Великое освящение воды

Главная страница · Праздники · Святое Богоявление · Всенощное бдение и Литургия свт. Иоанна Златоуста

Тропари

Глас 8.

Глас Госпо́день на вода́х вопие́т, глаго́ля:/ прииди́те, приими́те вси/ Ду́ха прему́дрости,/ Ду́ха ра́зума,/ Ду́ха стра́ха Бо́жия,// я́вльшагося Христа́. [Трижды]

Днесь вод освяща́ется естество́,/ и разделя́ется Иорда́н,/ и свои́х вод возвраща́ет струи́,// Влады́ку зря креща́ема. [Дважды]

Я́ко Челове́к, на реку́ прише́л еси́, Христе́ Царю́,/ и ра́бское Креще́ние прия́ти тщи́шися, Бла́же,/ от Предте́чеву руку́// грех ра́ди на́ших, Человеколю́бче. [Дважды]

Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в, ами́нь.

Ко гла́су вопию́щаго в пусты́ни:/ угото́вайте путь Госпо́день,/ прише́л еси́, Го́споди, зрак ра́бий прии́м,/ Креще́ния прося́, не ве́дый греха́./ Ви́деша Тя во́ды и убоя́шася./ Тре́петен бысть Предте́ча и возопи́, глаго́ля:/ ка́ко просвети́т свети́льник Све́та?/ Ка́ко руку́ положи́т раб на Влады́ку?// Освяти́ мене́ и во́ды, Спа́се, взе́мляй ми́ра грех.

Чтение паремий

Проро́чества Иса́иина чте́ние.

Та́ко глаго́лет Госпо́дь: да возвесели́тся пусты́ня жа́ждущая, да возра́дуется пусты́ня и процвете́т, я́ко крин, и да прозя́бнет, и вся возвеселя́тся. И возра́дуются пусты́нная Иорда́нова, и сла́ва Лива́нова дана́ бысть ей и честь Карми́лова, и лю́дие Мои́ у́зрят сла́ву Госпо́дню и высоту́ Бо́жию. Укрепи́теся, ру́ки осла́бленныя, и, коле́на разсла́бленная, уте́шитеся, и рцы́те малоду́шным мы́слию: укрепи́теся и не бо́йтеся, се Бог наш суд воздае́т, Той прии́дет и спасе́т нас. Тогда́ отве́рзутся очеса́ слепы́х, и ушеса́ глухи́х услы́шат. Тогда́ ско́чит хромы́й, я́ко еле́нь, и я́сен бу́дет язы́к гугни́вых, я́ко прорази́ся в пусты́ни вода́ и дебрь в земли́ жа́ждущей. И бу́дет безво́дная в бла́та, и в жа́ждущей земли́ исто́чник воды́ бу́дет. Та́мо бу́дет весе́лие птиц, водворе́ние си́ринов, и тро́стий, и бла́та. Та́мо бу́дет путь чист, и путь свят нарече́тся, и не мимои́дет та́мо нечи́ст, ниже́ бу́дет та́мо путь нечи́стый, разсе́яннии же по́йдут по нему́, и не заблу́дят. И не бу́дет та́мо льва, ниже́ от звере́й лю́тых взы́дет нань, ниже́ обря́щется та́мо, но по́йдут по нему́ изба́вленнии и со́браннии от Го́спода, и обратя́тся, и прии́дут в Сио́н с весе́лием и ра́достию, и весе́лие ве́чное над главо́ю их. Хвала́, и ра́дование, и весе́лие пости́гнет их, отбеже́ боле́знь, печа́ль и воздыха́ние.

Проро́чества Иса́иина чте́ние.

Та́ко глаго́лет Госпо́дь: жа́ждущии, на во́ду иди́те, и, ели́цы не и́мате сребра́, ше́дше, купи́те, и яди́те и пи́йте без сребра́ и цены́ вино́ и тук. Вску́ю цените́ сребро́ не в хле́бы и труд ваш не в сы́тость? Послу́шайте Мене́ и сне́сте блага́я, и наслади́тся во благи́х душа́ ва́ша. Внима́йте уши́ма ва́шима и после́дуйте путе́м Мои́м, услы́шите Мене́, и жива́ бу́дет во благи́х душа́ ва́ша. И завеща́ю вам заве́т ве́чен, преподо́бная Дави́дова ве́рная. Се свиде́тельство во язы́цех, дах Его́ Кня́зя и Повели́теля во язы́цех. Се язы́цы, и́же не ве́дяху Тя, призову́т Тя, и лю́дие, и́же не позна́ша Тя, к Тебе́ прибе́гнут, ра́ди Го́спода Твоего́ и Свята́го Изра́илева, я́ко просла́вих Тя. Взыщи́те Бо́га, и внегда́ вам обрести́ Его́, призови́те. Егда́ же а́ще прибли́жится вам, да оста́вит нечести́вый пути́ своя́ и муж беззако́нный сове́ты своя́. И обрати́теся ко Го́споду Бо́гу ва́шему и поми́ловани бу́дете, я́ко помно́гу оста́вит грехи́ ва́ша. Не суть бо сове́ти Мои́, я́коже сове́ти ва́ши, ниже́ я́коже путие́ ва́ши, путие́ Мои́, – глаго́лет Госпо́дь. Но я́коже отстои́т Не́бо от земли́, та́ко отстои́т путь Мой от путе́й ва́ших, и размышле́ния ва́ша от мы́сли Моея́. Я́коже бо а́ще сни́дет дождь или́ снег с Небесе́ и не возврати́тся отту́ду, до́ндеже упои́т зе́млю, и роди́т, и прозя́бнет, и даст се́мя се́ющему и хлеб в снедь, та́ко бу́дет глаго́л Мой, и́же а́ще изы́дет из уст Мои́х и не обрати́тся ко Мне тощ, до́ндеже а́ще сконча́ет вся, ели́ка восхоте́х, и поспешу́ пути́ Моя́ и повеле́ния Моя́. Весе́лием бо изы́дете и ра́достию научи́теся, го́ры бо и хо́лми ско́чат, жду́ще вас в ра́дости, и вся древеса́ се́льная воспле́щут ве́твьми. И вме́сто дра́чия взы́дет кипари́с, вме́сто же кропи́вы взы́дет мирси́на. И бу́дет Госпо́дь во и́мя и в зна́мение ве́чное и не оскуде́ет.

Проро́чества Иса́иина чте́ние.

Та́ко глаго́лет Госпо́дь: почерпи́те во́ду с весе́лием от исто́чник спасе́ния. И рече́ши в день он: испове́дайтеся Го́сподеви и призови́те И́мя Его́, возвести́те во язы́цех сла́ву Его́. Помяни́те, я́ко вознесе́ся И́мя Его́. По́йте И́мя Госпо́дне, я́ко высо́кая сотвори́. Возвести́те сия́ по всей земли́, ра́дуйтеся и весели́теся, живу́щии в Сио́не, я́ко вознесе́ся Святы́й Изра́илев посреде́ его́.

Прокимен

Прокимен, глас 3: Госпо́дь просвеще́ние мое́ и Спаси́тель мой, кого́ убою́ся?

Стих: Госпо́дь Защи́титель живота́ моего́, от кого́ устрашу́ся?

Чтение Апостола

К Коринфяном посла́ния свята́го Апо́стола Па́вла чте́ние.
зачало 143

Бра́тие, не хощу́ вас не ве́дети, я́ко отцы́ на́ши вси под о́блаком бы́ша и вси сквозе́ мо́ре проидо́ша. И вси в Моисе́я крести́шася во о́блаце и в мо́ри: И вси то́жде бра́шно духо́вное ядо́ша. И вси то́жде пи́во духо́вное пи́ша, пия́ху бо от духо́внаго после́дующаго ка́мене, ка́мень же бе Христо́с.

Аллилуарий

Аллилуия, глас 4: Глас Госпо́день на вода́х: Бог сла́вы возгреме́, Госпо́дь на вода́х мно́гих.

Чтение Евангелия

От Ма́рка свята́го Ева́нгелия чте́ние.
зачало 2

Во вре́мя о́но прии́де Иису́с от Назаре́та Галиле́йскаго и крестися от Иоанна во Иордане. И а́бие восходя́ от воды́, ви́де разводя́щася Небеса́ и Дух, я́ко го́лубь, сходя́щ Нань. И глас бысть с Небесе́: Ты еси́ Сын Мой возлю́бленный, о Не́мже благоволи́х.

Великая ектения

Освящение воды

Священник: Ве́лий еси́, Го́споди, и чу́дна дела́ Твоя́, и ни еди́но же сло́во дово́льно бу́дет к пе́нию чуде́с Твои́х. [Трижды]

Ты бо, хоте́нием от не су́щих во е́же бы́ти приведы́й вся́ческая, и Твое́ю держа́вою содержи́ши тварь, и Твои́м про́мыслом стро́иши мир, Ты, от четы́рех стихи́й тварь сочини́вый, четы́рми времены́ круг ле́та венча́л еси́. Тебе́ трепе́щут у́мныя вся си́лы, Тебе́ пое́т со́лнце, Тебе́ сла́вит луна́, Тебе́ прису́тствуют зве́зды, Тебе́ слу́шает свет, Тебе́ трепе́щут бе́здны, Тебе́ рабо́тают исто́чницы. Ты просте́рл еси́ не́бо, я́ко ко́жу, Ты утверди́л еси́ зе́млю на вода́х, Ты огради́л еси́ мо́ре песко́м, Ты ко отдыха́нием возду́х пролия́л еси́. А́нгельския си́лы Тебе́ слу́жат, Арха́нгельстии ли́цы Тебе́ кла́няются, многоочи́тии Херуви́ми и шестокрила́тии Серафи́ми, о́крест стоя́ще и облета́юще, стра́хом непристу́пныя сла́вы Твоея́ покрыва́ются. Ты бо, Бог Сый Неопи́санный, Безнача́льный же и Неизглаго́ланный, прише́л еси́ на зе́млю, зрак раба́ прии́м, в подо́бии челове́честем быв, не бо терпе́л еси́, Влады́ко, милосе́рдия ра́ди ми́лости Твоея́ зре́ти от диа́вола му́чима ро́да челове́ча, но прише́л еси́ и спасл еси́ нас. Испове́дуем благода́ть, пропове́дуем ми́лость, не таи́м благодея́ния: естества́ на́шего ро́ды свободи́л еси́, де́вственную освяти́л еси́ утро́бу рождество́м Твои́м. Вся тварь воспева́ет Тя, я́вльшагося: Ты бо, Бог наш, на земли́ яви́лся еси́ и с челове́ки пожи́л еси́, Ты Иорда́нския струи́ освяти́л еси́, с Небесе́ низпосла́вый Свята́го Твоего́ Ду́ха, и главы́ та́мо гнездя́щихся сокруши́л еси́ змие́в.

Примечание: При троекратном произнесении слов «Ты убо, Человеколюбче Царю…» священник каждый раз благословляет воду рукой, не погружая руку в воду.

Священник: Ты у́бо, Человеколю́бче Царю́, прииди́ и ны́не наи́тием Свята́го Твоего́ Ду́ха и освяти́ во́ду сию́. [Трижды]

И даждь ей благода́ть избавле́ния, благослове́ние Иорда́ново, сотвори́ ю нетле́ния исто́чник, освяще́ния дар, грехо́в разреше́ние, неду́гов исцеле́ние, де́монов всегуби́тельство, сопроти́вным си́лам непристу́пную, А́нгельския кре́пости испо́лненную, да вси, почерпа́ющии и причаща́ющиися, име́ют ю ко очище́нию душ и теле́с, ко исцеле́нию страсте́й, ко освяще́нию домо́в и ко вся́кой по́льзе изря́дну. Ты бо еси́ Бог наш, И́же водо́ю и Ду́хом обнови́вый обетша́вшее грехо́м естество́ на́ше. Ты еси́ Бог наш, водо́ю потопи́вый при Но́и грех. Ты еси́ Бог наш, И́же мо́рем свободи́вый от рабо́ты фара́они Моисе́ом род евре́йский. Ты бо еси́ Бог наш, разрази́вый ка́мень в пусты́ни, и потеко́ша во́ды, и пото́цы наводни́шася, и жа́ждущия лю́ди Твоя́ насы́тивый. Ты еси́ Бог наш, И́же водо́ю и огне́м премени́вый Илие́ю Изра́иля от пре́лести Ваа́ловы.

Сам и ны́не, Влады́ко, освяти́ во́ду сию́ Ду́хом Твои́м Святы́м. [Трижды]

Даждь же всем, прикаса́ющимся ей, и причаща́ющимся, и ма́жущимся е́ю, освяще́ние, здра́вие, очище́ние и благослове́ние.

Спаси́, Го́споди, и поми́луй Вели́каго Господи́на и Отца́ на́шего Кирилла, Святе́йшаго Патриа́рха Моско́вского и всея́ Руси́, и [Высоко]преосвяще́ннейшего митрополи́та [имя]. И сохрани́ их под кро́вом Твои́м в ми́ре, покори́ им вся́каго врага́ и супоста́та, да́руй им вся, я́же ко спасе́нию проше́ния, и жизнь ве́чную, да и стихи́ями, и челове́ки, и А́нгелы, и ви́димыми, и неви́димыми сла́вится Твое́ Пресвято́е И́мя, со Отце́м и Святы́м Ду́хом, ны́не, и при́сно, и во ве́ки веко́в.

Хор: Ами́нь.

Священник: Мир всем.

Хор: И ду́хови твоему́.

Диакон: Главы́ ва́ша Го́сподеви приклони́те.

Хор: Тебе, Го́споди.

Священник, преклонившись, молится тайно:

Приклони́, Го́споди, у́хо Твое́ и услы́ши ны, И́же во Иорда́не крести́тися изво́ливый и освяти́вый во́ды, благослови́ всех нас, и́же приклоне́нием своея́ вы́и назна́менующих рабо́тное воображе́ние, и сподо́би нас испо́лнитися освяще́ния Твоего́ причаще́нием воды́ сея́, и да бу́дет нам, Го́споди, во здра́вие души́ и те́ла.

Священник (возглашает): Ты бо еси́ освяще́ние на́ше, и Тебе́ сла́ву, и благодаре́ние, и поклоне́ние возсыла́ем со Безнача́льным Твои́м Отце́м и Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в.

Хор: Ами́нь.

Примечание: После возгласа иерей крестообразно благословляет воду Честным Крестом, погружая его, взяв перстами обеих рук за концы перекладины. При этом духовенство поет начало тропаря, а хор завершает, и так трижды.

Тропарь Богоявления Господня

Духовенство: Во Иoрда́не креща́ющуся Тебе́, Го́споди,/

Хор: Тро́йческое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не/ изве́ствоваше словесе́ утвержде́ние./ Явле́йся Христе́ Бо́же// и мир просвеще́й, сла́ва Тебе́.

Примечание: После этого иерей, держа Крест в левой руке, кропит крестообразно на четыре стороны (восток, запад, юг и север). Затем, после кропления на четыре стороны при пении на «Слава, и ныне» праздничной стихиры, глас 6-й: «Воспоим, вернии…» священнослужители входят в алтарь.

Стихира праздника

Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в, ами́нь.

Глас 6.

Воспои́м, ве́рнии,/ е́же о нас Бо́жия благодея́ния вели́чество:/ о на́шем бо прегреше́нии быв Челове́к,/ на́шим очище́нием очища́ется во Иорда́не,/ Еди́н Чи́стый и Нетле́нный,/ освяща́яй мене́ и во́ды/ и главы́ змие́в сокруша́яй в воде́./ Почерпе́м у́бо во́ду с весе́лием, бра́тие:/ благода́ть бо Ду́ха ве́рно почерпа́ющим/ неви́димо подава́ется от Христа́ Бо́га// и Спа́са душ на́ших.

Хор: Бу́ди И́мя Госпо́дне благослове́но от ны́не и до ве́ка. [Трижды]

Псалом 33

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся А́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто́ есть челове́к хотя́й живо́т,/ любя́й дни ви́дети бла́ги?/ Удержи́ язы́к твой от зла,/ и устне́ твои́, е́же не глаго́лати льсти./ Уклони́ся от зла и сотвори́ бла́го./ Взыщи́ ми́ра, и пожени́ и́./ О́чи Госпо́дни на пра́ведныя,/ и у́ши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их,/ и от всех скорбе́й их изба́ви их./ Близ Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от всех их изба́вит я́ Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Смерть гре́шников люта́,/ и ненави́дящии пра́веднаго прегреша́т./ Изба́вит Госпо́дь ду́ши раб Свои́х,/ и не прегреша́т// вси, упова́ющии на Него́.

Священник: Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.

Хор: Ами́нь.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Хор: Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в. Ами́нь.

Го́споди, поми́луй. [Трижды]

Благослови́.

Отпуст

Священник: И́же во Иорда́не крести́тися изво́ливый от Иоа́нна, на́шего ра́ди спасе́ния, Христо́с, И́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.

Примечание: По отпусте Литургии на середине храма поставляется горящий светильник, и около него вышедшие из алтаря священнослужители поют тропарь и кондак праздника. Величание не поётся.

Славление

Глас 1.

Во Иoрда́не креща́ющуся Тебе́, Го́споди,/ Тро́йческое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не/ изве́ствоваше словесе́ утвержде́ние./ Явле́йся Христе́ Бо́же// и мир просвеще́й, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в. Ами́нь.

Глас 4.

Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́ и яви́лся еси́,// Свет Непристу́пный.

Многолетие

Вели́каго Господи́на и Отца́ на́шего Кири́лла,/ Святе́йшаго Патриа́рха Моско́вского и всея́ Руси́,/ и Господи́на на́шего [Высоко]Преосвяще́ннейшаго [имя],/ [титул],/ богохрани́мую страну́ на́шу Росси́йскую,/ настоя́теля, бра́тию и прихо́жан свята́го хра́ма сего́, и вся Правосла́вныя христиа́ны,// Го́споди, сохрани́ их на мно́гая ле́та.

Источники

• Последование.рф [сайт] / Предпра́зднство Богоявле́ния. На́вечерие Богоявле́ния (Креще́нский соче́льник). Сщмч. Феопе́мпта, еп. Никомиди́йского и мч. Фео́ны волхва́. Прп. Синклитики́и Александри́йской.

Главная страница · Праздники · Святое Богоявление · Всенощное бдение и Литургия свт. Иоанна Златоуста · Наверх