Зачало 70 (в пяток 34-й недели по Пятидесятнице)
Зачало 70
PDF (ЦСЯ) · PDF (гражданский шрифт) · MP3
Собо́рнаго посла́ния Иоа́ннова чте́ние.
Возлю́бленнии, не за́поведь но́ву пишу́ вам, но за́поведь ве́тху, ю́же име́сте испе́рва. За́поведь ве́тха есть сло́во, е́же слы́шасте испе́рва. Па́ки за́поведь но́ву пишу́ вам, е́же есть пои́стинне в Нем и в вас, я́ко тма ми́мо хо́дит и свет и́стинный сей сия́ет. Глаго́ляй во све́те бы́ти, а бра́та своего́ ненави́дит, во тме есть досе́ле. Любя́й бра́та своего́ во све́те пребыва́ет, и собла́зна в нем несть. А ненави́дяй бра́та своего́ во тме есть, и во тме хо́дит, и не весть ка́мо и́дет, я́ко тма ослепи́ о́чи ему́. Пишу́ вам ча́дца, я́ко оставля́ются вам греси́ и́мене Его́ ра́ди. Пишу́ вам отцы́, я́ко позна́сте Безнача́льнаго. Пишу́ вам ю́ноши, я́ко победи́сте лука́ваго. Пишу́ вам де́ти, я́ко позна́сте Отца́. Писа́х вам отцы́, я́ко позна́сте Иско́ннаго. Писа́х вам ю́ноши, я́ко кре́пцы есте́, и сло́во Бо́жие в вас пребыва́ет, и победи́сте лука́ваго. Не люби́те ми́ра, ни я́же в ми́ре, а́ще кто лю́бит мир, несть любве́ О́тчи в нем. Я́ко все е́же в ми́ре, по́хоть плотска́я и по́хоть очи́ма и го́рдость жите́йская, несть от Отца́, но от ми́ра сего́ есть. И мир прехо́дит, и по́хоть его́, а творя́й во́лю Бо́жию пребыва́ет во ве́ки.1Ин.2:7-17