Зачало 41 (в среду отдания Пасхи)
Прокимен
Прокимен, глас 8: Сей день, его́же сотвори́ Госпо́дь, / возра́дуемся и возвесели́мся вонь. Стих: Испове́дайтеся Го́сподеви я́ко благ, я́ко в век ми́лость Его́.
Зачало 41
Дея́ний святы́х апо́стол чте́ние.
Во дни о́ны, сшед Па́вел в Кесари́ю, возше́д и целова́в це́рковь, сни́де во Антиохи́ю, и сотво́рь вре́мя не́кое, изы́де, проходя́ поря́ду Галати́йскую страну́ и Фриги́ю, утвержда́я вся ученики́. Иуде́анин же не́кто, Аполло́с и́менем, алекса́ндрянин ро́дом, муж слове́сен, прии́де во Ефе́с, си́лен сый в кни́гах. Сей бе оглаше́н пути́ Госпо́дню, и горя́ ду́хом, глаго́лаше и уча́ше изве́стно я́же о Го́споде, ве́дый то́кмо креще́ние Иоа́нново. Сей же нача́т дерза́ти на со́нмищах. Слы́шавша же его́ Аки́ла и Приски́лла, прия́ша его́ и изве́стнее тому́ сказа́ша путь Госпо́день. Хотя́щу же ему́ преити́ во Аха́ию, предпосла́вше бра́тия написа́ша ученико́м прия́ти его́, и́же прише́д та́мо посо́бствова мно́го ве́ровавшым благода́тию. Тве́рдо бо иуде́и не престая́ облича́ше пред людьми́, сказу́я Писа́ньми, Иису́са бы́ти Христа́. Деян.18:22-28
Аллилуарий
Аллилуиа, глас 4: Ты Го́споди воскре́с, уще́дриши Сио́на. Стих: Госпо́дь с небесе́ на зе́млю призре́.