Зачало 22 (в субботу третью по Пасхе)
Прокимен
Прокимен, глас 6: Спаси́, Го́споди, лю́ди Твоя́, / и благослови́ достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от мене́.
Зачало 22
Дея́ний святы́х апо́стол чте́ние.
Во дни о́ны, бысть Савл с су́щими в Дама́сце ученика́ми дни не́кия, и а́бие на со́нмищах пропове́даше Иису́са, я́ко Сей есть Сын Бо́жий. Дивля́хуся же вси слы́шащии и глаго́лаху: не сей ли есть гони́вый во Иерусали́ме нарица́ющыя и́мя сие́, и зде на сие́ прии́де, да свя́заны ты́я приведе́т ко архиере́ем? Савл же па́че крепля́шеся и смуща́ше иуде́и живу́щыя в Дама́сце, препира́я, я́ко Сей есть Христо́с. Я́коже испо́лнишася дни́е дово́льни, совеща́ша Иуде́е уби́ти его́. Уве́дан же бысть Са́влу сове́т их: стрежа́ху же врат день и нощь, я́ко да убию́т его́. Пое́мше же его́ ученицы́ но́щию, све́сиша по стене́ в ко́шнице. Прише́д же Савл во Иерусали́м, покуша́шеся прилепля́тися ученико́м, и вси боя́хуся его́, не ве́рующе, я́ко есть учени́к. Варна́ва же прие́м его́, приведе́ ко Апо́столом и пове́да им, ка́ко на пути́ ви́де Го́спода, и я́ко глаго́ла ему́, и ка́ко в Дама́сце дерза́ше о и́мени Иису́сове. И бя́ше с ни́ми входя́ и исходя́ во Иерусали́ме и дерза́я о и́мени Го́спода Иису́са. Глаго́лаше же и стяза́шеся с Е́ллины: они́ же иска́ху уби́ти его́. Разуме́вше же бра́тия, сведо́ша его́ в Кесари́ю и отпусти́ша его́ в Тарс. Це́ркви же по всей Иуде́и и Галиле́и и Самари́и име́яху мир, созида́ющеся и ходя́ще в стра́се Госпо́дни, и утеше́нием Свята́го Ду́ха умножа́хуся. Деян.9:19–31
Аллилуарий
Аллилуиа, глас 8: Благоволи́л еси́, Го́споди, зе́млю Твою́, возврати́л еси́ плен Иа́ковль. Стих: Ми́лость и и́стина срето́стеся, пра́вда и мир облобыза́стася.