Возсия́й Госпо́день Кре́сте, / светолу́чныя мо́лния твоея́ благода́ти, / в сердца́ чту́щих тя́, и богоприя́тною любо́вию прие́млющих, мировожделе́нне, / и́мже сле́зное потреби́ся се́тование, / и сме́ртных се́тей изба́вихомся, / и к при́сному весе́лию приидо́хом. / Покажи́ красоты́ твоея́ благоле́пие, / воздая́ние пода́ждь воздержа́ния рабо́м твои́м, / ве́рно прося́щым твое́ бога́тное заступле́ние, // и ве́лию ми́лость.

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

Ра́дуйся живоно́сный Кре́сте, / Це́ркве кра́сный раю́, дре́во нетле́ния, / прозя́бшее на́м ве́чныя сла́вы наслажде́ние: / и́мже бесо́встии отгоня́ются полцы́, / и а́нгельстии свеселя́тся чи́нове, / и совокупле́ния ве́рных пра́зднуют. / Ору́жие непобеди́мое, / утвержде́ние неруши́мое, / ве́рных побе́до, свяще́нников похвало́, / Христо́вы ны́не стра́сти и на́м пода́ждь дости́гнути, // и ве́лию ми́лость.

Стих: Хвали́те Го́спода вси язы́цы, / похвали́те Его́ вси лю́дие,

Ра́дуйся живоно́сный Кре́сте, / благоче́стия непобеди́мая побе́да, / две́рь ра́йская, ве́рных утвержде́ние, / Це́ркве огражде́ние: / и́мже тля разори́ся и упраздни́ся, / и попра́ся сме́ртная держа́ва, / и вознесо́хомся от земли́ к небе́сным: / ору́жие непобеди́мое, / бесо́в сопротивобо́рче, / сла́во му́чеников, / преподо́бных я́ко вои́стинну удобре́ние, / приста́нище спасе́ния, // да́руяй ми́ру ве́лию ми́лость.

Стих: Я́ко утверди́ся ми́лость Его́ на нас, / и и́стина Госпо́дня пребыва́ет во век.

Гряди́ первозда́нная дво́ице, / ли́ка отпа́дшая го́рних, / за́вистию человекоуби́йцы, / го́рькою сла́стию дре́ва, дре́вле вкуше́нием. / Се всечестно́е вои́стинну дре́во предгряде́т, / к нему́же прите́кше ра́достию облобыза́йте, / и возопи́йте к нему́ с ве́рою: / ты́ на́ше воззва́ние, Кре́сте всечестны́й, / дре́во богоблаже́нное, са́де небе́сный: / его́же плода́ причасти́вшеся, / нетле́ние улучи́хом, / еде́ма пе́рваго прие́мше изве́стно, // и ве́лию ми́лость.

Стихира на «Славу…»

Сла́ва Отцу́, и Сы́ну, и Свято́му Ду́ху.

Глас 3.

Христе́ Бо́же на́ш, / во́льное распя́тие во о́бщее воскресе́ние ро́да челове́ческаго восприе́мый, / и тро́стию Креста́, обагре́нием червле́ным своя́ пе́рсты окровави́вый, / оста́вительная нам ца́рски подписа́ти человеколю́бствовавый, / не пре́зри нас бе́дствующих, / и па́ки от тебе́ разстоя́ние: / но уще́дри еди́не долготерпели́ве, / во обстоя́нии лю́ди твоя́, // и воста́ни, побори́ борю́щыя ны, я́ко всеси́лен.

Стихира на «И ныне…»

И ны́не, и при́сно, и во ве́ки веко́в. Ами́нь.

Глас 7.

Ма́ти у́бо позна́лася еси́, па́че естества́, Богоро́дице, / пребыла́ же еси́ Де́ва, па́че сло́ва и ра́зума: / и чудесе́ Рождества́ Твоего́ сказа́ти язы́к не мо́жет. / Пресла́вну бо су́щу зача́тию Чи́стая, / непости́жен есть о́браз рожде́ния: / иде́же бо хо́щет Бог, побежда́ется естества́ чин. / Те́мже Тя́ вси, Ма́терь Бо́жию ве́дуще, / мо́лим Ти́ ся приле́жно, // моли́ спасти́ся душа́м на́шим.

Стихиры Октоиха

Глас 8.

Стих: Изведи́ из темни́цы ду́шу мою́, / испове́датися и́мени Твоему́.

Тебе́ Царя́ и Влады́ку, / а́нгели непреста́нно воспева́ют, / аз же Ти припа́даю, / я́ко мыта́рь зовы́й: // Бо́же, очи́сти мя, и поми́луй мя.

Стих: Мене́ ждут пра́ведницы, / до́ндеже возда́си мне.

Безсме́ртна су́щи душе́ моя́, / волна́ми жите́йскими не покрыва́йся, / но возни́кни вопию́щи к своему́ Благода́телю: // Бо́же, очи́сти мя, и спаси́ мя.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Егда́ прииму́ во уме́ мно́жество соде́янных мно́ю зол, / и в помышле́ние прииду́ стра́шнаго о́наго испыта́ния, / тре́петом содержи́мь к Тебе́ прибега́ю / человеколю́бцу Бо́гу. / Те́мже не пре́зри мене́, / молю́ Тя, Еди́не Безгре́шне: / да́руй умиле́ние смире́нней мое́й души́ пре́жде конца́, // и спаси́ мя.

Стих: Да бу́дут у́ши Твои́ / вне́млюще гла́су моле́ния моего́.

Глас тойже.

Сле́зы ми да́ждь, Бо́же, / я́коже иногда́ жене́ гре́шнице: / и сподо́би мя омочи́ти но́зе Твои́, / я́же мя от пути́ пре́лести свободи́вшыя, / и ми́ро благоуха́ния Тебе́ приноси́ти житие́ чи́сто, / покая́нием ми созда́нное, / да услы́шу и аз жела́емый Тво́й глас: // ве́ра твоя́ спасе́ тя, иди́ в ми́ре.

Стихиры Триоди

Глас 3.
Подобен: «Ве́лия креста́…»

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Вели́кия ве́рнии во вре́мя пока́жем / воздержа́ния труды́: / я́ко да сла́ву вели́кую получи́м, // ми́лостию вели́каго Бо́га избавля́еми пла́мене гее́нскаго.

Стих: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Вре́мя поще́ния ны́не преполови́вше, / нача́ло боже́ственнаго жития́ я́ве пока́жем, / и в коне́ц доброде́тельнаго жи́тельства дости́гнути / те́пле потщи́мся: // я́ко да прии́мем сла́дость нестаре́емую.

Глас 7.
Подобен: «Под кро́в Тво́й…»

Стих: От стра́жи у́тренния до но́щи, от стра́жи у́тренния / да упова́ет Изра́иль на Го́спода.

Преполови́вше сей свяще́нный поще́ния путь, / к бу́дущему ра́достию потеце́м, /благотворе́ния еле́ем ду́шы пома́завше, / я́ко да сподо́бимся Христа́ Бо́га на́шего, / и Боже́ственным страсте́м поклони́тися, // предвари́ти и стра́шное и свято́е воскресе́ние.

Стихиры Минеи
мученика Кодрата

Глас 1.
Подобен: «Небе́сных чино́в…»

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

С прехва́льным Кодра́том / да воспое́тся све́тло / Киприа́н вели́кий, / Диони́сия два́ и Ане́кт досто́йно, / Кри́ск вку́пе и сла́вный Па́вел ве́рно, / я́ко страда́льцы Госпо́дни боговенча́нны // и моли́твенницы на́ши тепле́йшии.

Стих: Хвали́те Го́спода вси язы́цы, / похвали́те Его́ вси лю́дие,

Священнопобе́дных му́чеников и победоно́сных / ли́к дне́сь други́й яви́ся, / озаря́ющь собо́р боже́ственных страстоте́рпец, / тве́рдое число́, избра́нное во́инство, / ему́же нача́льствует Кодра́т, // благосла́вный победи́тель проявля́емь.

Стих: Я́ко утверди́ся ми́лость Его́ на нас, / и и́стина Госпо́дня пребыва́ет во век.

Ри́торския у́бо му́дрости многопи́санная плете́ния / сечи́тельным твои́м сло́вом / разори́л еси́, я́ко мглу́, / прехва́льный Кодра́те, / науча́еши ве́рно и стра́ждеши терпели́вно за Христа́, / во обои́х благоукраша́яся // и вку́пе со страстоте́рпцы венча́емь.

Стихира на «Славу…» и «И ныне…»

Сла́ва Отцу́, и Сы́ну, и Свято́му Ду́ху, и ныне, и ны́не, и при́сно, и во ве́ки веко́в. Ами́нь.

Глас 1.
Подобен: «Небе́сных чино́в…»

Одержи́мы прегреше́нии ненаде́жными, Чи́стая, / Тя Предста́тельницу еди́ну стяжа́вше, Де́во, / вопие́м благода́рственно: / очи́сти ны, Пресвята́я Богоневе́сто, / Ты бо еси́ ми́ра прибе́жище // и заступле́ние ро́да на́шего.

Стихиры Октоиха

Глас 1.

Стих: Изведи́ из темни́цы ду́шу мою́, / испове́датися и́мени Твоему́.

Я́ко пучи́на мно́га прегреше́ний мои́х Спа́се, / и лю́те погружа́юся согреше́ньми мои́ми, /да́ждь ми́ ру́ку я́ко Петро́ви, // спаси́ мя, Бо́же, и поми́луй мя.

Стих: Мене́ ждут пра́ведницы, / до́ндеже возда́си мне.

Я́ко в помышле́ниих лука́вых и в де́лех осуди́хся, Спа́се, / мысль мне да́руй обраще́ния Бо́же, да зову́ Ти: // спаси́ мя, Благоде́телю благи́й, и поми́луй мя.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Ин тя мир, душе́, ожида́ет, / и Судия́ хо́щет твоя́ обличи́ти та́йная и лю́тая. / Не пребу́ди у́бо в зде́шних, / но предвари́ вопию́щи Судии́: // Бо́же, очи́сти мя, и спаси́ мя.

Стих: Да бу́дут у́ши Твои́ / вне́млюще гла́су моле́ния моего́.

Не пренебрези́ мене́, Спа́се мо́й, / ле́ностию грехо́вною одержи́ма, / воздви́гни мое́ помышле́ние к покая́нию, / и Твоего́ виногра́да де́лателя иску́сна покажи́ мя: // да́руй ми единагона́десяте часа́ мзду, и ве́лию ми́лость.

Стихиры Триоди

Глас 1.
Подобен: «Прехва́льнии му́ченицы…»

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Обнища́в бога́тый, Христе́, / челове́ки обогати́л еси́ безсме́ртием и све́тлостию. / Те́мже обнища́вшаго сластьми́ жития́, / доброде́тельми мя обогати́, / и убо́гому Ла́зарю сочини́, /бога́таго мя муче́ния избавля́я, // и гее́нны предлежа́щия мне.

Стих: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Зло́бою обогати́хся лю́те, / и сла́дость возлюби́х, и су́щих в житии́ наслади́хся сласте́й, Го́споди, / и огню́ гее́нны подсужде́н бых: / гла́дом та́юща умо́м, я́ко Ла́заря презира́ема, /пред враты́ Боже́ственных дея́ний пове́ржена, // уще́дри мя, Влады́ко.

Глас 1.
Подобен: «О́блак тя…»

Стих: От стра́жи у́тренния до но́щи, от стра́жи у́тренния / да упова́ет Изра́иль на Го́спода.

Шесту́ю от честны́х посто́в седми́цу, / усе́рдно начина́юще, / Го́сподеви предпра́зднственное пе́ние ва́ий принесе́м, ве́рнии: / Гряду́щему во сла́ве, / си́лою Божества́ во Иерусали́м, умертви́ти сме́рть. / Те́мже угото́вим благоче́стно побе́дныя о́бразы, / ве́тви доброде́тельныя, // оса́нна вопию́ще Творцу́ все́х.

Стихиры Минеи
святого Алексия, человека Божьего

Глас 1.
Подобен: «Всехва́льнии му́ченицы…»

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

Челове́ка тя позна́хом Бо́жия / зва́нием же и ве́щию, / доброде́тельми бо просия́л еси́, / нищету́ безме́рную и тесноту́ на земли́ стяжа́в / и чудесы́ ве́рныя уве́рив. / Те́мже моли́ся дарова́ти душа́м на́шым // мир и ве́лию ми́лость.

Стих: Хвали́те Го́спода вси язы́цы, / похвали́те Его́ вси лю́дие,

Жела́нием, ороша́ющим пло́ть, / по́хоти паля́щия угаси́л еси́, Алекси́е, / черто́гом черто́г благоче́стно измени́л еси́, / сла́дость же теле́сную Боже́ственным а́нгельским подо́бием. / С ни́миже моли́ся дарова́ти душа́м на́шым // мир и ве́лию ми́лость.

Стих: Я́ко утверди́ся ми́лость Его́ на нас, / и и́стина Госпо́дня пребыва́ет во век.

Пребыва́л еси́ неве́дом, му́дре, / пред враты́ оскорбля́емь свяще́нных роди́телей твои́х, / руга́ющимся тебе́ твои́м отроко́м, / на вре́мени до́лзе, / у́мер же, яви́лся еси́ чудесы́, / я́же соверши́л еси́, // исцеля́я неду́ги и отгоня́я лука́вствия ду́хи.

Стихира на «Славу…» и «И ныне…»

Сла́ва Отцу́, и Сы́ну, и Свято́му Ду́ху, и ныне, и ны́не, и при́сно, и во ве́ки веко́в. Ами́нь.

Глас 1.
Подобен: «Всехва́льнии му́ченицы…»

Неду́говавшую, Пресвята́я, / лю́те ду́шу мою́ страстьми́ лука́выми исцели́, / я́же Цели́теля и Спа́са всех / — Христа́ ро́ждшая, / вся́ку я́зю исцели́вшаго / уя́звленнаго диа́вольским зломы́слием // и сме́рти нас изме́ншаго.