14 июля. Святых и чудотворцев, безсребреников Космы и Дамиана, в Риме мучившихся.

Всенощное бдение на планшете · Литургия на планшете

Малая Вечерня

Стихиры на «Го́споди, воззва́х…» (на 4)

Глас 1.
Подо́бен: «Да́л еси́ зна́мение…»

Вода́ми духо́вными,/ я́ко реки, наводня́емы,/ и, я́ве напо́лншеся, тва́рь напоя́ете/ богозна́меньми и пресла́вными исцеле́ний дарова́нии,/ и душетленныя стра́сти изсуша́ете,/ и неду́ги исцеля́ете,/ и отгоня́ете ду́хи,/ богоно́снии безсре́бреницы,/ моли́твенницы о душа́х на́ших. [Два́жды.]

Стра́сти безслове́сныя/ поко́рше, святи́и,/ душе́вными си́лами,/ человеком и ското́мъ/ благодея́ние подава́ете,/ от Христа́ дарова́нием исцеле́ний обога́щшеся./ Темже свяще́нное ва́ше/ и светоно́сное торжество́ соверша́юще,/ про́сим очище́ния душа́м на́шим.

Боже́ственный хра́м ва́ш/ я́ко не́бо показа́ся, светоза́рно и спасе́нно,/ я́ко звезды, чудеса́ спаси́тельная/ ны́не притяжа́въ/ и, я́коже со́лнце светло,/ исцеле́ний Боже́ственное действо,/ Космо́ преблаже́нне,/ Дамиа́не пресла́вне,/ Госпо́дни служи́тели,/ моли́твенницы о душа́х на́ших.

Слáва Отцу́ и Сы́ну и Святóму Ду́ху.

Глас 8.

Кто́ не удиви́тся,/ кто́ не просла́вит,/ кто́ не воспое́т верно,/ му́дрых и пресла́вных безсре́бреник чудеса́?/ Яко да и по свято́м их преставле́нии всем подаю́т,/ притека́ющим верою, бога́тно исцеле́ния,/ и честны́я и святы́я мо́щи тех/ источа́ют благода́ть исцеле́ний./ О, дво́ице свята́я!/ О, честны́я главы́!/ О, прему́дросте и сла́во, я́же от Бо́га да́нныя ва́м благода́ти!/ Темже песньми зове́м Благодетелю Бо́гу,// показа́вшему тех на врачева́ние ду́ш и теле́с на́ших.

И ны́не и при́сно и во вéки векóв. Ами́нь.

Богородичен: [Влады́чице, приими́ моли́твы ра́б Твои́х и изба́ви на́с от вся́кия ну́жды и печа́ли.]

Стихиры на стиховне

Глас 1.
Подо́бен: «Небе́сных чино́в…»

Чуде́с луча́ми облиста́вше вселе́нную всю́,/ святи́и безме́здницы,/ пресветлии свети́льницы,/ небеси́ уподо́бистеся благода́тию,/ высо́каго жи́тельства добродетельми,/ звезды предлага́еми.

Стих: Святы́м, и́же су́ть на земли́ Его́,/ удиви́ Госпо́дь вся́ хотения Своя́ в ни́х.

Дождеро́дныя о́блаки, преизя́ществующа/ многотеку́щими благода́тей чудесы́,/ му́ченицы Госпо́дни,/ всю́ зе́млю мы́сленно напоя́ете,/ здра́вая песнопения Бо́гу/ приноси́ти понужда́юща.

Стих: Се́ что́ добро́, или́ что́ красно́,/ но е́же жи́ти бра́тии вку́пе.

Исцеля́ти стра́сти души́ и телесе́/ хи́трость от Бо́га и́стинно прие́мше,/ му́ченицы Госпо́дни,/ преесте́ственно исцеля́ете вся́/ не человеческими лечба́ми враче́бными,/ но Боже́ственными дохнове́ньми.

Слáва Отцу́ и Сы́ну и Святóму Ду́ху.

Глас 6.

Всегда́ иму́ще Христа́, действующа в ва́с, святи́и безсре́бреницы, чудодействуете в ми́ре, боля́щия исцеля́ете, и́бо врачевство́ ва́ше исто́чник е́сть неисчерпа́емый: че́рплемый же, па́че изоби́льно истека́ет, и излива́емь, изоби́луетъ; на ки́йждо де́нь истощева́емь, и умножа́емь, всем подая́, и неоскудева́емь пребыва́я; и че́рплющии насыща́ются исцеле́ния, то́й же пребыва́ет неиждиву́щь. Что́ у́бо ва́с нарече́мъ? цели́тельных ли враче́в ду́ш же и теле́съ? цели́телей страсте́й неисцельных, ту́не исцеля́ющих всех, прие́мших дарова́ние от Спа́са Христа́, подаю́щаго нам ве́лию ми́лость.

И ны́не и при́сно и во вéки векóв. Ами́нь.

Глас то́йже.

Богородичен: [Богоро́дице, Ты́ еси́ лоза́ и́стинная,/ возрасти́вшая на́м Пло́д живота́,/ Тебе мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.]

Тропарь

Глас 8.

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:// ту́не прия́сте, ту́не дади́те на́м.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Иже на́с ра́ди рожде́йся от Девы,/ и распя́тие претерпев, Благи́й,/ испрове́ргий сме́ртию сме́рть/ и Воскресе́ние явле́й я́ко Бо́г,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве./ Приими́ ро́ждшую Тя́, Богоро́дицу, моля́щуюся за ны́,// и спаси́, Спа́се на́ш, лю́ди отча́янныя.

Великая Вечерня

«Блаже́н муж…»
1-й антифон

Псалом 1.

Блаже́н муж, и́же не и́де на сове́т нечести́вых и на пути́ гре́шных не ста, и на седа́лищи губи́телей не се́де, но в зако́не Госпо́дни во́ля его́, и в зако́не Его́ поучи́тся день и нощь. И бу́дет я́ко дре́во насажде́нное при исхо́дищих вод, е́же плод свой даст во вре́мя свое́, и лист его́ не отпаде́т, и вся, ели́ка а́ще твори́т, успе́ет. Не та́ко нечести́вии, не та́ко, но я́ко прах, его́же возмета́ет ветр от лица́ земли́. Сего́ ра́ди не воскре́снут нечести́вии на суд, ниже́ гре́шницы в сове́т пра́ведных. 6 Я́ко весть Госпо́дь путь пра́ведных, и путь нечести́вых поги́бнет.

Припев: Аллилу́ия, аллилу́ия, аллилу́ия.

Псалом 2.

Вску́ю шата́шася язы́цы, и лю́дие поучи́шася тще́тным? Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́. Расто́ргнем у́зы их и отве́ржем от нас и́го их. Живы́й на Небесе́х посмее́тся им, и Госпо́дь поруга́ется им. Тогда́ возглаго́лет к ним гне́вом свои́м и я́ростию Свое́ю смяте́т я́. Аз же поста́влен есмь Царь от Него́ над Сио́ном, горо́ю свято́ю Его́ возвеща́яй повеле́ние Госпо́дне. Госпо́дь рече́ ко Мне: Сын Мой еси́ Ты, Аз днесь роди́х Тя́. Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́. Упасе́ши я́ жезло́м желе́зным, я́ко сосу́ды скуде́льничи сокруши́ши я. И ны́не, ца́рие, разуме́йте, накажи́теся вси судя́щии земли́. Рабо́тайте Го́сподеви со стра́хом и ра́дуйтеся Ему́ с тре́петом. Приими́те наказа́ние, да не когда́ прогне́вается Госпо́дь и поги́бнете от пути́ пра́веднаго, егда́ возгори́тся вско́ре я́рость Его́. Блаже́ни вси наде́ющиися Нань.

Псалом 3.

Го́споди, что ся умно́жиша стужа́ющии ми? Мно́зи востаю́т на мя: Мно́зи глаго́лют души́ мое́й: несть спасе́ния ему́ в Бо́зе его́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой: я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

Стихиры на «Го́споди, воззва́х…» (на 8)

Глас 1.
Подо́бен: «Небе́сных чино́в…»

Чуде́сными заря́ми/ болезней на́ших отжени́те вся́к неду́г,/ безсре́бренно благода́ть простира́юще,/ дарова́ньми Учи́теля обога́щшеся,/ на земли́ болезни земноро́дныхъ/ взе́мшаго на ра́мех Свои́х. Дважды.

Враче́бне, у́бо пе́рвее,/ наказа́вшеся до́бре,/ болезни всем очища́ете верою,/ второ́е же, па́ки/ духо́вно себе́ вооружи́вше,/ отгоня́ете боже́ственне/ и душе́вных неду́г врежде́ния.

Яко безсре́бренно благода́ть от Христа́ Бо́га прие́мше,/ всем безсре́бренно исцеля́ете,/ безсре́бреницы, неду́ги,/ не то́кмо на́ша болезни очища́ете,/ но и ското́м даю́ще слове́сно исправле́ние,/ я́ко ми́лостиви.

Глас 4.
Подобен: «Да́л еси́ зна́мение…»

Вода́ми духо́вными,/ я́ко реки, наводня́емы,/ и, я́ве напо́лншеся, тва́рь напоя́ете/ богозна́меньми и пресла́вными исцеле́ний дарова́нии,/ и душетленныя стра́сти изсуша́ете,/ и неду́ги исцеля́ете,/ и отгоня́ете ду́хи,/ богоно́снии безсре́бреницы,// моли́твенницы о душа́х на́ших. Дважды.

Стра́сти безслове́сныя/ поко́рше, святи́и,/ душе́вными си́лами,/ человеком и ското́мъ/ благодея́ние подава́ете,/ от Христа́ дарова́нием исцеле́ний обога́щшеся./ Темже свяще́нное ва́ше/ и светоно́сное торжество́ соверша́юще,// про́сим очище́ния душа́м на́шим.

Боже́ственный хра́м ва́шъ/ я́ко не́бо показа́ся, светоза́рно и спасе́нно,/ я́ко звезды, чудеса́ спаси́тельна/ ны́не притяжа́въ/ и, я́коже со́лнце светло,/ исцеле́ний Боже́ственное действо,/ Космо́ преблаже́нне, Дамиа́не пресла́вне,/ Госпо́дни служи́тели,// моли́твенницы о душа́х на́ших.

Слáва Отцу́ и Сы́ну и Святóму Ду́ху.

Глас 6.

Безконе́чна е́сть святы́х благода́ть,/ ю́же от Христа́ прия́ша,/ темже и мо́щи и́х от Боже́ственныя си́лы непреста́нно действуют чудеса́,/ и́хже и имена́, верою призыва́ема,/ неисцельныя болезни исцеля́ют;/ и́миже, Го́споди, и на́с душе́вных и теле́сных страсте́й свободи́,// я́ко Человеколю́бец.

И ны́не и при́сно и во вéки векóв. Ами́нь.

Глас то́йже.

Богородичен: Кто́ Тебе не ублажи́т, Пресвята́я Дево?/ Кто́ ли не воспое́т Твоего́ Пречи́стаго Рождества́?/ Безлетно бо от Отца́ возсия́вый Сы́н Единоро́дный,/ То́йже от Тебе́, Чи́стыя, про́йде,/ неизрече́нно вопло́щся:/ естество́м Бо́г Сы́й/ и естество́м бы́в Человек на́с ра́ди;/ не во двою́ лицу́ разделя́емый,/ но во двою́ естеству́ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Паремии

Проро́чества Иса́иина чте́ние.

Та́ко глаго́лет Госпо́дь: вси́ язы́цы собра́шася вку́пе, и соберу́тся кня́зи от ни́х, кто́ возвести́т сия́ в ни́хъ? Или́ я́же от нача́ла, кто́ слы́шана сотвори́т ва́мъ? Да приведу́т свидетели своя́ и оправдя́тся, и да услы́шат, и да реку́т и́стину. Бу́дите Ми́ свидетели, и Аз Свидетель, глаго́лет Госпо́дь Бо́г, и отрок, его́же избра́х, да позна́ете и веруете Ми́, и разумеете, я́ко Аз е́смь; пре́жде Мене́ не бы́сть и́н бо́г, и по Мне не бу́дет. Аз е́смь Бо́г, и несть ра́зве Мене́ спаса́яй. Аз возвести́х и спасо́х, уничижи́х, и не бе в ва́с чу́ждий. Вы́ Мне свидетели, и Аз Госпо́дь Бо́г. И еще́ от нача́ла Аз е́смь, и несть от ру́к Мои́х избавля́яй; сотворю́, и кто́ отврати́т то? Си́це глаго́лет Госпо́дь Бо́г, избавля́яй ва́с Святы́й Изра́илев.

Прему́дрости Соломо́новы чте́ние.

Пра́ведных ду́ши в руце Бо́жией, и не прико́снется и́х му́ка. Непщева́ни бы́ша во очесех безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м человеческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благодетельствовани бу́дут, я́ко Бо́г искуси́ я́ и обрете и́х досто́йны Себе. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во веки. Надеющиися На́нь разумеют и́стину и вернии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

Прему́дрости Соломо́новы чте́ние.

Пра́ведницы во веки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благолепия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицемерен. Прии́мет щи́т непобеди́мый — преподо́бие, поостри́т же напра́сный гнев — во ору́жие, спобо́рет же с ни́м ми́р на безу́мныя. По́йдут праволу́чныя стрелы мо́лниины и, я́ко от благокру́гла лу́ка облако́в, на намерение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, реки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, развеет и́х, и опустоши́т всю́ зе́млю беззако́ние, и злодейство преврати́т престо́лы си́льных. Слы́шите у́бо, ца́рие, и разумейте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

Стихиры на литии

Глас 2.

Вра́чеве немощству́ющих,/ сокро́вища врачева́ний,/ спаси́телие верных,/ безсре́бреницы всесла́внии,/ в ну́ждах зову́щия и боля́щия исцели́те,/ моля́ще Бо́га блага́го// изба́витися на́м от сетей вра́жиих.

Исто́чник исцеле́ний/ еди́наго то́кмо в лете исцелева́ше,/ хра́м же безсре́бреников все мно́жество исцеля́ет неду́гующих:/ неоску́дно бо есть и неиждива́емое бога́тство святы́х.// Тех моли́твами, Христе́, поми́луй на́с.

Ра́дуется ли́к святы́х во веки,/ Ца́рство бо небе́сное наследоваша;/ земля́, мо́щи их прие́мши,/ благово́ние распусти́,/ раби́ Христо́вы бы́ша,// все́лившеся в жи́знь вечную.

Слáва Отцу́ и Сы́ну и Святóму Ду́ху.

Глас 6.

Безконе́чна е́сть святы́х благода́ть, ю́же от Христа́ прия́ша, темже и мо́щи и́х от Боже́ственныя си́лы непреста́нно действуют чудеса́, и́хже и имена́, верою призыва́ема, неисцельныя болезни исцеля́ютъ; и́миже, Го́споди, и на́с душе́вных и теле́сных страсте́й свободи́, я́ко Человеколю́бец.

И ны́не и при́сно и во вéки векóв. Ами́нь.

Глас то́йже.

Преложе́ние скорбя́щих,/ премене́ние боля́щих еси́, Богоро́дице Всепетая,/ спаси́ гра́д и лю́ди, бори́мых умире́ние,/ обурева́емых тишина́,// Еди́на предста́тельнице верных.

Стихиры на стиховне

Глас 1.
Подо́бен: «Небе́сных чино́в…»

Чуде́с луча́ми облиста́вше вселе́нную всю́,/ святи́и безме́здницы,/ пресветлии свети́льницы,/ небеси́ уподо́бистеся благода́тию,/ высо́каго жи́тельства добродетельми,/ звезды предлага́еми.

Стих: Святы́м, и́же су́ть на земли́ Его́,/ удиви́ Госпо́дь вся́ хотения Своя́ в ни́х.

Дождеро́дныя о́блаки, преизя́ществующа/ многотеку́щими благода́тей чудесы́,/ му́ченицы Госпо́дни,/ всю́ зе́млю мы́сленно напоя́ете,/ здра́вая песнопения Бо́гу/ приноси́ти понужда́юща.

Стих: Се́ что́ добро́, или́ что́ красно́,/ но е́же жи́ти бра́тии вку́пе.

Исцеля́ти стра́сти души́ и телесе́/ хи́трость от Бо́га и́стинно прие́мше,/ му́ченицы Госпо́дни,/ преесте́ственно исцеля́ете вся́/ не человеческими лечба́ми враче́бными,/ но Боже́ственными дохнове́ньми.

Слáва Отцу́ и Сы́ну и Святóму Ду́ху.

Глас 8.

Кто́ не удиви́тся,/ кто́ не просла́вит,/ кто́ не воспое́т верно,/ му́дрых и пресла́вных безсре́бреник чудеса́?/ Яко да и по свято́м их преставле́нии всем подаю́т,/ притека́ющим верою, бога́тно исцеле́ния,/ и честны́я и святы́я мо́щи тех/ источа́ют благода́ть исцеле́ний./ О, дво́ице свята́я!/ О, честны́я главы́!/ О, прему́дросте и сла́во, я́же от Бо́га да́нныя ва́м благода́ти!/ Темже песньми зове́м Благодетелю Бо́гу,// показа́вшему тех на врачева́ние ду́ш и теле́с на́ших.

И ны́не и при́сно и во вéки векóв. Ами́нь.

Глас то́йже.

Безневестная Дево,/ Яже Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,// моли́ спасти́ся всем на́м.

Тропарь

Глас 8.

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:// ту́не прия́сте, ту́не дади́те на́м. Дважды.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Глас 4.

Богоро́дице Де́во, ра́дуйся,/ благода́тная Мари́е, Госпо́дь с Тобо́ю:/  благослове́на Ты в жена́х,/ и благослове́н Плод чре́ва Твоего́,// я́ко Спа́са родила́ еси́ душ на́ших.

Утреня.

Тропари на «Бог Господь…»

Глас 8.

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:// ту́не прия́сте, ту́не дади́те на́м. Дважды.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Глас то́йже.

Иже на́с ра́ди рожде́йся от Девы,/ и распя́тие претерпев, Благи́й,/ испрове́ргий сме́ртию сме́рть/ и Воскресе́ние явле́й я́ко Бо́г,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве./ Приими́ ро́ждшую Тя́, Богоро́дицу, моля́щуюся за ны́,// и спаси́, Спа́се на́ш, лю́ди отча́янныя.