Зачало 49 (21 мая, равноапостольным царю Константину и матери его Елене, Владимирскому образу Пресвятой Богородицы)
Прокимен
Прокимен, глас 8: Во всю зе́млю изы́де веща́ние их, / и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.
Прокимен, глас 3, песнь Богородицы: Вели́чит душа́ Моя́ Го́спода, / и возра́довася дух Мой о Бо́зе, Спа́се Мое́м. Стих: Я́ко призре́ на смире́ние рабы́ Своея́: се бо от ны́не ублажа́т Мя вси ро́ди.
Если празднование памяти равноапостольных Константина и матери его Елены приходится не на Пятидесятницу, то читается зачало 200.
Зачало 49
Дея́ний святы́х апо́стол чте́ние.
Во дни о́ны, Агри́ппа к Па́влу рече́: повелева́ется ти о себе́ самому́ глаго́лати. Тогда́ Па́вел просте́р ру́ку отвещава́ше: о всех, о ни́хже оклевета́емь есмь от Иуде́й, царю́ Агри́ппо, непщу́ю себе́ блаже́нна бы́ти, я́ко пред тобо́ю отвеща́ти днесь и́мам, па́че же ве́дца тя су́ща све́дый всех иуде́йских обы́чаев и взыска́ний. Те́мже молю́ся ти долготерпели́вно послу́шати мене́. Житие́ у́бо мое́ е́же от ю́ности, испе́рва бы́вшее во язы́це мое́м во Иерусали́ме, ве́дят вси Иуде́е, ве́дяще мя испе́рва, а́ще хотя́т свиде́тельствовати, я́ко по изве́стней е́реси на́шея ве́ры жих фарисе́й. В ни́хже иды́й в Дама́ск со вла́стию и повеле́нием, е́же от архиере́й, в полу́дни на пути́ ви́дех, царю́, с небесе́ па́че сия́ния со́лнечнаго осия́вший мя свет и со мно́ю иду́щих. Всем же па́дшым нам на зе́млю, слы́шах глас глаго́лющь ко мне и веща́ющь евре́йским язы́ком: Са́вле, Са́вле, что Мя го́ниши? Же́стоко ти есть проти́ву рожна́ пра́ти. Аз же рех: кто еси́, Го́споди? Он же рече́: Аз есмь Иису́с, Его́же ты го́ниши, но воста́ни и ста́ни на ногу́ твое́ю, на се бо яви́хся ти, сотвори́ти тя слугу́ и свиде́теля, я́же ви́дел еси́ и я́же явлю́ тебе́, изима́я тя от люде́й иуде́йских и от язы́к, к ни́мже Аз тя послю́, отве́рсти о́чи их, да обратя́тся от тмы в свет и от о́бласти сатанины́ к Бо́гу, е́же прия́ти им оставле́ние грехо́в и достоя́ние во святы́х ве́рою, я́же в Мя. Те́мже, царю́ Агри́ппо, не бых проти́вен небе́сному виде́нию, но су́щым в Дама́сце пре́жде и во Иерусали́ме, и во вся́кой стране́ иуде́йстей и язы́ком пропове́дую пока́ятися и обрати́тися к Бо́гу, досто́йна покая́нию дела́ творя́ще.Деян.26:1-5;12-20
Зачало 240
Бра́тие, сие́ да му́дрствуется в вас, е́же и во Христе́ Иису́се, И́же во о́бразе Бо́жии сый, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене, да о и́мени Иису́сове вся́ко коле́но поклони́тся небе́сных и земны́х и преиспо́дних, и всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.Флп.2:5-11
Аллилуарий
Аллилуиа, глас 1: Вознесо́х избра́ннаго от люде́й мои́х, обрето́х Дави́да раба́ Moeгó. Стих: Го́споди, си́лою Твое́ю возвесели́тся царь, и о спасе́нии Твое́м возра́дуется зело́.
Аллилуиа, глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии.