25 июля. Празднование Пресвятой Богородице, в честь Её чудотворной иконы «Троеручица»
Всенощное бдение на планшете · Литургия на планшете
Малая Вечерня
Стихиры на «Го́споди, воззва́х…» (на 4)
Глас 1.
Прииди́те, Афо́на насе́льницы,/ с ве́рою и любо́вию соше́дшеся,/ верхо́вную на́шу Игу́мению, Цари́цу Богоро́дицу просла́вим,/ от прираже́ния ви́димых и неви́димых вра́г ми́лостивно на́с заступа́ющую,// и ду́ши на́ша спаса́ющую.
Прииди́те, и́ноцы горы́ сея́,/ Го́ру мы́сленную, Пречи́стую Де́ву Мари́ю и Богоро́дицу восхва́лим,/ и То́й велегла́сно возопии́м:/ ра́дуйся, Горо́ свята́я та́инственная, в жре́бий Себе́ го́ру сию́ избра́вшая,// и обита́ющим зде покро́в и заступле́ние Свое́ обеща́вшая.
Ра́дуйся, горо́ Афо́нская,/ в жре́бий Цари́цы Небе́сныя избра́нная,/ и прише́ствием Ея́ зде освяще́нная:/ сла́ва бо Госпо́дня на Тебе́ возсия́,/ и в зна́мениях и чудесе́х мно́зех прояви́ся// во спасе́ние ду́ш на́ших.
Дне́сь и́ноков ли́цы, ра́достно соше́дшеся,/ торжеству́йте, прославля́юще верхо́вную Прави́тельницу/ на́шу Цари́цу Богоро́дицу,/ Яже Троеру́чною Свое́ю ико́ною я́ко Игу́мения вся́ поле́зная на́м устроя́ет,// и ду́ши на́ша к Ца́рствию небе́сному неви́димо уготовля́ет.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас то́йже.
О, Пресвята́я Богома́ти,/ и́ноков блага́я Наста́внице и Покрови́тельнице!/ Да́ждь на́м, насе́льником земна́го жре́бия Твоего́,/ ненаве́тно небе́сную ше́ствовати стезю́,/ на Боже́ственная дея́ния на́с укрепля́ющи,/ да Твои́м всемо́щным заступле́нием,/ грехо́внаго пути́ укло́ньшеся,// присносу́щныя Боже́ственныя сла́вы о́бщницы бы́ти сподо́бимся.
Стихиры на стиховне
Глас 2.
Подо́бен: «До́ме Евфра́фов».
О, Всенепоро́чная Де́во,/ ко́е Тебе́ благодаре́ние принесе́м,/ я́ко го́ру сию́ от всея́ вселе́нныя в жре́бий Себе́ избра́вши,/ в насе́ление и́ноком ю вдала́ еси́,/ и Троеру́чную Твою́ ико́ну// во игу́мена ме́сто оби́тели Хиланда́рстей дарова́ла еси́.
Стих: Слы́ши, Дщи́, и ви́ждь, и приклони́ у́хо Твое́.
О, Пресвята́я Госпоже́ Влады́чице,/ не забу́ди на́с, Твоя́ рабы́,/ но я́коже обеща́лся еси́,/ подава́й на́м вся́ к житию́ потре́бная,/ и Ца́рствия Небе́снаго не лиши́ на́с,// Троеру́чныя ико́ны Твоея́ пра́здник соверша́ющия све́тло.
Стих: Помяну́ и́мя Твое́ во вся́ком ро́де и ро́де.
О, Всепе́тая Ма́ти,/ Троеру́чною Твое́ю ико́ною с на́ми пребыва́ющая,/ приклони́ся на моле́ние на́ше,/ и Сы́на Твоего́ умоля́ти о на́с не преста́й,/ да изба́вит жре́бий Тво́й и вся́ гра́ды и страны́ христиа́нския/ от тру́са и гла́да, и от все́х бе́д,// гре́х ра́ди на́ших на ны́ находя́щия.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 1.
Троеру́чнаго о́браза Твоего́, Влады́чице,/ соверша́юще пра́зднство,/ смире́нно вопие́м Ти́, Препе́тая:/ потемне́нный грехми́ душе́вный о́браз на́ш/ обнови́ти помози́ на́м,// всемо́щными Твои́ми к Бо́гу моли́твами.
Тропарь
Глас 4.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бе́д изба́ви,/ да зове́м Ти́:// ра́дуйся, Благода́тная, Троеру́чною ико́ною Твое́ю на́м помога́ющая.
Повечерие
Кано́н святы́х му́ченик Про́кла и Ила́рия.
Творе́ние Ио́сифово
Глас 4.
Песнь 1.
Ирмос: Триста́ты кре́пкия,/ Рожде́йся от Де́вы, безстра́стия во глубине́,/ души́ трича́стное потопи́, молю́ся,/ да Тебе́, я́ко в тимпа́не, во умерщвле́нии телесе́// побе́дное воспою́ пе́ние.
Соедини́вшеся с Бо́гом и боже́ственными заря́ми освеща́еми при́сно, до́блии страда́льцы, ду́шу мою́ просвети́те, пою́щу светоно́сное и честно́е ва́ше страда́ние умиле́нием се́рдца, блаже́ннии.
Воспери́ ва́с небе́сное жела́ние, те́мже вся́ кра́сная жития́, страда́льцы, вмени́сте уме́ты, манове́ньми к Бо́гу обожи́вшеся и всю́ безбо́жную кре́пость смири́вше.
Огне́м Богонача́льныя вже́гшеся Тро́ицы, злоче́стия разжже́ния угаси́сте, му́дрии, кро́вными тече́нии. Те́мже исцеле́ний чи́стыми одожде́нии страсте́й на́ших скве́рну отмы́йте.
Безпеча́льную жи́знь, небе́сную сла́ву, ра́йское наслажде́ние, све́т мы́сленный, кра́сное ра́дование, му́ченицы, взыску́юще, лю́тая претерпе́сте треволне́ния до́блественным умо́м.
Небе́снии ли́цы ва́шему терпе́нию удиви́шася, му́дрии: бие́ния бо пло́ти, и многоплете́нныя му́ки, му́ченицы, доблему́дренно претерпе́сте, ра́дующеся и врага́ зло́бу сокруши́вше.
Богородичен: Яд уше́с прама́тере Евы Гаврии́л, Тебе́ провозглаша́я, — ра́дуйся, — вои́стинну оттрясе́, Влады́чице: еди́на бо Ты́ Посека́теля зло́бы зми́евы па́че ума́ же и сло́ва родила́ еси́.
Песнь 3.
Ирмос: Не му́дростию, и си́лою,/ и бога́тством хва́лимся,/ но Тобо́ю, Отчею ѵпоста́сною Му́дростию, Христе́:// не́сть бо свя́т, па́че Тебе́, Человеколю́бие.
Прему́дростию слове́с боже́ственных нему́дрыя обличи́л еси́ и терза́ния плотска́я кре́постию ду́ха претерпе́л еси́, Про́кле всеблаже́нне, му́чениче богодохнове́нне.
Распя́ту тебе́ бы́вшу, неми́лостивно повеле́ дра́ти тя́ безу́мный, к Бо́гу душе́вныя о́чи простира́юща и терпе́нием ти́ удобря́ема.
Сокруше́ние удо́в му́жески претерпе́л еси́, прему́дре, кро́вию же разжже́ние безбо́жия погаси́л еси́, Про́кле, укрепля́емь Боже́ственною благода́тию.
Богородичен: Разреши́, Де́во, соу́з зо́л мои́х, сосвяза́ющи мя́ любви́ из Тебе́ рожде́ннаго Сло́ва, Всенепоро́чная, и спаси́ мя, Влады́чице, моли́твами Твои́ми.
Песнь 4.
Ирмос: Седя́й в сла́ве/ на Престо́ле Божества́ во о́блаце ле́гце,/ при́иде Иису́с Пребоже́ственный,/ Нетле́нною Дла́нию и спасе́ зову́щия:// сла́ва, Христе́, си́ле Твое́й.
После́дова твои́м словесе́м ве́щи тве́рдостное, и́бо кровоя́дец возбраня́ше идти́ к пре́дним, до́ндеже Христа́, все́х еди́наго Го́спода, испове́дал еси́, Про́кле, Бо́га пресу́щна.
Непобеди́мым дерзнове́нием и до́блим умо́м, страстоте́рпче Про́кле, ста́л еси́ пред суди́щем, воплоще́ние велегла́сно пропове́дуя излия́вшаго Себе́ да́же до ра́бияго о́браза, Изба́вителя на́шего.
Безсту́дно у́бо гони́тель мудреце́м пока́зоваше му́к ви́ды и ну́жднейшую сме́рть, непобеди́мыя же ви́дя, дивля́шеся и, побежде́ние зря́ свое́, не домышля́шеся.
Богородичен: Сокруше́нное преступле́нием ру́к Твои́х творе́ние ущедря́я, Сло́ве, в ложесна́ Неискусобра́чныя все́лься, и во двою́ существу́ прише́л еси́, нетле́ния обновля́я пути́ ве́дущим Тя́.
Песнь 5.
Ирмос: Ты́, Го́споди, мо́й Све́т,/ в ми́р прише́л еси́,/ Све́т Святы́й, обраща́яй из мра́чна неве́дения// ве́рою воспева́ющия Тя́.
Ты́, Го́споди, кре́пость му́чеников и утвержде́ние, Ты́, Свя́те, святы́х, непоколеби́мая стено́ стра́ждущих усе́рдно.
Жела́нием боже́ственным ду́шу опаля́я, терпе́л еси́, свеща́ми опаля́емь, Про́кле преблаже́нне досточу́дне.
Огня́ то́чию ужаса́юся ве́чнаго, — взыва́л еси́, опаля́емь, му́чениче Про́кле, повеле́нии мучи́теля и во́лею умерщвля́емь.
Богородичен: Кто́ мо́жет сказа́ти Твое́ та́инство, о Влады́чице Богоро́дице! Зижди́теля бо все́х несказа́нно воплоти́ла еси́.
Песнь 6.
Ирмос: Приидо́х во глубины́ морски́я,/ и потопи́ла мя́ е́сть бу́ря мно́гих грехо́в,/ но я́ко Бо́г из глубины́ возведи́ живо́т мо́й,// Многоми́лостиве.
Ни о́гнь, ниже́ ра́ны, ни зве́рие, ниже́ сме́ртное искуше́ние, до́блии, ва́с разлучи́ти Бо́жия чи́стыя и непоро́чныя любве́ возмого́ша.
Зако́ном хва́льным не порабо́тает му́ченик вои́стинну до кро́ве му́жество, еди́н си́х сла́вяй Госпо́дь велича́ет я́ко уго́дники.
Благопла́вно пучи́ну преше́дше лю́тых мук, устреми́стеся к боже́ственному приста́нищу, е́же о Христе́, страстоте́рпцы му́ченицы, присносу́щнаго наслажде́ния.
Богородичен: Се́, Де́ва, — Иса́ия вопия́ше дре́вле, — Сове́та Ангела Вели́каго ражда́ет, Емману́ила, Бо́га и Го́спода, и Спа́са ду́ш на́ших.
Седален
Глас 1.
Подо́бен: «Гро́б Тво́й, Спа́се…»
Ила́рия, ве́рнии, и сла́внаго Про́кла, страда́вшия тве́рдо и врага́ низложи́вшия, согла́сно почти́м, Христа́ велича́юще: си́я бо чудесы́ страсте́й мглу́ отго́нят, просвеща́юща ве́рою к ни́ми притека́ющия.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Богородичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ и сло́ва, непреста́нно моли́ о воспева́ющих Тя́, пода́ти оставле́ние грехо́в на́ших все́х и исправле́ние жития́, ве́рою и любо́вию при́сно сла́вящим Тя́.
Крестобогоро́дичен: Зря́щи Тя́, Христе́, Всенепоро́чная Ма́ти ме́ртва на Кресте́ просте́рта, вопия́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?
Песнь 7.
Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:// оте́ц на́ших Бо́же, благослове́н еси́.
Телеса́ ра́нам преда́вше, любо́вию вопло́щшагося Сло́ва, му́ченицы, от Сего́ вене́ц пра́вды прия́сте в ле́поту.
Све́том Боже́ственным у́м просве́щше, ве́рою муче́ния тму́ претеко́сте, вопию́ще, прехва́льнии: оте́ц на́ших Бо́же, благослове́н еси́.
Тече́нием твои́х усте́н медото́чных слове́с, преблаже́нне Про́кле, я́ко боже́ственным исцеле́нием напоя́еши пою́щия: оте́ц на́ших Бо́же, благослове́н еси́.
Си́лою Боже́ственною у́м укре́пль, му́к го́рькия ви́ды претерпе́л еси́, зовы́й, Ила́рие: оте́ц на́ших Бо́же, благослове́н еси́.
Богородичен: Яко вы́шши все́х тва́рей, ражда́еши все́х Зижди́теля, пребы́вши Де́вою, Нескве́рная, Благослове́нная, еди́на при́сно Препросла́вленная.
Песнь 8.
Ирмос: Изба́вителю все́х Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся́ дела́, благослови́те, по́йте Го́спода.
По мно́гих му́ках стреля́нию свире́пый враг тя предае́т, от ни́хже ссеца́емь, всехва́льный Про́кле, ра́дуяся, в ру́це Бо́жии пре́дал еси́ ду́х тво́й.
Уязви́ся честно́е те́ло твое́ непреста́нными стреля́нии, свя́те, и неисце́льно уязви́ враги́ безпло́тныя, не пою́щия: благослови́те, вся́ дела́ Госпо́дня, Го́спода.
Просвеща́емь заре́ю благода́ти, я́коже ка́мень, на земли́ валя́емь, сокруши́л еси́, Ила́рие, утвержде́ние пре́лести, поя́ в кре́пости: благослови́те, вся́ дела́ Госпо́дня, Го́спода.
Ка́пли крове́й твои́х, поте́кше, нече́стия о́гнь угаси́ша, ве́рныя же напои́ша, пою́щия непреста́нно: благослови́те, вся́ дела́ Госпо́дня, Го́спода.
Богородичен: Вопло́щся от чи́стых крове́й Твои́х, Бог, сотвори́вый и созда́вый мя́, Богороди́тельнице Влады́чице, обнови́ мир, вопию́щий: благослови́те, вся́ дела́ Госпо́дня, Го́спода.
Песнь 9.
Ирмос: Ева у́бо неду́гом преслуша́ния/ кля́тву всели́ла е́сть,/ Ты́ же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́.// Те́м Тя́ вси́ велича́ем.
Се́ светоза́рная, и свяще́нная, и благонаро́читая му́ченик па́мять возсия́, всю́ зе́млю просвеща́ющи, мра́к зло́бы отъе́млющи, и о́блак душа́м отгоня́ющи, и исцеле́ний благода́ть точа́щи.
Якоже два́ сосца́ духо́вна, пролива́юща исцеле́ний млеко́, му́ченицы, вся́ка напитава́ете сердца́, го́ресть неду́гов отгоня́ще и стра́сти лю́тыя исцеля́юще. Те́мже досто́йно блажи́ми есте́.
Ка́плями крове́й свяще́нных омочи́вше багряни́цу, пресла́внии, и сию́ красно́ нося́ще, со Христо́м ца́рствуете всегда́, еди́нем Царе́м и Бо́гом на́шим, о ми́ре моля́щеся.
Земля́ благослови́ся ва́шими кровьми́ и моще́й положе́нием, перворо́дных Це́рковь Ду́хом боже́ственне светле́ется, в не́йже с му́ченики, я́ко му́ченицы, о ми́ре моли́теся.
Богородичен: Све́та жили́ще, Чи́стая, Твое́, Пречи́стая, бы́сть чре́во, Влады́чице, Тебе́ ра́ди Явльшагося в ве́щи зри́ме теле́сней и вся́ су́щия во тме́ Просве́щша. Те́мже Тя́ ве́рою ублажа́ем.
Стихиры Прокла и Илария (3)
Глас 1.
Многови́дныя му́ки претерпе́вша,/ светови́дныя венцы́ прия́ста вку́пе,/ Ила́рие и Про́кле./ Те́мже ва́шу всепра́зднственную па́мять/ ве́рно сотворя́ем,/ моля́щеся приле́жно,// е́же моли́ти о все́х на́с.
Растерза́ния пло́ти твоея́,/ Про́кле, претерпе́л еси́,/ ве́чную сла́ву прозря́, блаже́нне, и ра́йское пребыва́ние, и све́т невече́рний,/ в не́мже сый, моли́// и на́м просвети́тися, пою́щим тя.
Слáва Отцу́ и Сы́ну и Святóму Ду́ху.
Якоже два́ свети́ла,/ ми́р просвеща́ета чуде́с луче́ю,/ страстоте́рпца Госпо́дня, Ила́рие и Про́кле,/ омраче́ние страсте́й отгоня́ща./ Те́мже вы воспева́ем ра́достно,// пра́зднующе па́мять ва́шу.
И ны́не, и при́сно, и во вéки векóв. Ами́нь.
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Великая Вечерня
«Блаже́н муж…»
1-й антифон
Стихиры на «Го́споди, воззва́х…» (на 8)
Глас 1.
О, ди́внаго чудесе́!/ Ка́ко усе́ченную за благоче́стие ру́ку/ избра́нника Бо́жия Иоа́нна,/ пред ико́ною Твое́ю сле́зно моли́вшагося,/ во еди́ну но́щь чуде́сно исцели́ла еси́, Влады́чице,/ соверше́нное здра́вие тому́ пода́вши,/ я́ко то́кмо зна́к червле́ный,/ во свиде́тельство сего́ чудесе́,// на ме́сте усече́ния оста́ся. Два́жды.
Кто́ возглаго́лет си́лы Твоя́, Влады́чице?/ Или́ кто́ испове́сть вели́чие чудесе́ Твоего́,/ е́же показа́ла еси́ во исцеле́нии десни́цы Иоа́нна преподо́бнаго,/ и́же, в благода́рность за исцеле́ние,/ и в па́мять бы́вшаго чудесе́,/ к изображе́нию Твоему́ тре́тию сре́бряну руку́ приложи́,/ и сего́ ра́ди ико́на сия́ Троеру́чица нарече́ся,// та́йну Святы́я Тро́ицы собо́ю образу́ющая.
Ко́ль ве́лия благода́ть си́лы Твоея́,/ ю́же от Бо́га прия́ла еси́, Влады́чице!/ Яко не то́кмо разли́чныя неду́ги врачу́еши,/ с ве́рою Тя́ призыва́ющих,/ но и чуде́снейшая твори́ши: усе́ченную бо ру́ку Иоа́нна преподо́бнаго,/ к соста́ву ея́ приложе́нную, ди́вно в со́ннем виде́нии исцели́ла еси́,/ и да́р вити́йства духо́внаго тому́ дарова́ла еси́,// я́ко Ма́ти Царя́ Всемогу́щаго.
Глас 3.
Пе́рвее оби́тель преподо́бнаго Са́ввы,/ и́же в Палести́не, украша́вшую,/ Троеру́чную Твою́, Богома́ти, ико́ну/ благоволи́ла еси́ вда́ти святи́телю Са́вве,/ ю́же о́н во оте́чество свое́, страну́ Се́рбскую принесе́, я́ко да́р освяще́н,/ иде́же чудесы́ мно́гими ту́ просла́вила еси́,/ дарова́вши е́ю больны́м исцеле́ние,// и в беда́х разли́чных ско́рое всепоможе́ние. Два́жды.
Cтрану́ Се́рбскую Троеру́чною ико́ною Твое́ю освяти́вши,/ и мно́гия лю́ди к покая́нию приве́дши,/ восхоте́ла еси́, Влады́чице,/ всегда́шнее е́й пребыва́ние во Афо́не устро́ити./ Сего́ ра́ди повеле́ла еси́/ на безслове́сное осля́ ю́ положи́ти/, и без вожа́таго е пусти́ти,// води́тельству Боже́ственнаго промышле́ния поручи́вши.
Ка́ко не диви́мся/ де́йствию си́лы Твоея́, Влады́чице,/ я́ко безслове́сное осля́ во́ли Твое́й чуде́сно повину́ся,/ и ико́ну Твою́ Троеру́чную из Се́рбии во Афо́н принесе́/ ко врато́м оби́тели Хиланда́рския,/ иде́же, промышле́нием Твои́м,/ до ны́не сохра́нно пребыва́ет де́йствующи зна́мения// и чудеса́ пресла́вная, во спасе́ние ду́ш на́ших.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 1.
Та́йну Пресвяты́я Тро́ицы образу́ющую,/ и благода́ти Тоя́ прича́стную/ Твою́ Богома́ти ико́ну,/ поклоне́нием почита́юще,/ и [Тя́,] Пречи́стая прославля́ем,/ я́ко Таи́нницу воплоще́ния Бо́га Сло́ва,// Его́же моли́ о спасе́нии ду́ш на́ших.
Паремии
Бытия́ чте́ние.
Изы́де Иа́ков от студенца́ кля́твеннаго и и́де в Харра́нь. И обре́те ме́сто, и спа́ та́мо, за́йде бо со́лнце; и взя́т от ка́мения ме́ста того́, и положи́ возгла́вие себе́, и спа́ на ме́сте о́ном. И со́н ви́де: и се́ ле́ствица утвержде́на на земли́, eя́же глава́ досяза́ше до небе́с, и Ангели Бо́жии восхожда́ху и низхожда́ху по не́й. Госпо́дь же утвержда́шеся на не́й, и рече́: Аз Бо́г Авраа́мов, отца́ твоего́, и Бо́г Исаа́ков, не бо́йся: земля́, иде́же ты́ спи́ши на не́й, тебе́ да́м ю́ и се́мени твоему́. И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки, и возблагословя́тся о тебе́ вся́ коле́на земна́я и о се́мени твое́м. И се́ Аз с тобо́ю, сохраня́яй тя́ на вся́ком пути́, а́може а́ще по́йдеши, и возвращу́ тя́ в зе́млю сию́, я́ко не и́мам тебе́ оста́вити, до́ндеже сотвори́ти Ми́ вся́, ели́ка глаго́лах тебе́. И воста́ Иа́ков от сна́ своего́, и рече́: я́ко éсть Госпо́дь на ме́сте се́м, а́з же не ве́дех. И убоя́ся, и рече́: я́ко стра́шно ме́сто сие́, не́сть сие́, но до́м Бо́жий, и сия́ врата́ небе́сная.
Прoро́чества Иезеки́илева чте́ние.
Та́ко глаго́лет Госпо́дь: бу́дет от дне́ осма́го и про́чее, сотворя́т иере́и на олтари́ всесожже́ния ва́шего и я́же спасе́ния ва́шего, и прииму́ вы́, глаго́лет Адонаи́ Госпо́дь. И обрати́ мя́ на пу́ть вра́т святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне́: врата́ сия́ затворе́на бу́дут, и не отве́рзутся, и никто́же про́йдет сквозе́ и́х, я́ко Госпо́дь Бо́г Изра́илев про́йдет и́ми, и бу́дут затворе́на. Яко игу́мен ся́дет в ни́х сне́сти хле́б: по пути́ ела́мских вра́т вни́дет, и по пути́ его́ изы́дет. И введе́ мя́ по пути́ вра́т святы́х, су́щих к се́веру, пря́мо хра́му, и ви́дех, и се́ испо́лнь сла́вы хра́м Госпо́день.
При́тчей чте́ние.
Прему́дрость созда́ себе́ до́м и утверди́ столпо́в се́дмь. Закла́ своя́ же́ртвенная, и раствори́ в ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи с высо́ким пропове́данием на ча́шу, глаго́лющи: и́же е́сть безу́мен, да уклони́тся ко мне́. И тре́бующим ума́ рече́: прииди́те, яди́те мо́й хле́б и пи́йте вино́, е́же раствори́х вам. Оста́вите безу́мие, и жи́ви бу́дите, и взыщи́те ра́зума, да поживете́, и испра́вите ра́зум в ве́дении. Наказу́яй злы́я, прии́мет себе́ безче́стие, облича́яй же нечести́ваго опоро́чит себе́. Обличе́ния бо нечести́вому — ра́ны ему́. Не облича́й злых, да не возненави́дят тебе́, облича́й прему́дра, и возлю́бит тя́. Да́ждь прему́дрому вину́, и прему́дрший бу́дет, сказу́й пра́ведному, и приложи́т приима́ти. Нача́ло прему́дрости — стра́х Госпо́день, и сове́т святы́х — ра́зум. Разуме́ти бо зако́н по́мысла е́сть блага́го: си́м бо о́бразом мно́гое поживе́ши вре́мя, и приложа́тся тебе́ ле́та живота́.
Стихиры на литии
Глас 4.
Приспе́ ны́не де́нь све́тлаго торжества́,/ пра́здник Троеру́чныя ико́ны Богома́тере:/ прииди́те у́бо, и́ноков ли́цы/ и Правосла́вных совокупле́ния,/ духо́вно да торжеству́ем,/ и Присноде́ве уми́льно возопие́м:// спаса́й на́с, Влады́чице, от вся́каго зла́ те́плыми Твои́ми к Бо́гу моли́твами.
Глас 1.
Все́х святы́х Святе́йшая,/ и вся́кия тва́ри Честне́йшая Богоро́дице Де́во,/ ми́ра Влады́чице,/ спаси́ на́с, пра́зднство Троеру́чныя ико́ны Твоея́ соверша́ющия,// и от все́х бе́д свободи́ Ма́терними Твои́ми к Сы́ну моли́твами.
Вси́ чи́стою со́вестию ико́не Богома́тере припаде́м,/ вопию́ще от среды́ серде́чныя:/ Влады́чице Пресвята́я,/ спаси́ вся́ на́с от гне́ва и озлобле́ния, бе́д и паде́жей,/ я́ко Тебе́ стяжа́хом сте́ну и утвержде́ние,// Ты́ бо Троеру́чною Твое́ю ико́ною при́сно на́м помога́еши.
Побо́рников Правосла́вия при́сная Защи́тница/ и Покрови́тельница еси́, Богома́ти Пречи́стая,/ те́мже и усе́ченную ру́ку Иоа́нна преподо́бнаго,/ мно́го писа́вшую в защище́ние почита́ния святы́х ико́н,/ чуде́сно исцели́ла еси́,/ и в труде́х по́стнических тому́ пособи́ла еси́./ В подо́бных труде́х и на́м помага́ти потщи́ся, мо́лимся,// да Тя́ при́сно сла́вим наде́жду ду́ш на́ших.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
О, Ма́ти Всеми́лостивая,/ оби́тели Хиланда́рския блага́я Игу́мения,/ всего́ же Афо́на верхо́вная Прави́тельнице/ и и́ноков Наста́внице и Покрови́тельнице,/ пода́ждь на́м си́лу и произволе́ние,/ вся́ находя́щия на ны́ ско́рби и напа́сти/ благоду́шно претерпева́ти,/ и по́двиг и́ноческий богоуго́дно сконча́ти,/ да благонаде́жно в страну́ Небе́сную пре́йдем,/ и та́мо лицезре́ния Твоего́ наслади́мся,// е́же и лико́м а́нгельским любе́зно и сла́достно е́сть.
Стихиры на стиховне
Глас 2.
Егда́ и́ноцы оби́тели Хиланда́рския/ несогла́сием в избра́нии смуще́ни бы́ша,/ тогда́ Ты́, Влады́чице, умире́ния ра́ди о́нех,/ благоволи́ла еси́ Сама́ бы́ти в оби́тели и́х Настоя́тельницею// и о житии́ и спасе́нии и́х благо́ю Попечи́тельницею.
Стих: Слы́ши, Дщи́, и ви́ждь, и приклони́ у́хо Твое́.
Егда́ и́ноцы Хиланда́рстии/ разногла́сием во избра́нии игу́мена смуща́хуся,/ тогда́ Ты́, Всеблага́я, еди́ному от ни́х возвести́ла еси́ во́лю Твою́,/ да не избира́ют себе́ игу́мена,/ но Троеру́чную Твою́ ико́ну да име́ют себе́ во игу́мена,// благослове́ние на вся́ послуша́ния от Нея́ прие́млюще.
Стих: Помяну́ и́мя Твое́ во вся́ком ро́де и ро́де.
Егда́ бра́тия оби́тели Хиланда́рския/ возвеще́нней Тобо́ю еди́ному от ни́х во́ли Твое́й не е́мляху ве́ры,/ тогда́ Ты́, Богома́ти, Троеру́чную Твою́ ико́ну/ трикра́тно на игу́менстем ме́сте чуде́сне поставля́ла еси́,// уверя́ющи си́м нело́жно бы́ти возвеще́ние.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
Тебе́ припа́даем, Госпоже́,/ Троеру́чней ико́не Твое́й покланя́ющеся и уми́льно вопие́м:/ я́коже и́ноки оби́тели Хиланда́рския ми́лостивно прие́млеши,/ благослове́ние и́м на свято́е послуша́ние подаю́щи,/ та́ко и на́с, пра́зднство о́браза Твоего́ соверша́ющия,/ благослови́, и пода́ждь на́м вся́, к житию́ и спасе́нию потре́бная,/ вку́пе же и насле́дники Небе́снаго Ца́рствия на́с соде́лай,// всемо́щным Твои́м к Бо́гу хода́тайством.
Тропарь
Глас 4.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бе́д изба́ви,/ да зове́м Ти́:// ра́дуйся, Благода́тная, Троеру́чною ико́ною Твое́ю на́м помога́ющая. Трижды.
Утреня.
Тропари на «Бог Господь…»
Глас 4.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бе́д изба́ви,/ да зове́м Ти́:// ра́дуйся, Благода́тная, Троеру́чною ико́ною Твое́ю на́м помога́ющая. Дважды.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бе́д изба́ви,/ да зове́м Ти́:// ра́дуйся, Благода́тная, Троеру́чною ико́ною Твое́ю на́м помога́ющая. Дважды.
Седален по 1-му стихословию
Глас 1.
Ангел мно́жество на небеси́ Тебе́ Цари́це слу́жат, мы́ же гре́шнии на земли́, предстоя́ще святе́й Троеру́чней ико́не Твое́й, велича́ем Тя́, возвели́чившую ро́д на́ш.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
К Тебе́, Пречи́стая, усе́рдно прибега́ем, и пред Троеру́чною Твое́ю ико́ною припа́дающе, по́мощи про́сим: помози́ на́м настоя́щее вре́мя жития́ на́шего в ми́ре и покая́нии сконча́ти, и в Ца́рствие небе́сное невозбра́нный вхо́д получи́ти.
Седален по 1-му стихословию
Глас 3.
Пе́сни благода́рственныя прино́сим Ти́, Ма́ти Бо́жия, я́ко благоволи́ла еси́ Троеру́чною Твое́ю ико́ною с на́ми пребыва́ти и благода́тию Ро́ждшагося от Тебе́ от вся́ких бе́д и прило́га чужда́го при́сно на́с избавля́ти.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 6.
Яко звезда́ многосве́тлая ико́на Твоя́, Богоро́дице Де́во, просвеща́ет на́с благода́тию чуде́с, и созыва́ет дне́сь сла́вити и воспева́ти многопе́тое Твое́ и́мя, е́же лю́бящим Тя́ сла́дко и любе́зно е́сть. Те́мже мо́лим Тя́, о Госпоже́ Пресвята́я: не оста́ви на́с Твои́м заступле́нием во вся́, па́че же в ча́с кончи́ны жития́ на́шего.
Величания и избранный псалом
Велича́ем Тя,/ Пресвята́я Де́во,/ богоизбра́нная Отрокови́це,/ и чтим Троеру́чный о́браз Твой,/ и́мже то́чиши исцеле́ния,// всем с ве́рою притека́ющим.
Велича́ем Тя,/ Пренепоро́чная Де́во,/ и чтим чудеса́ о́браза свята́го Твоего́,/ трех пречи́стых рук Твои́х явле́ние// в сла́ву Божества́, в Тро́ице Бо́га на́шего.
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния// всем с ве́рою притека́ющим.
Псалом избранный.
- Помяни́, Го́споди, Дави́да и всю кро́тость его.
- Я́ко кля́тся Го́сподеви, обеща́ся Бо́гу Иа́ковлю.
- Се, слы́шахом я во Евфра́фе, обрето́хом я в поля́х дубра́вы.
- Пресла́вная глаго́лашася о тебе́, гра́де Бо́жий.
- Бог посреде́ его́, и не подви́жится.
- Кля́тся Госпо́дь Дави́ду и́стиною, и не отве́ржется ея.
- От плода́ чре́ва твоего́ посажду́ на престо́ле твое́м.
- Я́ко избра́ Госпо́дь Сио́на, изво́ли его́ в жили́ще себе́.
- Освяти́л есть селе́ние Свое́ Вы́шний.
- Святы́ня и велеле́пота во святи́ле его́.
- Свят храм твой, ди́вен в пра́вде.
- До́му Твоему́ подоба́ет святы́ня, Го́споди, в долготу́ дней.
- Помяну́ и́мя Твое́ во вся́ком ро́де и ро́де.
- Благослове́н Госпо́дь во век, и в век ве́ка.
Седален по полиелеи
Глас 2.
Прииди́те, ве́рнии, духо́вно псало́мски да торжеству́ем: приспе́ бо де́нь пра́зднства Троеру́чныя и многочуде́сныя ико́ны Богома́тере. Те́мже ра́достно Ей возопие́м: ра́дуйся, Еди́наго от Тро́ицы Христа́ Жизнода́вца пло́тию ро́ждшая; радуйся, на руку́ Твое́ю нетру́дно носи́вшая всю́ тва́рь Содержа́щаго, и стра́стию кре́стною ро́д челове́ческий от рабо́ты вра́жия Изба́вльшаго.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас то́йже.
О, Всепе́тая Ма́ти Де́во, приклони́ся ми́лостивно к моли́твам на́шим, пред Пречи́стым Твои́м о́бразом приноси́мым дне́сь: покры́й на́с Ма́терним Твои́м покро́вом от вся́каго зла́, и защити́ от искуше́ний вра́жиих, да вси́ непреста́нно Тя́ велича́ем.
Степенна
1-й антифон 4-го гласа
От ю́ности моея́ / мно́зи бо́рют мя́ стра́сти, / но Сам мя́ заступи́, / и спаси́, Спа́се мой. Дважды.
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше. Дважды.
Сла́ва Отцу́, и Сы́ну, и Свято́му Ду́ху.
Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
И ны́не и при́сно, и во ве́ки веко́в. Ами́нь.
Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Прокимен
Прокимен, глас 4: Помяну́ и́мя Твое́/ во вся́ком ро́де и ро́де.
Стих: Отры́гну се́рдце мое́ сло́во бла́го, глаго́лю а́з дела́ моя́ Царе́ви.
Евангелие
(от Луки, зачало 4)
От Луки свята́го Ева́нгелиа чте́ние.
Во дни о́ны воста́вши же Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́, и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, И возра́довася дух Мой о Бо́зе Спа́се Мое́м. Я́ко призре́ на смире́ние рабы́ Своея́, се бо, от ны́не ублажа́т Мя вси роди́. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.Лк.1:39-49,56
Стихира по 50-м псалме
Глас 6.
Слáва Отцу́ и Сы́ну и Святóму Ду́ху.
Моли́твами Богоро́дицы,/ Ми́лостиве, очи́сти// мно́жества согреше́ний на́ших.
И ны́не, и при́сно, и во вéки векóв. Ами́нь.
Моли́твами Богоро́дицы,/ Ми́лостиве, очи́сти// мно́жества согреше́ний на́ших.
Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
Егда́ Троеру́чный о́браз Тво́й/ на осля́ти чуде́сно во Афо́н принесе́н бы́сть/ ко врато́м оби́тели Хиланда́рския,/ тогда́ и́ноцы в сре́тение того́/ ра́достно изыдо́ша/ и боголе́пно в собо́рный хра́м внесо́ша,// воспева́юще вели́чия Твоя́, Богоневе́сто.
Канон
Пресвятой Богородице на 14: ирмосы — дважды, тропари — на 12.
Глас 8.
Песнь 1.
Ирмос: Во́ду проше́д, я́ко су́шу,/ и еги́петскаго зла́ избежа́в,/ изра́ильтянин вопия́ше://Изба́вителю и Бо́гу на́шему пои́м.
Припев: Пресвята́я Богоро́дице, спаси́ нас.
Проро́ческому пе́нию подража́ти хотя́, молю́ Тя́, Пречи́стая: пода́ждь ми́ ра́зум, да воспою́ Троеру́чныя ико́ны Твоея́ све́тлое торжество́, во сла́ву Ро́ждшагося от Тебе́, и вку́пе с Тобо́ю изображе́ннаго Христа́ Бо́га на́шего.
Проро́к и богови́дец Моисе́й, в купине́ пла́менней Бо́га узре́вый, и в Чермне́м мо́ри та́йну безсе́меннаго рождества́ и присноде́вства Твоего́ усмотре́вый, та́йно на́с науча́ет хвале́бную пе́снь Ро́ждшемуся от Тебе́ воспева́ти.
Проро́ческая рече́ния я́ве на Тебе́ сбы́шася, Пречи́стая: Ты́ бо Бо́га Сло́ва безсе́менно родила́ еси́, пребы́вши Де́вою и по рождестве́ нетле́ннем, и на́с у́бо в целому́дрии и чистоте́ сохрани́, усе́рдно мо́лимся.
Проро́чески лани́ты слеза́ми омоча́я, взыва́ем Ти́, Пресвята́я: пода́ждь на́м грехо́в оставле́ние и те́ла здра́вие, и вся́ к житию́ потре́бная, да возмо́жем ве́село пра́здновати Троеру́чныя Твоея́ ико́ны Боже́ственное прославле́ние.
Проро́ков и апо́столов Ты́ еси́ похвала́, Пречи́стая, и всего́ челове́ческаго ро́да удобре́ние: те́мже пода́ждь и на́м Твои́м празднолю́бцем, до́бре и богоуго́дне житие́ сие́ сконча́ти, и Ца́рствие небе́сное со все́ми святы́ми насле́довати.
Проро́ческим рече́ниям после́дующе, сви́ток чи́ст имену́ем Тя́, Де́во, в не́мже пе́рстом Отчим написа́ся Сло́во, от Тебе́ вопло́щшееся: Его́же моли́ в кни́зе живо́тней на́с написа́ти, да Тя́ любо́вию прославля́ем, Троеру́чней ико́не Твое́й покланя́ющеся.
Катавасия: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Песнь 3.
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.
Уподо́бльшася мя́ де́лы неподо́бными ското́м безсмы́сленным, па́ки возведи́ на первообра́зное досто́инство, Преблага́я Влады́чице, благода́тию Троеру́чнаго Твоего́ о́браза озари́вши.
Уподо́бися свята́я ико́на Твоя́, Влады́чице, купе́ли Силоа́мстей, па́че же и превзы́де ю́: та́ бо еди́ною в ле́то еди́наго неду́жнаго исцелева́ше, сия́ же при́сно душе́вныя и теле́сныя неду́ги исцелева́ет, притека́ющих к не́й с ве́рою.
Подо́бно блу́дному сы́ну зле́ расточи́х бога́тство души́ моея́, но к Тебе́, Пречи́стая, пред Троеру́чною Твое́ю ико́ною смире́нно молю́ся: помози́ мне́ па́ки расточе́нное собра́ти, и благода́тно обогати́[ти]ся.
Подо́бие исцеле́нныя Тобо́ю руки́ своея́ соде́лав уго́дник Тво́й Иоа́нн, к ико́не Твое́й, Влады́чице, приложи́, да не забве́на бу́дет па́мять сего́ чудесе́, за е́же вси́ ве́рнии Тя́ прославля́ют.
Подо́бне свято́му Иоа́нну и мы́, гре́шнии, взыва́ем Ти́, Пречи́стая: исцели́ я́звы ду́ш и теле́с на́ших многомо́щною Твое́ю к Бо́гу моли́твою, да непоколеби́ми пребу́дем от все́х наве́т вра́жиих, в правосла́вии и благоче́стии кре́пко утвержда́ющеся.
Подоба́ше Тебе́, я́ко Ма́тери Царя́ всемогу́щаго, не то́кмо на небеси́, но и на земли́ от все́х христиа́нских родо́в просла́вленней бы́ти. Сего́ ра́ди чуде́с Творе́ц и в Троеру́чней Твое́й ико́не Тя́ Засту́пницу на́шу ди́вно просла́ви.
Катавасия: Твоя́ песносло́вцы, Богоро́дице,/ живы́й и незави́стный Исто́чниче,/ ли́к Себе́ совоку́пльшия, духо́вно утверди́,/ в боже́ственней Твое́й сла́ве,// венце́в сла́вы сподо́би.
Седален
Глас 3.
Троеру́чным Твои́м о́бразом благоволи́ла еси́, Богома́ти, в оби́тели Хиланда́рстей Игу́мениею бы́ти, и всея́ горы́ Афо́нския верхо́вною Прави́тельницею нарещи́ся. Сего́ ра́ди мо́лим Тя́, Пречи́стая: не лиши́ Ма́терняго Твоего́ попече́ния и на́с, соверша́ющия дне́сь сея́ ико́ны све́тлое торжество́, да Тя́ при́сно в пе́снех велича́ем.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Троеру́чным Твои́м о́бразом благоволи́ла еси́, Богома́ти, в оби́тели Хиланда́рстей Игу́мениею бы́ти, и всея́ горы́ Афо́нския верхо́вною Прави́тельницею нарещи́ся. Сего́ ра́ди мо́лим Тя́, Пречи́стая: не лиши́ Ма́терняго Твоего́ попече́ния и на́с, соверша́ющия дне́сь сея́ ико́ны све́тлое торжество́, да Тя́ при́сно в пе́снех велича́ем.
Песнь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Богоно́сный Иоа́нн Дамаски́н, Тобо́ю, Влады́чице, чуде́сно исцеле́нный, Ду́хом Святы́м просвети́вся, счи́ни мно́гая похва́льная Тебе́ песнопе́ния и пред Троеру́чною Твое́ю ико́ною до конца́ живота́ своего́ Ро́ждшемуся от Тебе́ Христу́ Бо́гу воспева́ше: сла́ва си́ле Твое́й, Го́споди.
Богоно́снаго Са́ввы оби́тель Троеру́чною ико́ною многоле́тно украша́шеся, и по́мощию Твое́ю, Влады́чице, от все́х ско́рбных обстоя́ний мно́гажды избавля́шеся. Те́мже и Ро́ждшемуся от Тебе́ взыва́ше: сла́ва си́ле Твое́й, Го́споди.
Богоно́снии отцы́ оби́тели Са́ввы Освяще́ннаго, изволе́нием Твои́м, Влады́чице, Троеру́чную Твою́ ико́ну вда́ше на благослове́ние святи́телю се́рбскому Са́вве. Иже, путеше́ствуя с не́ю по мо́рю и су́ши, взыва́ше Просла́вльшему Тя́: сла́ва си́ле Твое́й, Го́споди.
Богоно́снаго Са́ввы па́ства, прия́вши Троеру́чную Твою́, Богома́ти, ико́ну, я́ко драго́е сокро́вище, и сподо́бльшеся от нея́ благода́тных дарова́ний и чуде́сных исцеле́ний, взыва́ше: сла́ва си́ле Твое́й, Го́споди.
Богоно́снии Твои́ ру́це простри́, Влады́чице, ко Христу́ Бо́гу на́шему, и умоли́ Его́ изба́вити от паде́ний грехо́вных и вся́каго зла́ соверша́ющих пра́зднство Троеру́чнаго о́браза Твоего́, да зове́м вси́ к Держи́мому на объя́тиях Твои́х: сла́ва си́ле Твое́й, Го́споди.
Богоно́сных муже́й после́дующе рече́нием, Богоро́дицу и Присноде́ву Тя́ имену́ем, Пречи́стая, и в Троеру́чней Твое́й ико́не ве́рно Тя́ почита́юще, Тро́ице Пребоже́ственней вопие́м: сла́ва си́ле Твое́й, Го́споди.
Катавасия: Седя́й в сла́ве на Престо́ле Божества́/ во о́блаце ле́гце, при́иде Иису́с Пребоже́ственный,/ Нетле́нною Дла́нию и спасе́ зову́щия:// сла́ва, Христе́, си́ле Твое́й.
Песнь 5.
Ирмос: Просвети́ на́с повеле́нии Твои́ми, Го́споди,/ и мы́шцею Твое́ю высо́кою/ Тво́й мир пода́ждь нам,// Человеколю́бче.
Утренюет дух наш к Тебе́, Влады́чице, зане́ Троеру́чныя Твоея́ ико́ны пра́зднство сотворя́ем и вопие́м: озари́ у́м на́ш, Богома́ти, благода́тию от Тебе́ возсия́вшаго Све́та, и наста́ви на́с на стезю́ жи́зни.
Утренюют пред Пречи́стым Твои́м о́бразом, Влады́чице, вси́ боля́щии и скорбя́щии, и прие́млют благовре́менну по́мощь: сея́ у́бо не лиши́ и на́, моля́щихся Тебе́, и наста́ви на стезю́ жи́зни.
Утра светле́йший е́сть о́браз Тво́й, Влады́чице, трема́ рука́ма, на не́м зри́мыми, та́йну Святы́я Тро́ицы изобразу́ющий, ду́ши же и телеса́ Боже́ственною благода́тию врачу́ющий и просвеща́ющий. Сего́ ра́ди любе́зно тому́ вси́ покланя́емся.
Утренюют, Богома́ти, пред Троеру́чным Твои́м о́бразом и́ноцы оби́тели Хиланда́рския, прие́млюще от него́, я́ко от игу́мена благослове́ние на дневны́я послуша́ния: и на́с у́бо, Пречи́стая, благослови́, и си́лы на́ша укрепи́, е́же твори́ти дела́ на́ша во сла́ву Бо́жию.
Утру све́тлаго дне́, разгоня́ющему тму́ нощну́ю, подо́бна е́сть Троеру́чная Твоя́ ико́на, Влады́чице Богоро́дице, разгоня́ющая мра́к скорбе́й и печа́лей, притека́ющих к не́й с ве́рою, и пред не́ю моля́щихся Тебе́: у́бо и на́ш грехо́вный мра́к разжени́, Пречи́стая, и наста́ви на стезю́ жи́зни.
Утро просвети́вый сия́нием со́лнечным, Зижди́тель тва́ри, и во утро́бе Твое́й, Пречи́стая, пло́ть Себе́ Созда́вый, То́й ико́ну Твою́ Троеру́чную чудесы́ ди́вными просла́ви, дарова́в ю́ на́м целе́б исто́чник, и в ну́ждах благовре́менну по́мощь: сего́ ра́ди любе́зно сию́ почита́ем.
Катавасия: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Песнь 6.
Ирмос: Очи́сти мя́, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Превзыдо́ша главу́ мою́ беззако́ния моя́, но к кому́ прибе́гну в бе́дствии мое́м, то́кмо к Тебе́, Пречи́стая. Ты́ мя́ возведи́ из ро́ва зо́л мои́х, и поста́ви на тве́рдем ве́ры ка́мени стопы́ моя́, да ктому́ не подви́жуся, и Тобо́ю спа́сся, просла́влю мно́гую и неизрече́нную Твою́ ко мне́ ми́лость.
Превзыдо́ша мно́гия Твоя́ к на́м щедро́ты, Де́во, мно́гая на́ша беззако́ния: Ты́ бо, не помяну́вши на́ша непра́вды, Троеру́чную Твою́ ико́ну на́м дарова́ла еси́ в по́мощь и защище́ние от все́х находя́щих на ны зо́л. Сего́ ра́ди Тебе́ пред то́ю смире́нно и благода́рно покланя́емся.
Превзы́де и препобеди́ мно́гое Твое́, Богома́ти, милосе́рдие мно́гое мирско́е нече́стие: и́бо мно́зи гре́шницы Твои́м к Бо́гу хода́тайством из нече́стия во благоче́стие преложи́шася, и спасе́ни бы́ша. Те́мже спаси́ и на́с, покланя́ющихся Троеру́чному о́бразу Твоему́.
Превозшла́ еси́, Пречи́стая, вся́ у́мная созда́ния святы́нею и чистото́ю, и сего́ ра́ди сподо́билася еси́ бы́ти Ма́терию Сы́на Бо́жия, Иже ико́ну Твою́ Троеру́чную, я́коже и и́ны мно́гия просла́ви ди́вными чудесы́, во спасе́ние и избавле́ние на́ше содева́емыми.
Превозшла́ еси́ уста́вы естества́, Пречи́стая, безсе́менно Бо́га Сло́ва ро́ждши, те́мже и свята́я ико́на Твоя́ па́че естества́ чудоде́йствует, источа́ющи здра́вие душа́м и телесе́м на́шим.
Превзы́де сла́ва Твоя́, Богома́ти, вся́ ри́торская благохвале́ния, зане́ безчи́сленна су́ть чудеса́ от святы́х Твои́х ико́н, во спасе́ние на́ше содева́емая. Сего́ ра́ди Троеру́чней Твое́й ико́не све́тлое пра́зднство соверша́ем, и ве́село взыва́ем: ра́дуйся, Де́во, христиа́н похвало́.
Катава́сия: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Кондак
Глас 8.
Аще и на безслове́снем осля́ти Троеру́чная Твоя́ ико́на во Афо́н принесе́ся, но то́ю в оби́тели Хиланда́рстей же́зл игу́менский прия́ла еси́, те́мже вси́ и́ноцы Святы́я горы́ верхо́вную Игу́мению свою́ Тя́ нарица́ют и приле́жно взыва́ют спаси́ нас, Богома́ти, Ма́терними Твои́ми к Бо́гу моли́твами.
Икос.
Иоа́нна преподо́бнаго исцеле́ние руки́, и́ноков же Хиланда́рских прекраще́нием несогла́сия обра́довала еси́, Влады́чице, те́мже мо́лим Тя́, Всеблага́я: обра́дуй и на́с, душе́вно и теле́сно стра́ждущия, и ми́р благода́тный пода́ждь на́м, да Тебе́ хвале́бно взыва́ем: ра́дуйся, Цели́теля ду́ш и теле́с на́ших ро́ждшая; ра́дуйся, си́лу а́дову Рождество́м Твои́м попра́вшая; ра́дуйся, Еди́наго от Пресвяты́я Тро́ицы безсе́менно воплоти́вшая; ра́дуйся, пре́жде отринове́нное на́ше естество́ Бо́гу прибли́жившая; ра́дуйся, ико́нами Твои́ми при́сно на́м благоде́ющая; ра́дуйся, Троеру́чною Твое́ю ико́ною на́м помога́ющая; ра́дуйся, моли́твам на́шим вне́млющая; ра́дуйся, и спаси́ на́с Ма́терними Твои́ми к Бо́гу моли́твами.
Песнь 7.
Ирмос: От Иуде́и доше́дше, о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Подража́тели и ревни́тели благоче́стия Иоа́нна преподо́бнаго сотвори́ ны́, Влады́чице, да с ни́м и со о́троки, в пещи́ Вавило́нстей за благоче́стие подвиза́вшимся, всегда́ пое́м: благослове́н Бо́г оте́ц на́ших.
Подража́тель трие́х отроко́в, по́мощию Твое́ю, Богома́ти, бы́сть святи́тель Са́вва, и́же пренесе́нию и прославле́нию Троеру́чныя Твоея́ ико́ны усе́рдно послужи́, и научи́ вопи́ти: благослове́н Бо́г оте́ц на́ших.
Подража́юще блу́днаго сы́на, зле́ расточи́вшаго оте́ческое насле́дие, и пока́явшеся, и мы́ зове́м Тебе́, Богоро́дице Де́во, пред Троеру́чным Твои́м о́бразом: согреши́хом, беззако́новахом, непра́вдовахом; прости́ на́с, Влады́чице, и вся́кия му́ки изба́ви, Сы́ну Твоему́ зову́щия: благослове́н Бо́г оте́ц на́ших.
Подража́юще смире́нному мытаре́ву гла́су, взыва́ем к Тебе́, Влады́чице: ми́лостива на́м бу́ди и не отри́ни на́с от лица́ Твоего́, но сподо́би Троеру́чному Твоему́ о́бразу любе́зно поклони́тися, и прису́щею тому́ Боже́ственною благода́тию освяти́тися.
Подража́тели бы́ти отце́м преподо́бным, посто́м и моли́твою Бо́гу благоугоди́вшим, помози́ на́м, Влады́чице, да со о́неми Вопло́щшемуся от Тебе́, Еди́ному от Пребоже́ственныя Тро́ицы, со Отце́м и Ду́хом при́сно пое́м: благослове́н еси́, Бо́же оте́ц на́ших.
Подража́тельница милосе́рдия Бо́жия су́щи, Пречи́стая Де́во, на вся́ ро́ды христиа́нския излива́еши милосе́рдие Твое́, и Троеру́чною Твое́ю ико́ною мно́га благодея́ния подае́ши рабо́м. Сего́ ра́ди любо́вию сию́ честву́ем, Тебе́ Саму́ю, на не́й изображе́нную почита́юще.
Катавасия: Не послужи́ша тва́ри богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Песнь 8.
Ирмос: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся́ ве́ки.
В пещи́ искуше́ний и бе́д су́щии, к Тебе́ же, Богома́ти, пред Троеру́чною Твое́ю ико́ною припа́дающии, ороше́ние духо́вное прие́млют, его́же не лиши́ и на́с, со о́троки вседе́тельную прему́дрость Христа́ воспева́ющия: благослови́те вся́ дела́ Госпо́дня Госпо́да.
Пе́щь пла́мене по́хотнаго угаси́, Влады́чице, росо́ю моли́тв Твои́х, да неопа́льни от него́ пребы́вше, Ро́ждшемуся от Тебе́ Спа́су ду́ш на́ших воспое́м: благослови́те вся́ дела́ Госпо́дня Го́спода, и превозноси́те Его́ во ве́ки.
В пещи́ о́троки невреди́мы сохрани́вый, То́й и ложесна́ Твоя́ де́вственная неврежде́нна сохрани́, безсе́менно от Тебе́, Пречи́стая, рожде́йся, и Тя́ Предста́тельницу на́шей ху́дости показа́. Те́мже, Тобо́ю спаса́еми, Твоего́ Троеру́чнаго о́браза пра́здник соверша́юще, взыва́ем: благослови́те вся́ дела́ Госпо́дня Госпо́да.
Пе́щи огня́ гее́нскаго в бу́дущем ве́це изба́ви нас, Влады́чице, с любо́вию Троеру́чнаго о́браза Твоего́ торжество́ соверша́ющия, и Христу́ вопию́щия: благослови́те вся́ дела́ Госпо́дня Госпо́да.
Благослови́м Отца́ и Сы́на и Свята́го Ду́ха, Го́спода.
В пещи́ искуше́ний и бе́д опаля́емыя ороси́, Богома́ти, струя́ми Твоего́ милосе́рдия, да посра́мятся врази́ на́ши, и да разуме́ют, я́ко Ты еди́на еси́ Помо́щница по все́й вселе́нней, вопию́щим: благослови́те вся́ дела́ Госпо́дня Госпо́да.
И ны́не, и при́сно, и во ве́ки веко́в. Ами́нь.
В пещи́ Вавило́нстей, и в пла́мени купины́ неопали́мыя преображе́нная, Пречи́стая Де́во, росо́ю моли́тв Твои́х изба́ви на́с о́гненнаго запале́ния, мо́лнии же и гро́ма, и вся́кия ины́я беды́, да спа́сшеся Тобо́ю от все́х сих, благода́рственно воспое́м: благослове́нная Ты́ в жена́х, Пречи́стая, и Пло́д чре́ва Твоего́ благослове́н.
Хва́лим, благослови́м, покланя́ емся Го́сподеви, пою́ще и превознося́ще во вся ве́ки.
Катавасия: Отроки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся́ ве́ки.
Песнь 9.
Ирмос: Велича́ем Тя́, Всенепоро́чную/ Ма́терь Христа́ Бо́га на́шего,// Юже осени́ Ду́х Святы́й.
Вопло́щшагося от Тебе́, и с Тобо́ю на ико́не изображе́ннаго Христа́ Бо́га на́шего, Пречи́стая Де́во, моли́, плотски́х страсте́й на́с изба́вити, я́ко да нескве́рным се́рдцем и усты́, Тя́, Богоро́дице, велича́ем.
В пло́ти мое́й ви́жду ин зако́н, вою́ющь проти́ву зако́на ума́ моего́, и пленя́ющь мя́. Те́мже смире́нно к Тебе́, Богома́ти, взыва́ю: ра́ди Троеру́чныя Твоея́ ико́ны, помози́ мне́ победи́ти зако́н грехо́вный, и пло́ть порабо́тити ду́ху, да Тя́ непреста́нно велича́ем.
Во пло́ти безпло́тных житию́ подража́вшим, отце́м преподо́бным, ревнова́ти помози́ ми, Влады́чице, сла́бую во́лю и немощно́е произволе́ние мое́ на сие́ укрепля́ющи, да Тя́, Помо́щницу мою́, при́сно велича́ю.
Пло́ть и ми́р презре́вшия и во святы́й жре́бий Тво́й усе́рдно прише́дшия, не оста́ви, Влады́чице, Свои́м держа́вным покро́вом и заступле́нием, но помози́ на́м кре́пко стоя́ти проти́ву неви́димаго бори́теля, и́щущаго поги́бели ду́ш на́ших, да Тя́, Засту́пницу на́шу, при́сно велича́ем.
Плотоуго́дия твори́ти в по́хотех не попусти́ нам, Богома́ти, но ме́рною стезе́ю воздержа́ния руководи́ на́с к Ца́рствию небе́сному, и та́мо сподо́би узре́ти пресве́тлое лице́ Твое́, Троеру́чный Тво́й о́браз ны́не созерца́ющих, и любе́зно тому́ покланя́ющихся.
Плотска́го мудрова́ния бра́нь лю́тую отжени́ от насе́льников земна́го жре́бия Твоего́, Пресвята́я Де́во, и жи́знь на́шу в ми́ре и тишине́ упра́ви, подаю́щи вся́, я́же к житию́ и спасе́нию потре́бная, да Тя́ при́сно велича́ем.
Катавасия: Вся́к земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная// Богоро́дице, Чи́стая Присноде́во.
Светилен
Троеру́чныя Твоея́ ико́ны пра́зднество сотворя́юще, Богома́ти, смире́нно Тя́ мо́лим: трие́х враго́в, пло́ти, ми́ра и диа́вола изба́ви нас; вся́ бо Тебе́ возмо́жна су́ть, я́ко Ма́тери Царя́ Всемогу́щаго.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Приими́ моле́ние на́ше, Пречи́стая Богоро́дице, сохрани́ и заступи́ от вся́каго зла́, и не отри́ни на́с от Своего́ честна́го о́браза: Тя́ бо и́мамы Моли́твенницу те́плу, и Покро́в неруши́мый, Святы́я же горы́ и оби́тели сея́ вели́кую Похвалу́ и Утвержде́ние.
Стихиры на хвалитех (на 4)
Глас 2.
Прииди́те, лю́дие,/ духо́вно возвесели́мся:/ созва́ бо на́с Свята́я Богоро́дица,/ Троеру́чныя Своея́ ико́ны пра́зднество сотвори́ти,/ и е́ю мно́гия ми́лости на́м яви́ти:/ боля́щим исцеле́ние пода́ти,/ немощны́м здра́вие дарова́ти,// и вся́ я́же к житию́ и спасе́нию поле́зная благовре́менне устро́ити.
Прииди́те, и́ноков ли́цы,/ духо́вно возвесели́мся/ о честне́м пра́зднице Влады́чицы на́шея Богоро́дицы,/ благи́я на́шея Засту́пницы:/ Она́ бо Троеру́чною Свое́ю ико́ною на́с утеша́ет,/ и я́ко верхо́вная Игу́мения,/ о потре́бных к житию́ на́шему промышля́ет,// и спасе́ние ве́чное нам устроя́ет.
Троеру́чным Твои́м о́бразом,/ Влады́чице Богоро́дице, оби́тель Хиланда́рская хва́лится,/ иму́щи ту́(ю) во игу́мена,/ его́ ра́ди прие́млет от Тебе́ вся́ блага́я./ Иноцы же горы́ Афо́нския,/ Твоего́ земна́го вертогра́да,/ прославля́ют Тя́, благу́ю Наде́жду христиа́н,// и держа́вную Засту́пницу всех, с ве́рою к Тебе́ прибега́ющих.
Ка́ко Тя́ раби́ Твои́, Богоро́дице,/ досто́йно восхва́лим,/ я́ко Троеру́чною Твое́ю ико́ною,/ с Предве́чным Младе́нцем, духо́вно на́с весели́ши,/ и от все́х бе́д ми́лостиво спаса́еши,// и поле́зная нам всегда́ да́руеши.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
Та́инство от ве́ка сокрове́нное,/ во́лею Бо́жиею прояви́вшая,/ и Еди́наго от Тро́ицы воплоти́вшая,/ Пречи́стая Де́во,/ Троеру́чную Твою́ ико́ну/ горе́ Афо́нстей в покро́в и защище́ние дарова́ла еси́,/ и подо́биями ея́ мно́гия страны́ Правосла́вныя,/ гра́ды и оби́тели украси́ла,/ и те́ми то́ки чуде́с и исцеле́ний излива́еши ве́рным./ Те́мже благода́рственно и хвале́бно вопие́м Ти:/ ра́дуйся, непристу́пнаго Божества́ селе́ние,/ и на́ше с Бо́гом примире́ние,// и от все́х бед избавле́ние.
Славосло́вие вели́кое, [ектении́] и отпу́ст. Зна́менаются же бра́тия от иере́я святы́м еле́ем, и пое́м стихи́ру самогла́сну пра́здника, ю́же хо́щет екклисиа́рх.
Божественная Литургия.
Блаженны (на 8: песнь 3-я и 6-я)
Во Ца́рствии Твое́м помяни́ нас, Го́споди, / егда́ прии́деши во Ца́рствии Твое́м.
Блаже́ни ни́щии ду́хом, / я́ко тех есть Ца́рство Небе́сное.
Блаже́ни пла́чущии, / я́ко ти́и уте́шатся.
Блаже́ни кро́тции, / я́ко ти́и насле́дят зе́млю.
Блаже́ни а́лчущии и жа́ждущии пра́вды, / я́ко ти́и насы́тятся.
Блаже́ни ми́лостивии, / я́ко ти́и поми́ловани бу́дут.
Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.
Блаже́ни чи́стии се́рдцем, / я́ко ти́и Бо́га у́зрят.
Уподо́бльшася мя́ де́лы неподо́бными ското́м безсмы́сленным, па́ки возведи́ на первообра́зное досто́инство, Преблага́я Влады́чице, благода́тию Троеру́чнаго Твоего́ о́браза озари́вши.
Блаже́ни миротво́рцы, / я́ко ти́и сы́нове Бо́жии нареку́тся.
Уподо́бися свята́я ико́на Твоя́, Влады́чице, купе́ли Силоа́мстей, па́че же и превзы́де ю́: та́ бо еди́ною в ле́то еди́наго неду́жнаго исцелева́ше, сия́ же при́сно душе́вныя и теле́сныя неду́ги исцелева́ет, притека́ющих к не́й с ве́рою.
Блаже́ни изгна́ни пра́вды ра́ди, / я́ко тех есть Ца́рство Небе́сное.
Подо́бно блу́дному сы́ну зле́ расточи́х бога́тство души́ моея́, но к Тебе́, Пречи́стая, пред Троеру́чною Твое́ю ико́ною смире́нно молю́ся: помози́ мне́ па́ки расточе́нное собра́ти, и благода́тно обогати́[ти]ся.
Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.
Превзыдо́ша главу́ мою́ беззако́ния моя́, но к кому́ прибе́гну в бе́дствии мое́м, то́кмо к Тебе́, Пречи́стая. Ты́ мя́ возведи́ из ро́ва зо́л мои́х, и поста́ви на тве́рдем ве́ры ка́мени стопы́ моя́, да ктому́ не подви́жуся, и Тобо́ю спа́сся, просла́влю мно́гую и неизрече́нную Твою́ ко мне́ ми́лость.
Ра́дуйтеся и весели́теся, / я́ко мзда ва́ша мно́га на Небесе́х.
Превзыдо́ша мно́гия Твоя́ к на́м щедро́ты, Де́во, мно́гая на́ша беззако́ния: Ты́ бо, не помяну́вши на́ша непра́вды, Троеру́чную Твою́ ико́ну на́м дарова́ла еси́ в по́мощь и защище́ние от все́х находя́щих на ны зо́л. Сего́ ра́ди Тебе́ пред то́ю смире́нно и благода́рно покланя́емся.
Сла́ва Отцу́ и Сы́ну / и Свято́му Ду́ху.
Превзы́де и препобеди́ мно́гое Твое́, Богома́ти, милосе́рдие мно́гое мирско́е нече́стие: и́бо мно́зи гре́шницы Твои́м к Бо́гу хода́тайством из нече́стия во благоче́стие преложи́шася, и спасе́ни бы́ша. Те́мже спаси́ и на́с, покланя́ющихся Троеру́чному о́бразу Твоему́.
И ны́не и при́сно / и во ве́ки веко́в, ами́нь.
Превзы́де сла́ва Твоя́, Богома́ти, вся ри́торская благохвале́ния, зане́ безчи́сленна суть чудеса́ от святы́х Твои́х ико́н, во спасе́ние на́ше содева́емая. Сего́ ра́ди Троеру́чней Твое́й ико́не све́тлое пра́зднство соверша́ем, и ве́село взыва́ем: ра́дуйся, Де́во, христиа́н похвало́.
Тропари по входе
Глас 4.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бед изба́ви,/ да зове́м Ти:// ра́дуйся, Благода́тная, Троеру́чною ико́ною Твое́ю нам помога́ющая.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
Аще и на безслове́снем осля́ти Троеру́чная Твоя́ ико́на во Афо́н принесе́ся,/ но то́ю в оби́тели Хиланда́рстей же́зл игу́менский прия́ла еси́,/ те́мже вси и́ноцы Святы́я горы́ верхо́вную Игу́мению свою́ Тя нарица́ют// и приле́жно взыва́ют: спаси́ нас, Богома́ти, Ма́терними Твои́ми к Бо́гу моли́твами.
Прокимен
Глас 3, песнь Богородицы: Вели́чит душа́ Моя́ Го́спода,/ и возра́довася ду́х Мо́й о Бо́зе, Спа́се Мое́м.
Стих: Яко призре́ на смире́ние рабы́ Своея́, се́ бо отны́не ублажа́т Мя́ вси́ ро́ди.
Чтение Апостола
Ко евре́ом посла́ния свята́го апо́стола Па́вла чте́ние.
Бра́тие, име́яше пе́рвая ски́ниа оправда́ния слу́жбы, свято́е же людско́е. Ски́ниа бо сооружена́ бысть пе́рвая, в не́йже свети́льник, и трапе́за, и предложе́ние хле́бов, я́же глаго́лется Свята́я. По вторе́й же заве́се ски́ниа глаго́лемая, Свята́я святы́х. Зла́ту иму́щи кади́льницу, и ковче́г заве́та окова́н всю́ду зла́том, в не́мже ста́мна злата́ иму́щая ма́нну, и жезл Ааро́нов прозя́бший, и скрижа́ли заве́та. Превы́шше же eго́ херуви́ми сла́вы, осеня́ющии oлта́рь, о ни́хже несть ны́не глаго́лати подро́бну. Сим же та́ко устро́eным, в пе́рвую у́бо ски́нию вы́ну вхожда́ху свяще́нницы, слу́жбы соверша́юще. Во втору́ю же eди́ною в ле́то eди́н архиере́й, не без кро́ве, ю́же прино́сит за себе́, и о людски́х неве́жествиих.Евр 9:1-7
Аллилуарий
Глас 8: Слы́ши Дщи́ и ви́ждь, и приклони́ у́хо Твое́.
Стих: Лицу́ Твоему́ помо́лятся бога́тии лю́дстии.
Чтение Евангелия
(от Луки, зачало 54)
От Луки свята́го Ева́нгелиа чте́ние.
Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя́, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е.Лк.10:38-42;11:27-28
Причастен
Ча́шу спасе́ния прииму́, и и́мя Госпо́дне призову́.
Славление
Тропари
Глас 4.
Троеру́чную Твою́, Богома́ти, ико́ну,/ треми́ изображе́нными на не́й рука́ми,/ та́йну Святы́я Тро́ицы образу́ющую,/ чудесы́ мно́гими просла́вила еси́./ Те́мже вопие́м Ти́:/ я́коже дре́вле отсе́ченную ру́ку/ преподо́бнаго Иоа́нна Дамаскина́ исцели́ла еси́,/ та́ко и ны́не душе́вныя и теле́сныя на́ша неду́ги исцели́,/ и от вся́ких бед изба́ви,/ да зове́м Ти:// ра́дуйся, Благода́тная, Троеру́чною ико́ною Твое́ю нам помога́ющая.
Слáва Отцу́ и Сы́ну и Святóму Ду́ху, и ны́не, и при́сно, и во вéки векóв. Ами́нь.
Глас 8.
Аще и на безслове́снем осля́ти Троеру́чная Твоя́ ико́на во Афо́н принесе́ся,/ но то́ю в оби́тели Хиланда́рстей же́зл игу́менский прия́ла еси́,/ те́мже вси и́ноцы Святы́я горы́ верхо́вную Игу́мению свою́ Тя нарица́ют// и приле́жно взыва́ют: спаси́ нас, Богома́ти, Ма́терними Твои́ми к Бо́гу моли́твами.
Молитвы
Молитва первая.
О Пресвята́я Госпоже́ Влады́чице Богоро́дице, ве́лие чу́до свято́му Иоа́нну Дамаски́ну яви́вшая, я́ко ве́ру и́стинную и наде́жду несумне́нную показа́вшему! Услы́ши нас, гре́шных, пред чудотво́рною Твое́ю ико́ною усе́рдно моля́щихся и прося́щих Твоея́ по́мощи: не отри́ни моле́ния сего́ мно́гих ра́ди прегреше́ний на́ших, но, я́ко Ма́ти милосе́рдия и щедро́т, изба́ви нас от боле́зней, скорбе́й и печа́лей, прости́ соде́янныя на́ми грехи́, испо́лни ра́дости и весе́лия всех, чту́щих святу́ю ико́ну Твою́, да ра́достно воспое́м и любо́вию просла́вим и́мя Твое́, я́ко Ты́ еси́ от всех родо́в избра́нная и благослове́нная во ве́ки веко́в. Ами́нь.
Молитва вторая.
О Пресвята́я и Преблагослове́нная Де́во Богоро́дице Мари́е! Припа́даем и покланя́емся Ти пред свято́ю ико́ною Твое́ю, воспомина́юще пресла́вное чу́до Твое́, исцеле́нием усе́ченныя десни́цы преподо́бнаго Иоа́нна Дамаски́на, от ико́ны сея́ явле́нное, его́же зна́мение доны́не ви́димо есть на ней, во о́бразе тре́тия руки́, к изображе́нию Твоему́ приложе́нныя. Мо́лимся Ти́ и про́сим Тя, Всеблагу́ю и Всеще́друю ро́да на́шего Засту́пницу: услы́ши нас, моля́щих Ти ся, и я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, та́ко и нас не пре́зри, скорбя́щих и боле́знующих ра́нами страсте́й многоразли́чных и к Тебе́ от души́ сокруше́нныя и смире́нныя усе́рдно прибега́ющих. Ты́ зри́ши, Госпоже́ Всеми́лостивая, не́мощи на́ша, озлобле́ние на́ше, ну́жду, потре́бу на́шу в Твое́й по́мощи и заступле́нии, я́ко отвсю́ду враги́ окруже́ни есмы́, и несть помога́ющаго, ниже́ заступа́ющаго, а́ще не Ты́ умилосе́рдишися о нас, Влады́чице. Ей, мо́лим Ти́ ся, вонми́ гла́су боле́зненному на́шему и помози́ нам святооте́ческую Правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на Стра́шнем Суде́ Сы́на Твоего́ и Бо́га на́шего, Его́же умоли́ за нас Ма́тернею моли́твою Твое́ю, да не осу́дит нас по беззако́нием на́шим, но да поми́лует нас по вели́цей и неизрече́нней ми́лости Свое́й. О Всеблага́я! услы́ши нас и не лиши́ нас по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя́ на земли́ живы́х и ро́ждшагося от Тебе́ Искупи́теля на́шего, Го́спода Иису́са Христа́, Ему́же подоба́ет сла́ва и держа́ва, честь и поклоне́ние, ку́пно со Отце́м и Святы́м Ду́хом, всегда́, ны́не, и при́сно, и во ве́ки веко́в. Ами́нь.
Величания
Велича́ем Тя,/ Пресвята́я Де́во,/ богоизбра́нная Отрокови́це,/ и чтим Троеру́чный о́браз Твой,/ и́мже то́чиши исцеле́ния,// всем с ве́рою притека́ющим.
Велича́ем Тя,/ Пренепоро́чная Де́во,/ и чтим чудеса́ о́браза свята́го Твоего́,/ трех пречи́стых рук Твои́х явле́ние// в сла́ву Божества́, в Тро́ице Бо́га на́шего.
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния// всем с ве́рою притека́ющим.
Источники
- Жички и Студенички минеј за јул. / [Приредио епископ жички Хрисостом]. — Краљево: Епархија Жичка: Манастир Жича: [Студеница]: Манастир Студеница, 2007. — Стр. 131-154.
- Величания Киевского распева [Нотный сборник]. — Санкт-Петербургская Духовная Академия, Факультет церковных искусств, Редактор-составитель: М.И.Ващенко, 2017 — Стр. 42
Всенощное бдение на планшете · Литургия на планшете · Наверх