Зачало 40 (на основание и обновление Константинополя)

Вернуться в меню · Зачало 40 (вторник 6-й недели по Пасхе) · Зачало 40 (св. Дионисию Ареопагиту) · Зачало 41

Прокимен

Прокимен, глас 4: До́му Твоему́ подоба́ет святы́ня, / Го́споди, в долготу́ дний. Стих: И́бо утверди́ вселе́нную, я́же не подви́жится.

Зачало 40

PDF (ЦСЯ) · PDF (гражданский шрифт) · MP3

Дея́ний святы́х апо́стол чте́ние.

Во дни о́ны, отлучи́ся Па́вел от Афи́н, прии́де в Кори́нф. И обре́те не́коего иуде́анина и́менем Аки́лу, По́нтянина ро́дом, но́во прише́дша от Итали́и, и Приски́ллу жену́ его́, зане́ повеле́л бя́ше Клавди́й отлучи́тися всем Иуде́ем от Ри́ма, прии́де к ним, и зане́ единохудо́жником бы́ти им, пребы́сть у них и де́лаше, бя́ху бо скинотво́рцы хи́тростию. Стяза́шеся же на со́нмищах по вся суббо́ты и препира́ше иуде́и и е́ллины. И я́коже снидо́ста от Македо́нии Си́ла же и Тимофе́й, тужа́ше ду́хом Па́вел, свиде́тельствуя иуде́ом Иису́са бы́ти Христа́. Проти́вящымся же им и ху́лящым, отря́с ри́зы своя́, рече́ к ним: кровь ва́ша на глава́х ва́ших, чист аз, отны́не во язы́ки иду́. И преше́д отту́ду, прии́де в дом не́коего и́менем Иу́ста, чту́ща Бо́га, ему́же хра́мина бе вскрай со́нмища. Крисп же нача́льник собо́ра ве́рова Го́сподеви со всем до́мом свои́м, и мно́зи от Кори́нфян слы́шавше ве́роваху и креща́хуся. Рече́ же Госпо́дь в виде́нии нощно́м Па́влу: не бо́йся, но глаго́ли и да не умо́лкнеши, зане́ Аз есмь с тобо́ю, и никто́же приложи́т озло́бити тя, зане́ лю́дие суть Ми мно́зи во гра́де сем. Седя́ше же та́мо ле́то и ме́сяц шесть, учя́ в них сло́ву Бо́жию.^{Деян.18:1-11}

Аллилуарий

Аллилуиа, глас 2: Основа́ния его́ на гора́х святы́х, лю́бит Госпо́дь врата́ Сио́ня па́че всех селе́ний Иа́ковлих. Стих: Пресла́вная глаго́лашася о тебе́, гра́де Бо́жий.

Наверх · Вернуться в меню · Зачало 40 (вторник 6-й недели по Пасхе) · Зачало 40 (св. Дионисию Ареопагиту) · Зачало 41